مەن ءۇشىن نازىمنىڭ قولاسى التىنعا بەرگىسىز - باس باپكەر

پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا ايەلدەر بوكسىنان بۇگىن نازىم قىزايباي قولا مەدالعا يە بولدى. جەكپە- جەكتەن كەيىن ايەلدەر بوكسىنان ۇلتتىق قۇرامانىڭ باس باپكەرى ەلدوس سايدالين kazinform تىلشىسىنە شاعىن سۇحبات بەرىپ، ءوز پىكىرىمەن ءبولىستى.

- ەلدوس جانىبەك ۇلى، نازىم قىزايبايدىڭ جارتىلاي فينالداعى ايقاسى تۋرالى ايتىپ وتسەڭىز؟

- جارتىلاي فينالدا نازىم ەش ايانىپ قالعان جوق. بارىن سالدى، فينالعا شىعۋعا دەگەن ءوزىنىڭ ەرىك-جىگەرىن كورسەتتى. قارسىلاسىمىزدى وزدەرىڭىز بىلەسىزدەر، وتە مىقتى قارسىلاس. ءبىراق، قىتايلىق بوكسشى قىز نازىمدى ەرەكشە ءبىر ايقىن باسىمدىلىقپەن ۇتقان جوق. تورەشىلەر قىتايلىق بوكسشىنىڭ قولىن كوتەردى. سول بوكسشى فينالعا شىقتى.

- نەگىزى، جارتىلاي فينالدا نازىم شىن مانىندە جەڭىلدى دەپ ويلايسىز با؟

- مىقتىنى مىقتى دەپ مويىنداۋىمىز كەرەك. بۇل - سپورت. بىردە جەڭەسىڭ، بىردە جەڭىلەسىڭ. قىتاي قىزى ءسال باسىمدىلىق تانىتقانى ءۇشىن جەڭىستى الىپ كەتتى.

- نازىم قىزايبايدىڭ وسىعان دەيىنگى جەكپە-جەكتەرىنە قانداي باعا بەرەسىز؟

- نازىم وليمپيادا ويىندارى بارىسىندا ءتورت بىردەي جەكپە-جەك وتكىزدى. العاشقىلارىنىڭ بارلىعىن تازا، سەنىمدى تۇردە ۇتتى. تەك جارتىلاي فينالدا سۇرىندىك. ءبىراق، مەن نازىمعا ەشقانداي وكپەم جوق. ول بارلىق تاپسىرمانى ورىندادى. قولاعا قول جەتكىزدى. جۇلدەلى ورىنعا جەتتى. پاريجگە تەگىن كەلمەگەنىن دالەلدەدى. نازىمنىڭ قولا جۇلدەسى مەن ءۇشىن التىنمەن بىردەي.

- ەگەر، وليپياداعا قىزدارىمىز تولىق قۇرامدا كەلگەندە كورسەتكىش بۇدان دا جاقسى بولار ما ەدى؟

- ول دا مۇمكىن. پاريجگە ءۇش قىز كەلىپ، بىرەۋى قولاعا قول جەتكىزۋى جامان كورسەتكىش ەمەس.

- ال كارينا يبراگيموۆا مەن ۆالەنتينا حالزوۆانىڭ جەكپە-جەكتەرى تۋرالى نە ايتار ەدىڭىز؟

- ءار جەكپە-جەكتەردى حالىق كورىپ وتىر دەپ ويلايمىن. ول ەكەۋى دە جامان جۇدىرىقتاسقان جوق. ولار دا بار كۇشىن سالدى. جەڭىسكە قول جەتكىزۋگە تىرىستى. بار ونەرىن كورسەتتى. وزدەرى ۇيالاتىنداي جەكپە-جەك كورسەتكەن جوق دەپ ويلايمىن. ءبىراق، بۇل - وليمپيادا. تورەشىلەر قانداي شەشىم شىعاردى، سولاي بولىپ قالادى.

- ءسىز باس باپكەرلىككە وليمپيادا ويىندارىنىڭ الدىندا عانا تاعايىندالعانىڭىزدى جاقسى بىلەمىز. ەگەر، ەرتەرەك كەلگەندە بۇل سسەناري باسقاشا بولۋى مۇمكىن بە ەدى؟

- ول جاعىن ناقتىلى ايتا المايمىن. مەن باس باپكەرلىككە كەلمەي تۇرعاندا دا، بۇل قىزدارىمىز ۇلتتىق قۇرامادا بولدى. جوسپار بويىنشا جارىستارعا قاتىسىپ، وقۋ-جاتتىعۋ جيىندارىن وتكىزىپ ءجۇردى. مەنەن بۇرىن دا وليمپياداعا دايىندالدى. سوندىقتان، مەن بۇرىنعى باپكەرلەردىڭ ەڭبەگىن جوققا شىعارمايمىن.

- كەلەسى وليمپيادا ويىندارىنا دەيىن باس باپكەر قىزمەتىندە قالعىڭىز كەلە مە؟

- ەگەر، ەل ءۇمىت ارتىپ، قىزمەتىمىزدى باعالاپ جاتسا، ارينە قىزمەت ەتۋگە دايىنبىز. كەلەسى ا ق ش- تا وتەتىن وليمپياداعا تولىق قۇرامدا جولداما الۋعا بار كۇشىمىزدى سالامىز.

- ءسىز ۇلتتىق قۇرامانىڭ تىزگىنىن ۇستاعانعا دەيىن جاستار قۇراماسىن باپتاپ كەلگەنىڭىزدى بىلەمىز. قازاق قىزدارىنان كەلەسى وليمپيادادا چەمپيون شىعارۋعا قانشالىقتى مۇمكىندىگىمىز بار؟

- مۇمكىندىكتەر وتە كوپ. قازىرگى تاڭدا بوكسپەن اينالىسىپ جۇرگەن قىزدارىمىزدىڭ قاتارى قالىڭ. ەندى، مىنە نازىم قىزايبايعا قاراپ بوي تۇزەگىسى كەلەتىن جاستارىمىز سانى ارتپاسا كەمىمەيدى دەپ ويلايمىن. نازىم قازاق قىزدارىنا بوكستىڭ وزىق ۇلگىسىن كورسەتە ءبىلدى.

- جالپى، ءوزىڭىز باس باپكەرلىككە كەلگەن از عانا ۋاقىتتا ەڭبەگىڭىز اقتالدى دەپ ويلايسىز با؟

- ءبىزدىڭ قىزدار وليمپيادادا جاقسى جەكپە-جەكتەر كورسەتتى دەپ سانايمىن. ال ەڭبەگىمىزگە باعا بەرەتىن حالىق.

اۆتور

كۇنسۇلتان وتارباي