مەملەكەتتىك ورگانداردىڭ اكىمشىلىك دەرەكتەرىندە قانداي قاتە ءجيى كەزدەسەدى

استانا. KAZINFORM - ۇلتتىق ستاتيستيكا بيۋروسى جانىنان مەملەكەتتىك ورگاندار اكىمشىلىك دەرەكتەرىنىڭ دۇرىستىعىن تەكسەرەتىن ينستيتۋت قۇرىلدى. بۇل تۋرالى Kazinform اگەنتتىگىنىڭ رەسمي ساۋالىنا ۇلتتىق ستاتيستيكا بيۋروسى جولداعان جاۋاپتا ايتىلعان.

- «مەملەكەتتىك ستاتيستيكا تۋرالى» ق ر زاڭىنا ەنگىزىلگەن وزگەرىستەر شەڭبەرىندە ۇلتتىق ستاتيستيكا بيۋروسىنا اكىمشىلىك دەرەكتەردىڭ ساپاسىن انىقتاۋ بويىنشا فۋنكتسيالار بەرىلگەن. قويىلعان مىندەتتەردى ىسكە اسىرۋ ماقساتىندا «قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ اقپاراتتىق-ەسەپتەۋ ورتالىعى» ش ج ق ر م ك ۆەدومستۆولىق باعىنىستى ۇيىمىنىڭ بازاسىندا دەرەكتەردى باقىلاۋشىلار ينستيتۋتى قۇرىلدى، - دەلىنگەن حابارلامادا.

مالىمەتكە ساي، دەرەكتەردى باقىلاۋشى - اكىمشىلىك دەرەكتەردىڭ ساپاسىن باعالاۋ ءۇشىن اكىمشىلىك دەرەككوزدەرگە مەملەكەتتىك باقىلاۋ جۇرگىزۋ كەزىندە تارتىلاتىن ستاتيستيكا جانە مەملەكەتتىك مونوپوليا سۋبەكتىسىنىڭ اقپاراتتىق- كوممۋنيكاتسيالىق تەحنولوگيالار سالاسىنداعى مامانى. بۇگىنگى كۇنى دەرەكتەر ساپاسىن باقىلاۋ دەپارتامەنتى قىزمەتكەرلەرىنىڭ سانى - 10 ادام.

اكىمشىلىك دەرەكتەردىڭ دۇرىستىعىن باقىلاۋ انومالدى ماندەردى، قاراما-قايشىلىقتاردى، سايكەسسىزدىكتەردى انىقتاۋ ارقىلى جۇزەگە اسىرىلادى. سونداي-اق اكىمشىلىك دەرەكتەر ءدال وسىنداي دەرەكتەردى جينايتىن باسقا دا رەسمي دەرەككوزدەردىڭ مالىمەتىمەن سالىستىرۋ ارقىلى تەكسەرىلەدى.

اتالعان ينستيتۋت وتكەن جىلى ورتالىق مەملەكەتتىك ورگاندار اكىمشىلىك دەرەكتەرىنىڭ ساپاسىنا باعالاۋ جۇرگىزگەن بولاتىن. سونىڭ ناتيجەسىندە مەملەكەتتىك ورگانداردا كوبىندە مىنا ساناتتاعى قاتە مالىمەتتەر كەزدەسەتىنى انىقتالدى:

