مەملەكەت قانداي فيلمدەردى قارجىلاندىرادى

استانا. KAZINFORM - ەندى ەلىمىزدە پروكاتقا شىعاتىن فيلمدەر قاتاڭ باقىلانباق. بىلتىر ق ر مادەنيەت جانە اقپارات مينيسترلىگى فيلمدى ۇلتتىق دەپ تانۋ جانە ۇلتتىق فيلم كۋالىگىن بەرۋ قاعيدالارىنا ءبىرشاما وزگەرىس ەنگىزگەن ەدى.

مينيسترلىك ماماندارى «كينەماتوگرافيا تۋرالى» زاڭىنىڭ تالاپتارىن قايتا قاراۋدى جوسپارلاپ وتىرعاندارىن ايتادى. ۇلتتىق كينونى قولداۋ ورتالىعى باسقارما ءتوراعاسىنىڭ ورىنباسارى Kazinform تىلشىسىنە بەرگەن سۇحباتىندا ۇلتتىق جوبالاردىڭ قالاي ىرىكتەلەتىنىن ءتۇسىندىردى.

- بىلتىر ەنگىزىلگەن ەرەجەلەردى كينو سالاسىنداعى ماماندارمەن بىرلەسە وتىرىپ جاساعان ەدىك. ەڭ ءبىرىنشى مينيسترلىك تاقىرىپتىق جوسپارلاردى بەكىتەدى. سوعان ساي سسەناري جازۋعا 60 كۇن ۋاقىت بەرىلەدى. 1-كەزەك - بۇل سسەناريلەردى ىرىكتەۋ كەزەڭى. ول ءۇشىن ۇلتتىق كينونى قولداۋ ورتالىعىنىڭ ساراپتاما كەڭەسى جاساقتالعان. ول جەردە ءوندىرىستىڭ باستاپقى ساتىسىنان باستاپ، پروكاتقا شىققانعا دەيىنگى سالادا جۇمىس ىستەيتىن ماماندار قامتىلعان.

ساراپتاما كەڭەسى 3 سەكسيادان تۇرادى: دەرەكتى فيلمدەر، كوركەم فيلم جانە انيماتسيالىق فيلمدەر. ءار سالانىڭ ماماندارى سسەناريدى وزدەرى ىرىكتەيدى. 2-كەزەڭگە وتكەن سسەناريلەردى ءتۇسىرىلىم توبى YouTube پلاتفورماسىنىڭ تىكەلەي ەفيرىندە اشىق تۇردە قورعاۋى كەرەك. ءوز جوبالارىنىڭ ماڭىزدىلىعىن ءتۇسىندىرىپ، ارتىقشىلىعىن ايتۋى ءتيىس. نە سەبەپتى مەملەكەتتىك قارجى الۋعا لايىق ەكەنىن دالەلدەۋ قاجەت. مادەنيەت جانە اقپارات مينيسترلىگىندە ۆەدومستۆوارالىق كوميسسيا بار. ونىڭ قۇرامىندا مادەنيەت جانە اقپارات، قارجى، س ءى م، ءبىلىم مينيسترلىكتەرى بار. ولار كەلەسى كەزەڭگە وتكەن فيلمدى يدەولوگيالىق تۇرعىدا تەكسەرەدى. ول سۇزگىدەن وتكەننەن كەيىن مينيسترلىك قاي فيلمدەردى قارجىلاندىرۋ كەرەكتىگى تۋرالى شەشىم شىعارادى. مىسالى، بىلتىر 500-گە جۋىق سسەناري ۇسىنىلسا، ونىڭ 18- ءى عانا وندىرىسكە جىبەرىلدى، - دەيدى ادىلەت وماروۆ.

ال بيىل 444 سسەناري ۇسىنىلىپتى. ءبىراق ونىڭ 128- ءى عانا كەلەسى كەزەڭگە وتكەن. جاۋاپتىلار جوبالاردىڭ قۇجاتىن تولىق تەكسەرىپ بىتكەن سوڭ لايىقتىلارىن اشىق قورعاۋعا ۇسىنباق. ال ۇلتتىق كينونى قولداۋ ورتالىعىنىڭ مامانى قازىرگى ۋاقىتتا قانداي ءىرى جوبالار اتقارىلىپ جاتقانىن جەتكىزدى.

- قازىرگى ۋاقىتتا تولىقمەتراجدى انيماتسيالىق «كوماندا ا» دەگەن جوبا وندىرىستە. بۇل جوبانىڭ ءوندىرىسىن ورتالىق ازيادا تانىمال KUBIQ دەگەن كومپانيا قولعا الىپ جاتىر. سونىمەن قاتار تولىقمەتراجدى «38» دەگەن كينوجوبا بار. بۇل - قازاقستانداعى ورمانشىلار تۋرالى تۇسىرىلەتىن العاشقى فيلم. وعان قوسا تانىمال رەجيسسەر دياس بەرتىستىڭ «كەنجەم قايدا؟» جوباسى بار. وسىنداي باسەكەلەستىك بار ورتادا ساپا جوعارى بولادى. سول سەبەپتى قازاقستانداعى كينو سالاسى الداعى ۋاقىتتا جوعارى دەڭگەيگە كوتەرىلەدى دەپ ەسەپتەيمىن، - دەيدى ول.

