مەملەكەتتىك تىلدە سويلەيتىنىمدى ماقتان ەتەمىن - اتىراۋلىق تەرگەۋشى يۋليا كۋزنەتسوۆا

اتىراۋ. KAZINFORM - اتىراۋ وبلىسىنىڭ پوليتسياسىندا مەملەكەتتىك تىلدە سويلەيتىن، ويىن ەركىن جەتكىزەتىن وزگە ەتنوستىڭ وكىلى از ەمەس. سونىڭ ءبىرى - يۋليا كۋزنەتسوۆا.

قازىر ول اتىراۋ قالالىق پوليتسيا باسقارماسى تەرگەۋ ءبولىمىنىڭ تەرگەۋشىسى بولىپ جۇمىس ىستەيدى. شەنى - پوليتسيا اعا لەيتەنانتى. كىندىك قانى رەسەي فەدەراتسياسىمەن شەكاراداعى قۇرمانعازى اۋدانىندا تامعان. وسىنداعى بىرلىك اۋىلىندا ورنالاسقان س. يماشيەۆ اتىنداعى ورتا مەكتەپتى بىتىرگەن.

- بالا كەزىمنەن قازاقشا سويلەۋگە اڭسارىم اۋدى. اۋىلداعى بالالارمەن قازاقشا اڭگىمەلەسىپ، وليمپياداعا قاتىستىم. قازىر مەملەكەتتىك تىلدە ەركىن سويلەيمىن. نەگە مۇنداي قادامعا باردىم؟ بىرىنشىدەن، مەملەكەتتىك تىلدە سويلەۋ - قازاقستان ازاماتتارىنىڭ مىندەتى. ەكىنشىدەن، قازاق حالقىنىڭ تاريحى مەن سالت- ءداستۇرىن، ادەبيەتى مەن مادەنيەتىن جەتە بىلۋىمە جول اشتى. ۇشىنشىدەن، زاڭ مەن ادىلەتتىلىكتىڭ ۇستەمدىگىن قامتاماسىز ەتەتىن ماماندىقتى تاڭداعاندىقتان، مەملەكەتتىك ءتىلدى ەركىن مەڭگەرۋدى پارىزىم سانادىم. قازاقشا سويلەگەنىمدى ماقتان ەتەمىن، - دەيدى يۋليا اندرەيەۆنا.

مەكتەپ بىتىرەر كەزدە تەرگەۋشى بولۋدى ماقسات ەتكەن. ءسويتىپ، ىشكى ىستەر اكادەمياسىنىنا وقۋعا تۇسكەن.

- تەرگەۋشى بولۋدىڭ وزىندىك قيىندىعى بار. اسىرەسە، وسى ماماندىقتى تاڭداعان ايەلدەرگە وڭاي ەمەس. ويتكەنى، ءار ءىستىڭ استارىنا تەرەڭ ءۇڭىلىپ، كۇدىكتىگە تاعىلعان ايىپتى بۇلتارتپايتىن دالەل كەرەك. سول سەبەپتەن، ءار ىسكە جاۋاپكەرشىلىكپەن قارايمىن. كۇدىكتىلەرمەن، جابىرلەنۋشىلەر جانە كۋاگەرلەرمەن ءجيى كەزدەسىپ، ولاردىڭ جاۋاپتارىن زەردەلەيمىن. كۇدىكتىنىڭ كىناسىن دالەلدەۋگە سەپ بولاتىن ايعاق زاتتاردى ەكى شۇقىپ، ءبىر قارايمىن. ءبىر ءىستى تەرگەۋدى بىتىرۋگە جاقىنداعاندا، تاعى ءىستى تەرگەۋگە تۋرا كەلەدى. مۇنىڭ بارىنە توزىمدىلىك، كاسىبي شەبەرلىك قاجەت، - دەيدى يۋليا كۋزنەتسوۆا.