ساي ەمەس دەرەكتەر جانە قاتە مالىمەتتەر - جەكە نەمەسە بيزنەس سايكەستەندىرۋ نومىرلەرى (ج س ن/ب س ن) ەتالوندىق دەرەكقوردان تابىلمايدى نەمەسە دەربەس دەرەكتەردە قاتەلەر (اتاۋى، مەكەنجايى جانە ت. ب. ) بولادى.
انومالدى ماندەر - رۇقسات ەتىلگەن اۋقىمداردىڭ شەگىنەن شىعاتىن ماندەر. مىسالى، اۆتوكولىك قۇرالى ماسساسىنىڭ تەرىس ءمانى.
قايتالاناتىن ماندەر - ءبىر وبەكتىگە نەمەسە تۇلعاعا جاتاتىن دەرەكقورداعى قايتالاناتىن جازبالار. مىسالى، ءبىر ەلدى مەكەننىڭ (كەنتتىڭ، اۋىلدىق وكرۋگتىڭ، اۋداننىڭ، قالانىڭ، وبلىستىڭ) شەگىندە ورنالاسقان ءۇي شارۋاشىلىقتارى مۇشەلەرى ج س ن-ىنىڭ قايتالانۋى.
ۇلتتىق انىقتامالىق اقپارات ەلەمەنتتەرىنىڭ دۇرىس ەمەس ماندەرى. مىسالى، اكىمشىلىك- اۋماقتىق وبەكتىلەر جىكتەۋىشىنىڭ كۇشى جويىلعان كودتارى پايدالانىلادى.
ەسكىرگەن مالىمەتتەر - تاراتىلعان كاسىپورىندارعا، قايتىس بولعان ادامدارعا نەمەسە ەسكىرگەن مەكەنجايلارعا قاتىستى اقپارات. مىسالى، قايتىس بولعان ادامعا نەمەسە تاراتىلعان كاسىپورىنعا اۋىل شارۋاشىلىعى جانۋارلارى تىركەلگەن.
مىندەتتى ورىستەردى تولتىرماۋ - دەرەكتەردى ەنگىزۋ كەزىندە تولتىرۋ ءۇشىن مىندەتتى ورىستەردى وتكىزۋ. مىسالى، اۆتوكولىك قۇرالىنىڭ تولتىرىلماعان تەحنيكالىق سيپاتتامالارى (VIN- كود، شاسسي ءنومىرى، اۆتو اتاۋى).
دەرەكتەردىڭ سالىستىرمالىلىعى - ۇلتتىق انىقتامالىق اقپاراتتىڭ وزەكتى ەمەس ەلەمەنتتەرىنىڭ پايدالانىلماۋى نەمەسە پايدالانىلماۋى، ۋاقىتشا، وڭىرلىك جانە سالالىق بولىنىستە اكىمشىلىك دەرەكتەردىڭ سالىستىرمالىلىعى، سونداي-اق اقپاراتتى ۇسىناتىن تۇلعالاردىڭ شەڭبەرىن سايكەستەندىرۋدىڭ بولماۋى. مىسالى، اۋىل شارۋاشىلىعى جانۋارلارى بويىنشا اكىمشىلىك دەرەكتەردى جيناۋ كەزىندە شارۋاشىلىق جۇرگىزۋدىڭ ۇيىمدىق- قۇقىقتىق نىساندارىنىڭ انىقتامالىعى پايدالانىلمايدى، بۇل اۋىل شارۋاشىلىعى جانۋارلارى بار جەكە تۇلعالار مەن جەكە كاسىپكەرلەر بويىنشا دەرەكتەردى دۇرىس سالىستىرۋعا مۇمكىندىك بەرمەيدى.
ماسەلەن، 2024 -جىلى وتكىزىلگەن اۋىل شارۋاشىلىعى مينيسترلىگى اقپاراتتىق جۇيەلەرى اكىمشىلىك دەرەكتەرىنىڭ ساپاسىن باعالاۋ كەزىندە مالدىڭ ورتاشا بيولوگيالىق جاسىنان اساتىن اۋىل شارۋاشىلىعى جانۋارلارى تىركەلگەنى انىقتالعان. ناقتى ايتقاندا، 70 جاستان اسقان ءىرى قارا مال، 15 جاستان اسقان ۇساق مال انىقتالعان. ودان بولەك، تاراتىلعان ۇيىمداردىڭ دەرەكقورلارىندا قايتىس بولعان ادامنىڭ اتىنا اۋىل شارۋاشىلىعى تەحنيكاسى تىركەلگەنى انىقتالدى. ينستيتۋت وسى سەكىلدى جالعان نە ەسكىرگەن مالىمەتتەردى انىقتاپ، تۇزەتىپ، وعان جول بەرمەۋ امالدارىن ەنگىزىپ، ستاتيستيكالىق دەرەكتىڭ ساپاسىن ارتتىرادى.

ەسكە سالا كەتەيىك، بۇعان دەيىن ەلىمىزدە ستاتيستيكا قالاي جاسالاتىنى جايلى جازعان ەدىك.

اۆتور

ەربول جانات