ماماندار ۇلتتىق جوبالاردى ىرىكتەگەن كەزدە ەڭ ءبىرىنشى يدەولوگياعا باسا ءمان بەرەتىندەرىن ايتادى. سونىمەن قاتار بۇرىن سوڭدى قوزعالماعان وزەكتى تاقىرىپتارعا ءمان بەرەدى. الايدا نارىقتى دا نازارعا الاتىندارىن جاسىرمادى.

- ءبىز نارىقتى، كورەرمەننىڭ سۇرانىسىن ۇنەمى باقىلاپ وتىرامىز. ءارتۇرلى جانرداعى فيلمدەردى ءتۇسىرىپ، ەكسپەريمەنتكە باراتىنىمىز دا سوندىقتان. ودان بولەك، جاس رەجيسسەرلەرگە سەنىم ارتىپ، دەبيۋتتىق جوبالاردى ءجيى جارىققا شىعارامىز. ساراپتاما كەڭەسى سسەناريلەردىڭ ءبارىن تولىقتاي قارايدى. ونىڭ ءار بولىگىنە ءمان بەرۋگە تىرىسادى. اكتەرلەردى تاڭداعاندا دا، ساۋندترەكىن دايىنداعاندا دا بارلىعىن نازارعا الۋعا جاعداي جاسايدى. قانداي اكتەر سۇرانىسقا يە نەمەسە قازىر قانداي ترەندتەر بار - بارىنە ءمان بەرىلەدى. ءبىراق، ارينە، بۇل كريتەرييلەردى بارلىق جوباعا قولدانا المايسىڭ. تاريحي جوبالارعا مۇنداي دۇنيەلەر اسەر ەتپەيدى، - دەيدى مامان.

جالپى مەملەكەت فيلمنىڭ وندىرىسىنە اقشا بولەدى. ءبىراق ونىڭ پروكاتى مەن ماركەتينگىنە قارجى قاراستىرىلماعان. سودان بولار، مينيسترلىكتىڭ تاپسىرىسىمەن تۇسىرىلەتىن ساپالى فيلمدەر كوپشىلىكتىڭ قۇلاعىنا جەتپەي قالىپ جاتادى. دەسە دە، كورەرمەندەردىڭ كوڭىلىنەن شىعىپ، جوعارى باعاسىن العان تۋىندىلار دا از ەمەس.

- قازىر كوبىسى فيلمدەردى كاسسامەن باعالايدى. ءبىراق مەن بۇل پىكىرمەن كەلىسپەيمىن. مىسالى، ءبىزدىڭ تاپسىرىسىمىزبەن تۇسىرىلگەن «اعايىندىلار» فيلمى 30 شاقتى كينوفەستيۆالدىڭ جۇلدەگەرى اتاندى. وتە ساپالى جاسالعان فيلم. ءبىز مۇنداي تۋىندىلار ارقىلى كورەرمەننىڭ كاسىبي فيلمدەرگە دەگەن تالعامىن ءوسىرىپ جاتىرمىز. «نابات وپەراتسياسى» دەگەن فيلمىمىز دە وتە جوعارى دەڭگەيدە تۇسىرىلگەن، - دەيدى ۇلتتىق كينونى قولداۋ ورتالىعى باسقارما ءتوراعاسىنىڭ ورىنباسارى.

باسقارما قىزمەتكەرى مەملەكەت تاپسىرىسىمەن جوبالاردى دايىندايتىن پروديۋسەرلەر دە فيلمنىڭ جارناماسىنا اتسالىسۋ كەرەكتىگىن ايتادى.

- پروكاتقا شىققان فيلمنىڭ كاسساسىنان كينوتەاترلار %50، ديستريبيۋتورلار %10 الادى. قالعان %40- دىڭ %20- ىن عانا ولار مەملەكەتكە قايتارادى. جالپى %80 پايدا ولاردا. سول سەبەپتى پروديۋسەر رەتىندە فيلمىنىڭ تانىلۋىنا ءوزى مۇددەلى بولۋى كەرەك قوي. سەبەبى، قالاماقىدان بولەك، كاسسادان تۇسكەن پايدانىڭ قانشاما بولىگىن وزىنە قالدىرۋعا مەملەكەت ونسىز دا مۇمكىندىك بەرىپ تۇر، - دەيدى ول.

ايتا كەتەيىك، بيىل جىل بويى ەلىمىزدىڭ شالعاي اۋىلدارىندا ساپالى فيلمدەر تەگىن كورسەتىلمەك.

اۆتور

ارۋجان ماحمۋت