مەملەكەتكە قايتارىلعان 23 كەن ورنى اۋكسيونعا شىعارىلادى
استانا. KAZINFORM - بيىل جازدا وتاندىق 100 دەن استام كەن ورنى اۋكسيونعا شىعارىلماق. بۇل تۋرالى ونەركاسىپ جانە قۇرىلىس مينيسترلىگى گەولوگيا كوميتەتىنىڭ ءتوراعاسى ەرلان اقباروۆ ءمالىم ەتتى.
«وتكەن جىلى 74 جەر قويناۋى ۋچاسكەسى بويىنشا 2 اۋكسيون وتكىزىلدى، ناتيجەسىندە قول قويۋ بونۋسى شامامەن 3,5 ميلليارد تەڭگەنى قۇرادى. بيىل 30-ماۋسىمعا دەيىن قايتارىلعان 23 جانە رەزەرۆتەگى 83 كەن ورنىن اۋكسيونعا شىعارۋ جوسپارلانىپ وتىر. اۋكسيوندار ەل اۋماعىندا ءوندىرىستى ورتاشادان تومەن ەمەس دەڭگەيدە ىسكە قوسۋ جانە تولەمدەردى وڭىرلەردىڭ الەۋمەتتىك دامۋ باعىتىنا اۋدارۋ مىندەتتەمەلەرى نەگىزىندە وتكىزىلەدى»، - دەدى ەرلان اقباروۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق، كوميتەت باسشىسى پرەزيدەنت 2026-جىلعا قاراي ەلىمىزدىڭ زەرتتەلگەن اۋماعىن 2,2 ميلليون شارشى شاقىرىمعا جەتكىزۋدى تاپسىرعانىن تىلگە تيەك ەتتى.
بۇعان دەيىن قازاقستاندا گەولوگيالىق زەرتتەۋلەرگە جىلىنا قانشا قارجى بولىنەتىنى تۋرالى حابارلاعان ەدىك.
ايتا كەتەيىك، استانادا زاماناۋي گەولوگيالىق قور قويماسى سالىنباق.
