مەملەكەت باسشىسى وتاندىق ج ي جوبالارىمەن تانىستى
استانا. KAZINFORM - پرەزيدەنت قاسىم-جومارت توقايەۆقا ۇلتتىق سۋپەركومپيۋتەر ورتالىعىندا MedTech ،EdTech ،GovTech جانە ونەركاسىپ سالالارىنداعى وتاندىق IT- شەشىمدەر تانىستىرىلدى. بۇل تۋرالى اقوردانىڭ باسپا ءسوز قىزمەتى حابارلادى.
اتاپ ايتقاندا:
SmartCity Astana جوباسى يننوۆاتسيالىق تەحنولوگيالاردى ەنگىزۋ ارقىلى قالاداعى ءومىر ءسۇرۋ ساپاسىن جاقسارتۋدى كوزدەيدى. جاساندى ينتەللەكتىنى قولداناتىن 100 مىڭنان اسا بەينەباقىلاۋ كامەراسى ىسكە قوسىلىپ، ەلوردانىڭ تسيفرلىق سىڭارى جاسالادى. بۇل قوعامدىق ورىندارداعى ىقتيمال تاۋەكەلدەردى ونلاين-رەجيمدە انىقتاپ، جەدەل ارەكەت ەتۋگە مۇمكىندىك بەرەدى. جوبانى جەكە سەرىكتەس تولىعىمەن قارجىلاندىرادى.
AlemLLM جوباسى - دالدىگى جوعارى قازاق ءتىلىنىڭ ۇلكەن ءتىل مودەلى. جەرگىلىكتى قولدانىسقا بەيىمدەلگەن. مودەل بالاما شەشىمدەردىڭ اراسىندا ۇزدىك كورسەتكىشتەرگە يە جانە ءتۇرلى سالادا كەڭىنەن قولدانىسقا ارنالعان.
AI Kitap جوباسى - تسيفرلىق AI- وقۋلىقتارعا ارنالعان پلاتفورما. ءار وقۋشىنىڭ ءبىلىم دەڭگەيىنە، ساباق ۇلگەرىمىنە جانە جەكە تالعامىنا قاراي وقىتا الادى.
BaSpana Hub - ازاماتتاردىڭ تۇرعىن ۇيگە سۇرانىستارىن ونلاين تۇردە شەشۋگە ارنالعان تسيفرلىق ەكوجۇيە. جۇيە ارقىلى ماركەتپلەيستەن ءۇي ىزدەپ، ساتىپ الۋعا، جىلجىمايتىن مۇلىككە قاتىستى مەملەكەتتىك قىزمەتتەردى الۋعا، جوندەۋ جۇمىستارىنىڭ نەمەسە قۇرىلىس ماتەريالدارىنىڭ ونلاين-سمەتاسىنا تاپسىرىس بەرۋگە بولادى. جوبا سىرتتان قارجى، ينۆەستيتسيا تارتپاي جۇزەگە اسىرىلعان.
Biny.co - جۇك تاسىمالى سالاسىنداعى وتاندىق ستارتاپ. كوماندا Google for Startups - Silkway Accelerator باعدارلاماسىنا قاتىسىپ، ۇزدىك ۇشتىككە ەنگەن. ءونىمدى تۇتىنۋشىلار قاتارىندا QazPost ،Coca-Cola ،Gorilla Asia جانە Zeta Trade كومپانيالارى بار.
Surfaice.pro - كرەمني القابىنداعى قازاقستاندىقتار نەگىزىن قالاعان تەحنولوگيالىق كومپانيا. ستارتاپ قۇرىلىس سالاسىنا ارنالعان يننوۆاتسيالىق شەشىمدەر ازىرلەۋمەن اينالىسادى. ا ق ش- تىڭ بەس شتاتىندا جۇمىس ىستەيدى. كومپانيا Big Sky Capital جانە Shadow Ventures قورلارىنان 1,5 ميلليون دوللار ينۆەستيتسيا تارتقان.
OlympIQ - سپورت سالاسىن دامىتۋعا ارنالعان تەحنولوگيالىق پلاتفورما. جۇيە ج ي كومەگىمەن تالدامالىق، وپەراتسيالىق، مەديتسينالىق جانە ۇيىمدىق دەرەكتەردى وڭدەۋگە مۇمكىندىك بەرەدى.
ورمان ءورتىن الدىن الا انىقتاۋ جۇيەسى ورتكە قارسى ارەكەت ەتۋ ۋاقىتىن ەداۋىر قىسقارتىپ، اپاتتىڭ اۋقىمى مەن شىعىنىن ازايتۋعا مۇمكىندىك بەرەدى. جوبا بەينەمونيتورينگ، بەينەتالداۋ جانە جاساندى ينتەللەكت تەحنولوگيالارى نەگىزىندە جۇمىس ىستەيدى. اتالعان جۇيە «بۋراباي» مەملەكەتتىك ۇلتتىق تابيعي پاركى مەن «ەرتىس ورمانى» رەزەرۆاتىنا ەنگىزىلگەن.
AI- حاتتاما اگەنتى - مەملەكەتتىك ورگاندارداعى جينالىستىڭ اۋديوجازبالارى نەگىزىندە ترانسكريپتسيا جاساپ، حاتتاما دايىندايتىن جاساندى ينتەللەكت قىزمەتى. جوبا قۇجات اينالىمىن جەدەلدەتۋگە، قول ەڭبەگىن ازايتىپ، اقپاراتتىڭ ناقتىلىعى مەن ساقتالۋىن جاقسارتۋعا باعىتتالعان.
AI- تەراپيەۆت - داۋىس ارقىلى ەنگىزىلگەن اقپارات نەگىزىندە مەديتسينالىق قۇجاتتامانى اۆتوماتتى تۇردە ازىرلەيتىن جي جۇيەسى. اتالعان جوبا سىرقاتتىڭ انامنەزىن قالىپتاستىرىپ، ىقتيمال دياگنوزدى الدىن الا انىقتاي الادى. سونداي-اق ءتيىستى كلينيكالىق ۇسىنىمدارى بار مەديتسينالىق ەسەپتى اۆتوماتتى تۇردە قۇراستىرادى.
ج ي قولدانۋ ارقىلى راديولوگيالىق زەرتتەۋلەردى ورتالىقتاندىرۋ (PACS جۇيەسى) جوباسى ونكولوگيالىق اۋرۋلاردى ەرتە كەزەڭىندە انىقتاۋعا ارنالعان. بۇل جۇيە مەديتسينالىق كەسكىندەردى ساقتاپ، وڭدەۋگە مۇمكىندىك بەرەدى.
ەسكە سالا كەتەيىك، بۇعان دەيىن قاسىم-جومارت توقايەۆ سۋپەركومپيۋتەردى ىسكە قوسۋ راسىمىنە قاتىسقان بولاتىن.
