مەملەكەتتىك كۇزەت قىزمەتىنىڭ قاتارى جاس ساربازدارمەن تولىقتى
استانا. KAZINFORM - بۇگىن مەملەكەتتىك كۇزەت قىزمەتى ايرىقشا ماقساتتاعى كۇشتەرىنىڭ اسكەري بولىمدەرىندە 2024-جىلعى كۇزگى شاقىرىلىم بويىنشا مەرزىمدى اسكەري قىزمەت ساربازدارىنىڭ اسكەري انت قابىلداۋ ءراسىمى بولدى.
«ايبىن» پرەزيدەنتتىك پولكى اسكەري قىزمەتشىلەرىنىڭ اسكەري انت قابىلداۋ ءراسىمى استانا قالاسىنداعى «وتان قورعاۋشىلار» مونۋمەنتى جانىنداعى الاڭدا، ال «باتىر» پرەزيدەنتتىك پولكى ساربازدارىنىڭ وسىنداي سالتاناتى ءراسىمى الماتى قالاسىنداعى 28 گۆاردياشى-پانفيلوۆشىلار ساياباعىندا ءوتتى. اسكەري انت قابىلداۋ سالتاناتىنا جاس ساربازداردىڭ اتا-انالارى مەن جاقىندارى قاتىستى.
«بارلىعىمىز ءۇشىن ماڭىزدى وقيعا - ساربازداردىڭ انت قابىلداۋ راسىمىنە كۋا بولدىق. جاس جاۋىنگەرلەر «وتانىمدى قورعايمىن» دەپ جاۋاپكەرشىلىك الدى. بۇل قاسيەتتى بورىش ءار ازاماتتىڭ پارىزى. بيىل حالىق قاھارمانى ساعادات نۇرماعامبەتوۆتىڭ جانە رەيحستاگقا العاش تۋ تىككەن راقىمجان قوشقاربايەۆتىڭ تۋعانىنا 100 جىل تولدى. سىزدەر وسى باتىر اتالارىمىزدىڭ جولىن ابىرويمەن جالعايدى دەپ سەنەمىن. ءبىزدىڭ قاتارىمىزدا سىزدەر اسكەري ءىستىڭ قىر-سىرىن ۇيرەنەسىزدەر ءارى ۇلكەن ءومىر مەكتەبىنەن وتەسىزدەر. جاۋىنگەرلىك جولدا ءبىر-بىرىڭىزگە سەرىك، تىرەك بولىڭىزدار! انتىڭا ادال بول، جاس سارباز!»، - دەدى ەلوردادا وتكەن ءراسىم بارىسىندا مەملەكەتتىك كۇزەت قىزمەتى باستىعىنىڭ ورىنباسارى - ايرىقشا ماقساتتاعى كۇشتەردىڭ قولباسشىسى، گەنەرال-مايور ايتقۇرمان وماربەكوۆ.
مەملەكەتتىك كۇزەتى قىزمەت قاتارىنداعى 2024-جىلعى كۇزگى شاقىرىلىم بويىنشا مەرزىمدى اسكەري قىزمەت ساربازدارى ەلىمىزدىڭ بارلىق ايماعى مەن رەسپۋبليكالىق ماڭىزى بار قالالارىنان ىرىكتەلىپ الىنعان. ولار اسكەري بولىمدەردىڭ دالالىق وقۋ ورتالىقتارىندا جاڭا شاقىرىلىم ساربازدارىن دايىنداۋ كۋرسىنان ءوتتى.
اسكەري انت قابىلداۋ سالتاناتى - ەرەكشە جاۋىنگەرلىك راسىمدەردىڭ ءبىرى. انت قابىلداۋ ارقىلى ساربازدار وزدەرىنە وتاندى قورعاۋعا ءازىر بولۋعا، اسكەري قىزمەت مىندەتتەرىن ادال اتقارۋعا جاۋاپكەرشىلىك الادى.
