مەن دە ءىشىنارا كىنالىمىن - NASA ەكيپاجىنىڭ كومانديرى بۋتچ ۋيلمور

استانا. قازاقپارات - NASA استروناۆتارى بۋتچ ۋيلمور مەن سۋني ۋيليامس وربيتادا ۇزاق بولىپ جەرگە ورالعان كەزدەگى سەزىمدەرىن سيپاتتادى، دەپ حابارلايدى BBC.

جۇپتىڭ حالىقارالىق عارىش ستانسياسىنا سەگىز كۇندىك ميسسياسى Boeing Starliner-دىڭ تەحنيكالىق اقاۋىنان كەيىن توعىز ايلىق عارىشتىق وديسسەياعا اينالدى. ولار 19-ناۋرىزدا فلوريدا جاعالاۋىندا سۋعا قونعان SpaceX Dragon بورتىندا جەرگە ورالدى.

- 3 مىڭ گرادۋستىق وتتى شاردىڭ ىشىندە اتموسفەرا ارقىلى ۇشىپ، عارىشتان جەرگە ورالۋ - ءبىرتۇرلى سەزىم، ءبىراق وتە كەرەمەت، - دەدى بۋتچ ۋيلمور.

NASA-نىڭ دۇيسەنبى كۇنى كەشكە وتكەن باسپا ءسوز ءماسليحاتىندا ۋيلموردان Starliner-دەگى ماسەلەلەرگە كىم جاۋاپتى دەپ سۇرادى.

- مەنەن باستاۋعا بولادى. ارينە، Starliner- دە پروبلەمالار بولدى. وندا جەرگە ورالۋىمىزعا كەدەرگى بولاتىن بەلگىلى ءبىر اقاۋلار شىقتى. ال مەن وزىمنەن باستايىن، ويتكەنى مەن كەمە كومانديرى رەتىندە قويۋىم ءتيىس سۇراقتار بولدى. ءبىراق مەن ولاردان سۇرامادىم - مەن ءتىپتى ولاردان سۇراۋ كەرەك ەكەنىن بىلمەدىم. ماعان «كىنا» دەگەن ءسوز ۇنامايدى، ءبىراق باعدارلامانىڭ بارلىق دەڭگەيىندە جاۋاپكەرشىلىك بارى ءسوزسىز. ەگەر قالاساڭىز، مەنى دە ءىشىنارا كىنالى دەپ ەسەپتەي الاسىز، - دەپ جاۋاپ بەردى ول.

ول ۇيگە قايتۋ پروبلەمالارى ءۇشىن جاۋاپكەرشىلىك «بارلىق تىزبەكتە»، سونىڭ ىشىندە NASA مەن Boeing-تە دە بار ەكەنىن قوسىپ ءوتتى.

عارىشتا ۇزاق ۋاقىت بولعان كەزدە اقش اسكەري- تەڭىز كۇشتەرىنىڭ ەكى ارداگەرى اشىق عارىشقا شىقتى، عىلىمي ەكسپەريمەنتتەر جۇرگىزدى، ءتىپتى حعس بورتىندا سانتەحنيكامەن بايلانىستى ماسەلەلەردى شەشۋگە كومەكتەستى.

- ءبىز ءوز ميسسيامىزعا دەگەن قىزىعۋشىلىقتىڭ قانشالىقتى زور ەكەنىن ءتىپتى بايقاماي قالدىق. ۇيگە ورالعاندا، «وۋ، ءبىزدى كوپ ادام كۇتىپ تۇردى» - بۇل ءارى قۇرمەت، ءارى ازداپ ۇيات بولدى. ءبىز جاي عانا ءوز ىسىمىزبەن اينالىستىق. الەم ءبىزدى اينالىپ وتىرعان جوق، ءبىراق ءبىز ونىڭ اينالاسىندا اينالامىز، - دەپ قوستى سۋني ۋيليامس.

استروناۆتار سونداي- اق وربيتادا ۇزاق بولعاننان كەيىن جەردى العاش باسقان كەزدەگى سەزىمدەرىمەن ءبولىسىپ، العاشقى كۇندەرى نە ىستەگەنىن ايتىپ بەردى.

- ۇيگە قايتىپ ورالۋ - بۇل كەرەمەت. مەن ءتىپتى جۇگىرۋگە دە شىقتىم. باياۋ بولسا دا، بەتكە جەل سوققانىن سەزىنۋ جانە اينالاڭدا ادامداردى كورۋ سونداي جاقسى. بۇل - ءۇي. مەن جاي عانا توسەككە جاتتىم. توعىز ايدا ءبىرىنشى رەت توسەكتە جاتۋ - ايتىپ جەتكىزە المايتىن سەزىم. كەلەسى كۇنگە دەيىن تۇرماي جاتتىم. سوسىن ورنىمنان تۇرىپ، قوزعالىپ، گراۆيتاتسياعا قايتادان ۇيرەنۋگە تىرىستىم. وزىمە ىرىمشىكتەن جاسالعان تاماشا سەندۆيچ جاسادىم، - دەپ باياندادى سۋني.

ەسكە سالا كەتسەك، سۋني مەن بۋتچ وقيعاسى 2024 -جىلدىڭ ماۋسىمىندا باستالدى. عارىشكەرلەر Boeing كومپانياسىنىڭ Starliner عارىش كەمەسىنىڭ العاشقى سىناعىنا قاتىستى.

عارىش ستانتسياسىنا ۇشۋ كەزىندە كاپسۋلا ءبىرقاتار تەحنيكالىق اقاۋعا تاپ بولدى، سوندىقتان عارىشكەرلەردى ۇيگە قايتارۋ تىم قاۋىپتى دەپ سانالدى.

NASA استروناۆتارى توعىز اي عارىشتا بولعاننان كەيىن جەرگە ورالعانىن جازعان بولاتىنبىز.

اۆتور

زارينا تۋعانبايەۆا