مەملەكەت باسشىسى يتاليا پرەزيدەنتىنە قۇتتىقتاۋ جەدەلحاتىن جولدادى
استانا. KAZINFORM - قاسىم-جومارت توقايەۆ سەردجو ماتتارەللانى جانە يتاليا حالقىن وسى ەلدىڭ ۇلتتىق مەرەكەسى - رەسپۋبليكا كۇنىمەن قۇتتىقتادى.
- بۇگىندە يتاليا ساياسي- ەكونوميكالىق ىرگەسى بەرىك، حالقىنىڭ ءال-اۋقاتى جوعارى جانە جاھاندىق ساياساتتا بەدەلى بەكەم ءارى ىقپالدى مەملەكەت سانالادى. بۇل تۇرعىدا، ەلىڭىز بيىل «G7» دامىعان ەلدەر توبىندا بەلسەندى جەتەكشىلىك ەتىپ، جاھاندىق تۇراقتىلىق پەن قاۋىپسىزدىكتى ىلگەرىلەتۋگە قوماقتى ۇلەس قوسىپ وتىر. قازاقستان مەن يتاليا اراسىندا ورناعان ستراتەگيالىق ارىپتەستىكتىڭ ەرەكشە ماڭىزعا يە ەكەنىن اتاپ وتكىم كەلەدى. ىقپالداستىعىمىزدىڭ قارقىنىن نىعايتىپ، الەۋەتى مول سەرىكتەستىگىمىزدىڭ جاڭا قىرلارىن اشقان ريمگە رەسمي ساپارىمدى ىستىق ىقىلاسپەن ەسكە الامىن، - دەپ جازىلعان جەدەلحاتتا.
مەملەكەت باسشىسى ەكى ەل اراسىنداعى قول جەتكىزگەن ۋاعدالاستىقتاردى بەلسەندى ىسكە اسىرۋ ماقساتىندا بىرلەسە كۇش-جىگەر جۇمساۋعا دايىن ەكەنىن راستادى. سونداي-اق قاسىم-جومارت توقايەۆ سەردجو ماتتارەللانىڭ جاۋاپتى قىزمەتىنە تولاعاي تابىس، دوستاس يتاليا حالقىنا باق-بەرەكە تىلەدى.
اۆتور
اسحات رايقۇل
