مەملەكەت مەنشىگىنە قايتارىلعان جەردىڭ 3,7 ميلليون گەكتارى قايتا ءبولىندى
استانا. KAZINFORM - مەملەكەتكە قايتارىلعان اۋىل شارۋاشىلىعى جەر تەلىمدەرىن قايتا ءبولۋ تەك كونكۋرستىق نەگىزدە جۇزەگە اسىرىلادى.
«قازىر مەملەكەت مەنشىگىنە قايتارىلعان جەرلەردىڭ 3,7 ميلليون گەكتارى قايتا ءبولىندى. بۇل رەتتە، ءبىرىنشى كەزەكتە مەملەكەت مەنشىگىنە قايتارىلعان جايىلىمداردى ەلدى مەكەندەرگە بەكىتۋ جولىمەن جەكە اۋلاداعى مال باسىنا قاجەت سۇرانىسقا ءبولىنىپ جاتىر. جەر كودەكسىنە سايكەس، جەر ۋچاسكەلەرىن الۋعا قۇقىق بەرۋ جەرگىلىكتى اتقارۋشى ورگانداردىڭ قۇزىرەتىندە، ال ولاردىڭ ءادىل بەرىلۋىنە باقىلاۋدى جەر رەسۋرستارىن باسقارۋ كوميتەتىنىڭ اۋماقتىق بولىمشەلەرى جۇزەگە اسىرادى. 2022 -جىلعى 28-ساۋىردە مەملەكەت باسشىسىنىڭ تاپسىرماسى نەگىزىندە قۇرىلعان پايدالانىلماعان نەمەسە زاڭنامانى بۇزا وتىرىپ بەرىلگەن جەرلەردى قايتارۋ كوميسسياسى جۇمىس ىستەپ جاتىر. سونىمەن قاتار، قوعامدىق باقىلاۋ بولىگىندە «امانات» پارتياسىنىڭ جانىنان قۇرىلعان جەر اماناتى كوميسسياسى دا بار»، - دەلىنگەن اۋىل شارۋاشىلىعى مينيسترلىگىنىڭ Kazinform اگەنتتىگىنە بەرگەن جاۋابىندا.
ۆەدومستۆو مالىمەتىنە قاراعاندا، ماقسات بويىنشا پايدالانىلمايتىن اۋىل شارۋاشىلىعى جەرلەرىن ماجبۇرلەپ قايتارۋ ءراسىمى كەمىندە ەكى جىل ۋاقىت الادى. بۇدان باسقا، جەردى پايدالانۋ قاجەت ەكەنى تۋرالى نۇسقاما بەرىلگەننەن كەيىن، ولارعا بازالىق سالىق ستاۆكاسىن جيىرما ەسە ۇلعايتۋ قولدانىلادى. وسىعان بايلانىستى مەملەكەتتىك ينسپەكتوردىڭ اكتىسىن العاننان كەيىن، جەر پايدالانۋشى ۋچاسكەنى يگەرۋ بويىنشا ءوزىنىڭ مۇمكىندىكتەرىن ناقتى باعالاي وتىرىپ، ءوز ەركىمەن مەملەكەت مەنشىگىنە قايتارۋعا قۇقىلى.
«بۇل رەتتە، ارنايى جەر قورىنا كىرگەن بوس جەردى قايتا ءبولۋ تەك كونكۋرستىق نەگىزدە جۇزەگە اسىرىلادى. وسىعان بايلانىستى بۇرىنعى جەر پايدالانۋشىنىڭ جەر ۋچاسكەسىن قايتادان الۋ مۇمكىندىگى ەكىتالاي. سونىمەن قاتار، اۋىل شارۋاشىلىعى مينيسترلىگىنىڭ جەر رەسۋرستارىن باسقارۋ كوميتەتىنىڭ اۋماقتىق بولىمشەلەرى، جەرگىلىكتى اتقارۋشى ورگانداردىڭ قازاقستان رەسپۋبليكاسىنىڭ جەر زاڭناماسى سالاسىندا قابىلداعان شەشىمدەرىنىڭ زاڭدىلىعىنا مەملەكەتتىك باقىلاۋدى اتقارىپ جاتىر»، - دەپ اتالىپ وتكەن مينيسترلىك اقپاراتىندا.
ايتا كەتەيىك، 2022 -جىلدىڭ باسىنان بەرى پايدالانىلمايتىن 10 ميلليون گەكتار اۋىل شارۋاشىلىعى جەرى مەملەكەت مەنشىگىنە قايتارىلدى.
