مەملەكەت باسشىسى تەمىربەتون بۇيىمدارى زاۋىتىنا باردى
مەملەكەت باسشىسى قىزىلوردا وبلىسىنا جۇمىس ساپارى بارىسىندا تەمىربەتون بۇيىمدارى زاۋىتىنا باردى، دەپ حابارلايدى Kazinform اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

«قۇرىلىس- كولىك كومپانياسى» ج ش س بيىل ىسكە قوسقان جوبانىڭ جالپى قۇنى - 2,6 ميلليارد تەڭگە. ونىڭ 370 ميلليون تەڭگەسى «دامۋ» كاسىپكەرلىكتى قولداۋ قورى ارقىلى قارجىلاندىرىلعان. كومبينات كۇنىنە 200 تەكشە مەتر تەمىربەتون بۇيىمدارىن وندىرەدى. وندىرىسكە قاجەتتى شيكىزاتتار جەرگىلىكتى جەردەن الىنادى.
سونىمەن قاتار مەملەكەت باسشىسىنا ايماقتاعى كاسىپورىنداردان شىعاتىن باسقا دا ءونىم تۇرلەرى تانىستىرىلدى. ولاردىڭ باسىم بولىگى - قۇرىلىس سالاسى ءۇشىن اسا قاجەتتى ماتەريالدار. اتاپ ايتقاندا، تاباقشا شىنى («OrdaGlass» ج ش س) ، پ ۆ ح- قۇبىرلارى مەن فيتينگتەر («ك ن ك كەميكال» ج ش س)، كاسكالار («NP- Consalting» ج ش س)، پليتكا جەلىمدەرى مەن ساندىك سىلاقتار («ۆەگا- پروم» ج ش س)، جول جانە تروتۋار بورديۋرلەرىن، قۇم- كەرامزيت بلوكتارىن («سادۋاكاسوۆ ج. ا» ج ك)، قيىرشىق تاستىڭ ءارتۇرلى فراكسيالارىن («Shalkiya Dolomite Operating» ج ش س)، تەرەزەلەر مەن اينالار («كومفورت KZ» ج ش س)، ا ك («وردا ستروي ماركەت» ج ش س)، كىرپىش ونىمدەرىن («مەليوراتور» ج ش س) جانە تاعى دا باسقا بۇيىمداردى شىعارادى. سونداي- اق كورمەگە «Dalatex» كومپانياسىنىڭ تەكستيل بۇيىمدارى، «وركەن الەم» ج ش س شىعاراتىن جەكە قورعانىس قۇرالدارى قويىلعان.
پرەزيدەنت كاسىپكەرلەرمەن اڭگىمەلەسۋ بارىسىندا شاعىن جانە ورتا بيزنەستى وركەندەتۋ ءۇشىن مەملەكەت تاراپىنان جان- جاقتى قولداۋ كورسەتىلەتىنىن ايتتى.

ءوندىرىس ورنىندا وبلىس اكىمى نۇرلىبەك نالىبايەۆ مەملەكەت باسشىسىنا قىزىلوردا ءوڭىرىنىڭ الەۋمەتتىك- ەكونوميكالىق دامۋ قارقىنى جونىندە باياندادى
ايماق باسشىسىنىڭ ايتۋىنشا، قىزىلوردا وبلىسىنىڭ جالپى الەۋمەتتىك- ەكونوميكالىق دامۋ كورسەتكىشتەرىندە ءوسىم بايقالادى. اتاپ ايتقاندا، وڭدەۋ ونەركاسىبى 115,8 پايىزعا (227 ميلليارد تەڭگە)، اۋىل شارۋاشىلىعى 101,6 پايىزعا (157 ميلليارد تەڭگە)، قۇرىلىس 126,4 پايىزعا (117 ميلليارد تەڭگە)، تۇرعىن ۇيلەر سالۋ 118,9 پايىزعا (618 مىڭ ش. م) ، ساۋدا- ساتتىق 104,1 پايىزعا (531 ميلليارد تەڭگە) ارتقان. نەگىزگى كاپيتالعا قۇيىلعان ينۆەستيتسيا كولەمىن بيىل 472 ميلليارد تەڭگەگە جەتكىزۋ جوسپارلانىپ وتىر. ونىڭ باسىم بولىگى جەكە ينۆەستيتسيالارعا تيەسىلى. وبلىستا «جايلى مەكتەپ» ۇلتتىق جوباسى اياسىندا الداعى ءۇش جىل ىشىندە 27 مەكتەپ سالۋ جوسپارلانعان. قازىرگى كەزدە قىزىلوردا قالاسىندا فيزيكا- ماتەماتيكا باعىتىنداعى مەكتەپ- ينتەرناتى سالىنىپ جاتىر.
ەمحاناسى مەن ونكولوگيالىق بولىمشەسى بار 300 ورىندىق كوپبەيىندى اۋرۋحانانىڭ، قان ورتالىعىنىڭ قۇرىلىسى جۇرگىزىلىپ جاتىر. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ەلدى مەكەندەردە 27 مەديتسينالىق- امبۋلاتوريالىق نىسان سالىنىپ جاتىر؛
وڭىردە ءبىرقاتار سپورت جانە الەۋمەتتىك- مادەني نىسان بوي كوتەرەدى. اتاپ ايتقاندا، جۋىردا 7 مىڭ ورىندىق ورتالىق ستاديوننىڭ، جابىق باسسەينى بار كوپسالالى دەنە شىنىقتىرۋ- ساۋىقتىرۋ كەشەنىنىڭ قۇرىلىسى باستالادى. اۋدانداردا شاعىن 11 دەنە شىنىقتىرۋ كەشەنىن سالۋ ءۇشىن جەرگىلىكتى بيۋدجەتتەن 2,6 ميلليارد تەڭگە بولىنگەن. وبلىس ورتالىعىندا سالىنىپ جاتقان ونەر ورتالىعى جىل اياعىنا دەيىن ەل يگىلىگىنە پايدالانۋعا بەرىلەدى.
نۇرلىبەك نالىبايەۆ ءوڭىردىڭ تىنىس- تىرشىلىگىن تۇلەتۋگە جەرگىلىكتى كاسىپكەرلەر دە ەلەۋلى ۇلەس قوسىپ جاتقانىن ايتتى. الەۋمەتتىك نىساندار سالۋ، دەمالىس ساياباقتارىن، ويىن- سپورت الاڭدارىن، ۇيلەردىڭ قاسبەتتەرىن جاڭارتۋ، اۋلالاردى اباتتاندىرۋ جۇمىستارى دەمەۋشىلەردىڭ كومەگىمەن جۇزەگە اسىرىلىپ كەلەدى.
اۆتور
ەلميرا ورالبايەۆا