مەملەكەت باسشىسى وزبەكستان پرەزيدەنتىنىڭ كومەكشىسى سايدا ميرزيەيەۆانى قابىلدادى
استانا. قازاقپارات - كەزدەسۋ بارىسىندا ەكى ەل اراسىنداعى كوپجاقتى سەرىكتەستىكتى ودان ءارى ىلگەرىلەتۋگە قاتىستى وزەكتى ماسەلەلەر تالقىلاندى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ قازاقستان مەن وزبەكستاننىڭ وداقتاستىق ءارى ستراتەگيالىق سيپاتتاعى قارىم-قاتىناسىن اتاپ ءوتىپ، جوعارى دەڭگەيدەگى ساياسي ديالوگتىڭ تيىمدىلىگىن ارتتىرا ءتۇسۋ ءۇشىن ەكى ەل پرەزيدەنتىنىڭ اكىمشىلىكتەرى اراسىنداعى تىعىز بايلانىستى جولعا قويۋ ماڭىزدى ەكەنىنە نازار اۋداردى.
كەزدەسۋدە اقپاراتتىق- يدەولوگيالىق، مادەني- گۋمانيتارلىق، ءبىلىم بەرۋ جانە جاستار ساياساتى سالالارىنداعى ءوزارا ءتيىمدى ىنتىماقتاستىقتى نىعايتۋ ماسەلەسىنە ايرىقشا ءمان بەرىلدى.
پرەزيدەنت استانادا حالىقارالىق «زاكوۆات» ينتەللەكتۋالدىق ويىنىنىڭ وتكىزىلۋىنە قولداۋ ءبىلدىرىپ، مۇنداي ءىس-شارالار حالىقتارىمىزدىڭ اراسىن جاقىنداتا تۇسەتىنىن اتاپ ءوتتى.
