مەملەكەتتىك كىرىستەر كوميتەتى بىرنەشە اقپاراتتىق جۇيەنى ىسكە قوستى
استانا. KAZINFORM - قارجى مينيسترلىگىنىڭ مەملەكەتتىك كىرىستەر كوميتەتى بىرنەشە اقپاراتتىق جۇيەنى ىسكە قوستى. بۇل تۋرالى اتالعان كوميتەت ءتوراعاسىنىڭ ورىنباسارى ءانۋار سۇلەيمەنوۆ ايتتى.
ونىڭ ايتۋىنشا، سالىقتىق اكىمشىلەندىرۋدىڭ ينتەگراتسيالانعان جۇيەسىن، Smart Data Finance جانە استانا-1 كەدەن جۇيەسىن ىسكە قوسۋداعى ماقساتى - سالىقتىق جانە كەدەندىك اكىمشىلەندىرۋدىڭ اشىقتىعىن، ىڭعايلىلىعى مەن تيىمدىلىگىن ارتتىرۋ، سونداي- اق بيزنەس پەن ازاماتتار ءۇشىن اكىمشىلىك جۇكتەمەنى ازايتۋ. ولاردىڭ ىشىندەگى ماڭىزدىلارىنىڭ ءبىرى سالىقتاردى اۆتوماتتاندىرىلعان ەسەپتەۋگە ارنالعان ۇلكەن مالىمەتتەر بازاسى - Smart Data Finance.
SDF- تە 1,9 ميلليون جەكە كاسىپكەر، 584 مىڭ زاڭدى تۇلعا جانە 20,4 ميلليون جەكە تۇلعا تۋرالى مالىمەتتەر بار. مۇندا سالىق تولەۋشىنىڭ ساندىق پروفيلى قالىپتاسادى: مۇلىك، جۇمىس ورنى، سالىق تولەۋ، ااك الۋشىنىڭ مارتەبەسى تۋرالى اقپارات. زاڭدى تۇلعالاردا قوسىمشا ەڭبەكاقى تولەۋ قورى، قىزمەتكەرلەر سانى، سالىق ەسەپتىلىگىنىڭ جانە ەلەكتروندىق شوت-فاكتۋرالاردىڭ تاريحى تىركەلەدى.
- سالىقتىق اكىمشىلەندىرۋدىڭ ينتەگراتسيالانعان جۇيەسى ەسكىرگەن 7 شەشىمدى ءبىرىڭعاي پلاتفورماعا بىرىكتىرىپ، كاسىپكەرلەردى تىركەۋدەن باستاپ كومپانيا جابىلعانعا دەيىن تولىق سالىقتىق قولداۋدى، سونىڭ ىشىندە دەربەس شوتتاردى جۇرگىزۋدى، ەسەپتىلىكتى قابىلداۋدى، سالىق ورگاندارىنىڭ باقىلاۋ شارالارىن جانە مەملەكەتتىك قىزمەتتەردى قامتاماسىز ەتتى. اتاپ ايتقاندا، سالىقتىق اكىمشىلەندىرۋدىڭ ينتەگراتسيالانعان جۇيەسى 13 ميلليون پايدالانۋشى ءۇشىن جۇيەنىڭ قولجەتىمدىلىگىنىڭ جوعارى دەڭگەيىن قامتاماسىز ەتەدى. سالىق تولەۋشىلەردىڭ جاڭا كابينەتىندە ءبىر مەزگىلدە 100 مىڭنان 250 مىڭ پايدالانۋشىعا دەيىن جۇمىس ىستەۋ مۇمكىندىگى ۇلعايتىلدى. قۇجاتتاردى وڭدەۋ ۋاقىتى ءبىر ساعاتتان 1 مينۋتقا دەيىن قىسقاردى، - دەدى ول.
ءانۋار سۇلەيمەنوۆتىڭ اتاپ وتۋىنشە، استانا-1 جۇيەسى كەدەندىك پروتسەستەردى اۆتوماتتاندىرادى. سىرتقى ەكونوميكالىق قىزمەتكە قاتىسۋشىلاردىڭ قاشىقتىقتان ءوزارا ءىس-قيمىلىن ەنگىزەدى جانە جاساندى ينتەللەكت ەلەمەنتتەرىن پايدالانادى. ينتەللەكتۋالدى ىزدەۋ جۇزەگە اسىرىلىپ، مالىمەتتەردى تولتىرۋ كەڭەستەرمەن بىرگە جۇرەدى.
بۇعان دەيىن قازاقستاندا جاڭا سالىق كودەكسى اياسىندا سيفرلىق اكتيۆتەردى رەتتەۋگە باعىتتالعان بىرنەشە نورماتيۆتىك قۇقىقتىق اكت (ن ق ا) ازىرلەنىپ جاتقانىن جازعان ەدىك.
