مەملەكەتتىڭ ساتىپ الۋ جۇيەسىن سيفرلىق تەڭگەگە كوشىرەمىز - تيمۋر سۇلەيمەنوۆ
استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ كەزەكتى باسپا ءسوز ءماسليحاتىندا مەملەكەتتىڭ ساتىپ الۋ جۇيەسىندەگى جەمقورلىققا سيفرلىق تەڭگە ارقىلى توسقاۋىل قويۋ جوسپارى بار ەكەنىن ءمالىم ەتتى.
«ءبىز سيفرلىق تەڭگە بويىنشا ۇلتتىق قوردان الىنعان ترانسفەرتپەن قاناتقاقتى جوبانى باستادىق. «دوستىق-مويىنتى» تەمىرجول جوباسىنا بولىنگەن قاراجاتتى smart-كەلىسىمشارت بازاسىندا قاعاز اقشامەن ەمەس، سيفرلىق تەڭگەمەن اۋداردىق. قازىر بۇل جۇمىس ىستەپ تۇر. وسىنداي جۇمىستى اۋىل شارۋاشىلىعى مينيسترلىگىمەن دە جۇرگىزىپ جاتىرمىز. «اۋىل اماناتى» باعدارلاماسى بويىنشا بولىنگەن سۋبسيديا قاعاز اقشا كۇيىندە ەمەس، سيفرلىق تەڭگە كۇيىندە تۇسەدى دەپ وتىرمىز. بۇل سۋبسيديانى كىم العانىن، قالاي جۇمساپ جاتقانىن، وتىنىمگە ساي جۇمساپ جاتىر ما، الدە الداپ كەتتى مە، ءبارىن كورۋگە بولادى. ونەركاسىپ سۋبسيديالارىمەن دە سونداي جۇمىس ىستەلىپ جاتىر. مەملەكەتتىك ساتىپ الۋعا دا وسى تاجىريبەنى تاراتامىز»، - دەدى ول جۋرناليست سۇراعىنا بەرگەن جاۋابىندا.
ۇلتتىق بانك باسشىسى قاناتقاقتى جوبا ءساتتى ىسكە اسسا، سيفرلىق تەڭگەنىڭ قولدانىس اياسى كەڭەيە تۇسەتىنىن ايتادى.
«بۇل جەردە قارجى مينيسترلىگىمەن جانە سىبايلاس جەمقورلىققا قارسى ءىس-قيمىل اگەنتتىگىمەن جاقسى ينتەگراتسيامىز بار. جالپى بۇل جوبا ءساتتى شىقسا، مەملەكەتتىك ساتىپ الۋ، قۇرىلىس سياقتى سالالاردى اشىق ەتۋدەگى اسا ماڭىزدى كەزەڭ بولاتىن ءتۇرى بار. سونىڭ ارقاسىندا بۇل اقشانى دۇرىس ەمەس جولمەن جۇمساعىسى كەلەتىندەردىڭ سانى ازايادى دەپ ۇمىتتەنەمىن. بىلتىر قاراشا ايىندا سيفرلىق تەڭگەنىڭ قولدانىسقا ەنىپ باستاعانىن جاريالادىق قوي، قارجىگەرلەر كۇنىندە وسى جوبانىڭ العاشقى قورىتىندىسىن جاريا ەتەمىز. ساراپشىلارعا دا، بارشا جۇرتقا قىزىق بولادى دەپ ويلايمىن»، - دەدى تيمۋر سۇلەيمەنوۆ.