ونىڭ ايتۋىنا قاراعاندا، تەرگەۋگە العان ءىستى جەڭىل، نە اۋىر دەپ بولمەۋ كەرەك. ويتكەنى ءار ءىستىڭ ارتىندا ادام تاعدىرى بار.

- كۇندەلىكتى جۇمىسىم كۇدىكتىدەن جاۋاپ الۋدان باستالادى. كەيدە وقيعا ورنىنا قايتا بارۋعا تۋرا كەلەدى. قىلمىستىق ىستەردى زاڭ اياسىندا تەرگەۋ ءۇشىن كۋاگەرلەرمەن، جابىرلەنۋشىلەرمەن سويلەسەمىن. تەرگەۋ جۇرگىزۋ كەزىندە ورىسشا جەتىك سويلەي المايتىندار كەزدەسەدى. سونداي ساتتە كۇدىكتىلەرمەن، جابىرلەنۋشىلەر جانە كۋاگەرلەرمەن قازاقشا سويلەسەمىن. قازاقشا سويلەگەنىم، ولاردىڭ اشىلا سويلەۋىنە جول اشادى. مىنە، مەملەكەتتىك ءتىلدى جەتىك مەڭگەرگەنىمنىڭ جەمىسىن وسىلاي كورىپ ءجۇرمىن، - دەيدى تەرگەۋشى.

تەرگەۋشىنىڭ پىكىرىنشە، قىلمىستىق ءىستى ساپالى تەرگەۋ ءۇشىن تىڭداي ءبىلۋ كەرەك. بۇل كۇدىكتىنىڭ ايىبىن زاڭ اياسىندا دالەلدەپ، سالماقتى شەشىم قابىلداۋعا سەپتىگىن تيگىزەدى.

- وسى ماماندىقتى تاڭداعان سوڭ ءتوزىمدى بولۋعا تىرىسامىن. تەرگەۋشىنىڭ شەبەرلىگىنە قوسا ىشكى مادەنيەتى دە، رۋحى دا مىقتى بولۋى قاجەت. كەيبىر كۇدىكتىنىڭ دە، جابىرلەنۋشىنىڭ دە كۇيزەلىسكە تۇسكەنىن بايقايمىن. سونداي كەزدە زاڭ اياسىندا حاتتاما تولتىرۋمەن شەكتەلمەي، قولداۋ كورسەتۋدىڭ دە ماڭىزى زور. وسىندايدا قازاق ءتىلىنىڭ جىلۋى مەن مەيىرىمى ەرەكشە ءرول اتقارادى، - دەيدى يۋليا كۋزنەتسوۆا.

ول جۇمىستان بوس ۋاقىتىن ءماندى وتكىزۋگە تىرىسادى. سپورتپەن شۇعىلدانادى. ءان سالعاندى، بيلەگەندى جانى سۇيەدى.

- تەرگەۋشىگە ءبىلىمىن، شەبەرلىگىن ۇدايى جەتىلدىرۋ قاجەت. الداعى ماقساتىم - ىشكى ىستەر اكادەمياسىنىڭ ماگيستراتۋراسىندا، كەيىن دوكتورانتۋراسىندا وقۋ. جاس تەرگەۋشىلەرگە تاجىريبەمدى بولىسەتىندەي ءدارىس وقىعىم كەلەدى. ەڭ باستىسى - جاستاردىڭ مەملەكەتتىك تىلدە سويلەۋىنە ىقپال ەتسەم دەيمىن. جاستاردىڭ قازاقشا سويلەۋدەن ۇيالماعانىن، ەلدىڭ دامۋىنا ۇلەس قوساتىن بەلسەندى، وتانىن سۇيەتىن پاتريوت بولعانىن قالايمىن، - دەيدى ول.

ەسكە سالا كەتەلىك، بۇدان بۇرىن سۋدان ءتورت بالانى امان الىپ شىققان قوستانايلىق ناگراداعا يە بولعانى حابارلانعان ەدى.

اۆتور

جولداسبەك شوپەعۇل