مەملەكەتتىك كەڭەسشى قازاقستان- رەسەي مەديا فورۋمىنا قاتىستى

استانا. KAZINFORM - ماسكەۋ قالاسىندا رەسەيدىڭ تاسس اقپارات اگەنتتىگىنىڭ قۇرىلعانىنا 120 جىل تولۋىنا وراي «رەسەي- قازاقستان: ب ا ق- تىڭ ءوزارا ارەكەتتەسۋىنىڭ وزەكتى ماسەلەلەرى» اتتى مەديا فورۋمى ءوتتى، دەپ حابارلايدى اقوردانىڭ باسپا ءسوز قىزمەتى.

ءىس- شاراعا مەملەكەتتىك كەڭەسشى ەرلان قارين، پارلامەنت ءماجىلىسى ءتوراعاسىنىڭ ورىنباسارى دانيا ەسپايەۆا، قازاقستاننىڭ رەسەيدەگى توتەنشە جانە وكىلەتتى ەلشىسى داۋرەن ابايەۆ، سىرتقى ىستەر ءمينيسترىنىڭ ورىنباسارى رومان ۆاسيلەنكو، پرەزيدەنت تەلەراديوكەشەنىنىڭ باس ديرەكتورى راۋشان قاجىبايەۆا جانە ەلىمىزدىڭ ءىرى مەدياحولدينگتەرى مەن باق جەتەكشىلەرى ارنايى باردى.

فورۋمعا ر ف پرەزيدەنتى اكىمشىلىگى باسشىسىنىڭ ورىنباسارى، رەسەي پرەزيدەنتىنىڭ باسپاءسوز حاتشىسى دميتري پەسكوۆ، ر ف سيفرلىق دامۋ، بايلانىس جانە بۇقارالىق كوممۋنيكاتسيالار ءمينيسترىنىڭ ورىنباسارى بەللا چەركەسوۆا، تاسس اقپارات اگەنتتىگىنىڭ باس ديرەكتورى اندرەي كوندراشوۆ، تاسس اقپارات اگەنتتىگى باسشىسىنىڭ ءبىرىنشى ورىنباسارى ميحايل گۋسمان، «رەسەيدىڭ قوعامدىق تەلەۆيدەنيەسى» ا ك ە ۇ باس ديرەكتورى ۆيتالي يگناتەنكو، «ۆەچەرنيايا موسكۆا» گازەتىنىڭ باس رەداكتورى الەكساندر كۋپريانوۆ جانە رەسەيدىڭ باسقا دا ءىرى بۇقارالىق اقپارات قۇرالدارىنىڭ جەتەكشىلەرى مەن وكىلدەرى قاتىستى.

ەرلان قارين ءوز سوزىندە تاسس اقپارات اگەنتتىگىن مەرەيتويىمەن قۇتتىقتاپ، اتالعان ب ا ق- تىڭ الەمدەگى بەدەلى، ونىڭ ۇجىمى مەن باسشىلىعىنىڭ كاسىبي بىلىكتىلىگى جوعارى ەكەنىن اتاپ ءوتتى.

مەملەكەتتىك كەڭەسشىنىڭ ايتۋىنشا، وسى مەديا فورۋم - قازاقستان مەن رەسەي اراسىنداعى دوستىق، وداقتاستىق پەيىلدەگى قارىم-قاتىناستىڭ قارقىندى دامىپ كەلە جاتقانىنىڭ ايقىن دالەلى.

سونداي-اق ەرلان قارين ەكى ەل اراسىنداعى ىنتىماقتاستىقتى نىعايتۋعا ۇلەس قوسقانى ءۇشىن تاسس اقپارات اگەنتتىگىنىڭ باس ديرەكتورى اندرەي كوندراشوۆقا قازاقستان پرەزيدەنتى قاسىم-جومارت توقايەۆتىڭ تاپسىرماسىمەن Ⅱ دارەجەلى «دوستىق» وردەنىن تابىس ەتتى.

باسقوسۋدا تاراپتار بۇقارالىق اقپارات قۇرالدارى اراسىندا بىرلەسكەن مەديا جوبالاردى جۇزەگە اسىرۋ جوسپارىن تالقىلاپ، سالانى دامىتۋعا، وعان سيفرلى تەحنولوگيالاردى ەنگىزۋگە جانە باسقا دا وزەكتى ماسەلەلەرگە قاتىستى پىكىر الماستى.

بۇعان دەيىن حابارلاعانىمىزداي، مەملەكەتتىك كەڭەسشى ەرلان قارين ساياسيلاندىرۋعا بولمايتىن، ەموتسياسىز، سالماقتى پىكىرالماسۋ قاجەت تاقىرىپتاردى اتادى.

اۆتور
اينۇر تۋماكبايەۆا