مەملەكەتتىك كەڭەسشى حالىقارالىق ءپان وليمپيادالارى جۇلدەگەرلەرىن قۇتتىقتادى
استانا. KAZINFORM - ەرلان قارين پرەزيدەنت تاپسىرماسىنا سايكەس حالىقارالىق ءپان وليمپيادالارىنىڭ جەڭىمپازدارى مەن جۇلدەگەرلەرىن قابىلدادى، دەپ حابارلايدى اقوردانىڭ باسپا ءسوز قىزمەتى.
مەملەكەتتىك كەڭەسشى كەزدەسۋدە قازاقستاندىق وقۋشىلاردىڭ جىل سايىن كوپتەگەن حالىقارالىق ءبىلىم دوداسىندا توپ جارىپ جۇرگەنىن اتاپ ءوتتى. بيىل ورەندەرىمىز الەمنىڭ ءتۇرلى ەلىندە وتكەن پاندىك وليمپيادالاردا 26 مەدال يەلەنىپ، ەل ابىرويىن اسقاقتاتتى.
سونداي-اق مەملەكەتتىك كەڭەسشى پرەزيدەنتتىڭ جاقىندا وتكەن دەپۋتاتتار فورۋمىندا سويلەگەن سوزىندە جۇرتشىلىقتى سپورتشىلارعا عانا ەمەس، زياتكەرلىك سايىستاردىڭ جەڭىمپازدارىنا دا لايىقتى قۇرمەت كورسەتۋگە شاقىرعانىن ەسكە سالدى. ونىڭ ايتۋىنشا، 2022-جىلدان باستاپ مەملەكەت باسشىسىنىڭ باستاماسىمەن حالىقارالىق ءپان وليمپيادالارىنىڭ جەڭىمپازدارىنا جانە ولاردىڭ ۇستازدارىنا اقشالاي سىيلىق تابىستالادى. بۇل رەتتە قازاقستان - ءبىلىم وليمپياداسى جۇلدەگەرلەرىنە وسىنداي قولداۋ كورسەتەتىن ساناۋلى ەلدىڭ ءبىرى.
مەملەكەتتىك كەڭەسشى قازاقستاندا جاستارعا ءوزىن جان-جاقتى جەتىلدىرۋگە بارلىق جاعداي جاسالعانىنا، اسىرەسە، وسكەلەڭ ۇرپاق ءۇشىن ءبىلىم مەن عىلىم سالاسىندا مول مۇمكىندىك بار ەكەنىنە نازار اۋداردى.
ۇلتتىق قۇرىلتاي وتىرىستارىنىڭ بىرىندە مەملەكەت باسشىسى ءبىلىم، عىلىم جانە مادەنيەت سالاسىن رۋحاني دامۋدىڭ مىزعىماس ءۇشتاعانى جانە ۇلتتىڭ جاڭا ساپاسىن قالىپتاستىرۋدىڭ نەگىزى دەپ ايتقان بولاتىن.
كەزدەسۋ سوڭىندا ەرلان قارين وليمپيادا جەڭىمپازدارىنا جىلى لەبىزىن ءبىلدىردى. ولاردىڭ قاجىرلى ەڭبەك، جاسامپازدىق پەن جاڭاشىلدىق ارقىلى ەل جاستارىنا ۇلگى-ونەگە كورسەتىپ جۇرگەنىن اتاپ ءوتتى.