«وتان انانى قورعاۋ ەڭ اسقاق پارىز، ابىرويلى مىندەت ەكەندىگىن بىلە وتىرىپ، بۇگىن ءبىز - جاس ساربازدار سالتاناتتى تۇردە انت قابىلدادىق. انت قابىلداۋ وتانىنا، حالقىنا ادال بولۋ، ەل باسىنا كۇن تۋسا، ونى اقتىق دەمى قالعانشا قورعاۋ، قاجەت بولسا جانىن قيۋ دەپ بىلەمىن. وسىلايشا، ءبىز ۇلانعايىر جەرىمىزدى „اق بىلەكتىڭ كۇشىمەن، اق نايزانىڭ ۇشىمەن“ قورعاعان جاۋجۇرەك اتا- بابالارىمىزدىڭ ەرلىك جولىن جالعاستىرۋعا، ەل قورعانى بولۋعا سەنىم ارقالاعان ازاماتقا اينالدىق»، - دەدى انت قابىلداعان جاس سارباز اسقار سەرىك.
م ك ق اسكەري بولىمدەرىندە مەرزىمدى قىزمەت اتقارۋ بارىسىندا جاس ساربازدار تاجىريبەلى نۇسقاۋشىلىق قۇرامنىڭ جەتەكشىلىگىمەن اسكەري ىسكە ۇيرەنەدى، جاۋىنگەرلىك جانە ارنايى دايارلىق ساباقتارىندا اسكەري ماماندىقتاردى مەڭگەرەدى.
اسكەري انت قابىلداعان سوڭ مەرزىمدى قىزمەت ساربازدارى م ك ق ايرىقشا ماقساتتاعى كۇشتەرى اتقاراتىن قازاقستان رەسپۋبليكاسىنىڭ مەملەكەتتىك تۋى مەن مەملەكەتتىك ەلتاڭباسى ەتالوندارىن كۇزەتۋ، مەملەكەت باسشىسىنىڭ قاتىسۋىمەن وتەتىن پروتوكولدىق ءىس-شارالارعا قاتىسۋ، كۇزەتىلەتىن تۇلعالار مەن وبەكتىلەردىڭ قاۋىپسىزدىگىن قامتاماسىز ەتۋ سەكىلدى مىندەتتەردى ورىنداۋعا كىرىسەدى.
مەملەكەتتىك كۇزەت قىزمەتى ايرىقشا ماقساتتاعى كۇشتەرىنىڭ مەرزىمدى اسكەري قىزمەت ساربازدارى قاتارىنا ەلىمىزدىڭ 18 بەن 27 جاس ارالىعىنداعى، بويى 180 س م- دەن جوعارى جانە 195 س م- دەن اسپايتىن، ءبىلىمى ورتا بىلىمنەن تومەن ەمەس، دەنساۋلىعى جاقسى كەز كەلگەن ازاماتى قوسىلا الادى. جوعارى ءبىلىمدى، سپورتتىق جەتىستىكتەرى مەن رازريادتارى بار ۇمىتكەرلەرگە باسىمدىق بەرىلەدى.
مەرزىمدى اسكەري قىزمەتتى قر مەملەكەتتىك كۇزەت قىزمەتى قاتارىندا اتقارۋ جاس ازاماتتار ءۇشىن مىقتى ەرلىك مەكتەبى بولادى. ولار مۇندا ءوزىنىڭ ومىرلىك جولىنا قاجەتتى ماڭىزدى داعدىلارعا ۇيرەنەدى. جاستار ءۇشىن بۇل كەزەڭ ارى قارايعى مانساپ جولىن جالعاستىرۋعا نەگىز، الەۋمەتتىك ليفت بولۋى مۇمكىن. مەرزىمدى اسكەري قىزمەتتى اياقتاعاندار قالاۋى بويىنشا قىزمەتتى كەلىسىمشارت نەگىزىندە جالعاستىرا الادى. ودان ءارى ولاردىڭ ارناۋلى مەملەكەتتىك ورگاننىڭ قىزمەتكەرى جانە وفيتسەرى بولىپ، كۇزەتىلەتىن تۇلعالار مەن وبەكتىلەردىڭ قاۋىپسىزدىگىن قامتاماسىز ەتۋ بويىنشا مىندەتتەردى اتقارۋ مۇمكىندىگى بار.
سونىمەن قاتار م ك ق مەرزىمدى قىزمەت ساربازدارى ءۇشىن مەرزىمدى اسكەري قىزمەت اتقارعان ازاماتتاردى الەۋمەتتىك قولداۋ بويىنشا قازاقستان رەسپۋبليكاسىندا بەلگىلەنگەن بارلىق جەڭىلدىكتەر قولدانىلادى.
