مۇناي ءوندىرۋ كولەمى 2026-جىلدان 100 ميلليون توننادان اسادى - الماسادام ساتقاليەۆ
استانا. KAZINFORM - بيىلعى 10 ايدا 73,5 ميلليون توننا مۇناي ءوندىرىلدى. بۇل تۋرالى پارلامەنت ماجىلىسىندەگى ۇكىمەت ساعاتىندا مۇناي سالاسىن دامىتۋدى تالقىلاۋ كەزىندە ق ر ەنەرگەتيكا ءمينيسترى الماسادام ساتقاليەۆ ءمالىم ەتتى.
«10 ايدىڭ قورىتىندىسى بويىنشا مۇناي ءوندىرۋ 73,5 ميلليون توننانى قۇرادى. بيىل 88,4 ميلليون توننا مۇناي ءوندىرۋ ەسكەرىلگەن. جوسپارمەن سالىستىرعاندا ءوندىرىس كولەمىنىڭ تومەندەۋى تەڭىز جانە قاشاعان ءىرى كەن ورىندارىنداعى كۇردەلى جوندەۋ جۇمىستارىنا بايلانىستى. سونداي- اق، ءوندىرىس كولەمىنىڭ تومەندەۋىنە قاراشىعاناق كەن ورنىنداعى جوسپاردان تىس جۇمىستىڭ توقتاۋى مەن ورىنبور گاز وڭدەۋ زاۋىتىندا گاز الۋعا شەكتەۋلەر اسەر ەتتى. ءوندىرىس دەڭگەيىنىڭ تومەندەۋىنە وپەك+ كەلىسىمى بويىنشا مىندەتتەمەلەردىڭ ورىندالۋى دا اسەر ەتىپ وتىر»، - دەدى ا. ساتقاليەۆ.
ونىڭ ايتۋىنشا، قازاقستان وپەك+ كەلىسىمىنە قاتىسىپ وتىر. قازاقستان ءۇشىن باسقا ەلدەر سياقتى 2024 -جىلعا ءتيىستى مىندەتتەمەلەر بەلگىلەنگەن. كەلىسىمنىڭ تالاپتارىن ورىنداۋ الەمدىك مۇناي نارىعىنداعى تۇراقتىلىقتى ساقتاۋ ءۇشىن قاجەت.
«ەلىمىزدىڭ مۇناي-گاز كەشەنىن دامىتۋدا ەلىمىزدە مۇناي ءوندىرۋدىڭ 65 پايىزىن قۇرايتىن ءۇش ءىرى كەن ورنى ماڭىزدى ءرول اتقارادى. جوبالاردى ىسكە اسىرۋ باستالعاننان بەرى جالپى تىكەلەي ينۆەستيتسيا كولەمى شامامەن 185 ميلليارد ا ق ش دوللارىن قۇرادى. بولجامدارعا سايكەس، 2026 -جىلدان باستاپ ءىرى جوبالاردى جۇزەگە اسىرۋ ەسەبىنەن جىلدىق مۇناي ءوندىرۋ كولەمى 100 ميلليون توننادان اسادى. تەڭىزشيەۆرويل مۇناي ءوندىرۋدى جىلىنا 12 ميلليون تونناعا ارتتىرۋدى قامتاماسىز ەتەتىن كەلەشەك كەڭەيتۋ جوباسىن جۇزەگە اسىرىپ وتىر. قاراشىعاناقتا بەسىنشى كومپرەسسورداعى جۇمىستار اياقتالدى، شيكى گازدى قايتا ايداۋ ءۇشىن التىنشى كومپرەسسوردى ىسكە قوسۋ جۇمىستارى اتقارىلىپ جاتىر. بۇل مۇناي ءوندىرۋىن جىلىنا 11-12 ميلليون توننا دەڭگەيىندە ساقتالۋىن قامتاماسىز ەتەدى. بۇل رەتتە كەن ورنىندا قۋاتتىلىعى 4 ميلليارد تەكشە مەتر گازدى وڭدەيتىن زاۋىتتى سالۋ جوباسى جۇزەگە اسىرىلىپ وتىر. اياقتالۋ مەرزىمى - 2028 -جىلدىڭ سوڭى»، -دەدى مينيستر.
ۆەدومستۆو باسشىسى قاشاعاندا 2026 -جىلدان باستاپ مۇناي ءوندىرۋدى 1 ميلليون تونناعا ارتتىرۋدى كوزدەيتىن قۋاتى جىلىنا 1 ميلليارد تەكشە مەتر گاز وڭدەۋ زاۋىتىن سالۋ جۇمىسى اتقارىلىپ جاتقانىن ەسكە سالدى.
«سونىمەن قاتار 2029 -جىلى قۋاتى جىلىنا 2,5 ميلليارد تەكشە مەتر گاز وڭدەۋ زاۋىتىن سالۋ ارقىلى مۇناي ءوندىرۋدى 2 ميلليون تونناعا ارتتىرۋدى قامتاماسىز ەتۋ قاراستىرىلعان. جالپى العاندا، ءۇش ءىرى جوباداعى مۇناي ءوندىرۋ رەسپۋبليكاداعى بارلىق مۇناي ءوندىرۋدىڭ 70 پايىزىن قۇرايدى، وعان شامامەن 17 ميلليارد دوللار ينۆەستيتسيا سالىنادى»، - دەدى مينيستر.
ەسكە سالساق، بۇعان دەيىن مينيستر ەلىمىزدە مۇناي-گاز سالاسىندا 1,3 مىڭنان استام كاسىپورىن قىزمەت ەتىپ جاتقانىن ايتتى.
