مەملەكەتتىك قىزمەتتەردى الۋدا بيۋروكراتيا فاكتىلەرى ءالى دە بار

استانا. KAZINFORM - وتكەن جىلى مەملەكەتتىك قىزمەت ىستەرى اگەنتتىگى ازاماتتاردان تۇسكەن 910 ءوتىنىشتى قاراپ، 350-دەن استام قىزمەت الۋشىنىڭ قۇقىعىن قالپىنا كەلتىردى.

«مەملەكەتتىك قىزمەتتەردى الۋ كەزىندە بيۋروكراتيا فاكتىلەرى ءالى دە بار. 2023 -جىلى اگەنتتىكپەن 910 ءوتىنىشتى قاراۋ ناتيجەسىندە 350-دەن استام قىزمەت الۋشىنىڭ قۇقىعى قالپىنا كەلتىرىلدى. بۇل كورسەتكىش 2022 -جىلمەن سالىستىرعاندا %80,4 - عا ارتىق. ازاماتتاردىڭ ونىڭ ىشىندە كاسىپكەرلەر سۋبەكتىلەرىنىڭ قۇقىعىن قورعاۋ كوبىنە جەر قاتىناستارى، ساۋلەت، دەنساۋلىق ساقتاۋ جانە حالىقتى الەۋمەتتىك قورعاۋ، سونداي- اق مەنشىك قۇقىعى سالالارىنا تيەسىلى»، - دەدى مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى سالاۋات مۇكسىموۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

اگەنتتىك دەرەگىنە سۇيەنسەك، كاسىپكەرلەرگە 1,1 ميلليارد تەڭگە سۋبسيديا قايتارىلدى. ودان بولەك، 100-دەن استام قىزمەت الۋشىنىڭ مەملەكەتتىك اكتىلەرىن اۋىستىرۋعا بيۋدجەت قاراجاتى ءبولىندى جانە 60-تان استام ازاماتقا جەر تەلىمدەرى بەرىلدى.

اۆتور

داۋلەت ىزتىلەۋ