مەملەكەت باسشىسى سينگاپۋر پارلامەنتىنىڭ سپيكەرىن قابىلدادى
استانا. KAZINFORM - ق ر پرەزيدەنتى قاسىم-جومارت توقايەۆ اقوردادا سينگاپۋر پارلامەنتىنىڭ سپيكەرى سەا كيان پەن باستاعان دەلەگاتسيانى قابىلدادى، دەپ حابارلايدى اقوردانىڭ باسپا ءسوز قىزمەتى.
قازاقستان مەن سينگاپۋر اراسىنداعى تىعىز قارىم-قاتىناستى ودان ءارى كەڭەيتۋدى كوزدەيتىن كەزدەسۋ دوستىق راۋىشتە ءارى ناتيجەلى ءوتتى.
- ءبىز - ۋاقىت سىنىنان وتكەن سەنىمدى سەرىكتەسپىز. ءوزارا بايلانىستاردى نىعايتۋ ءۇشىن اۋقىمدى جۇمىس جۇرگىزىلدى. دەگەنمەن الدىمىزعا ەكى ەلدىڭ ىنتىماقتاستىعىن ودان ءارى دامىتۋعا باعىتتالعان بيىك ماقسات قويىپ وتىرمىز، - دەدى پرەزيدەنت.
قاسىم-جومارت توقايەۆتىڭ پىكىرىنشە، حالىقارالىق ىنتىماقتاستىقتى ارتتىرۋدا جانە مەملەكەتتەر اراسىنداعى ديالوگقا ىقپال ەتۋدە پارلامەنتتىك ديپلوماتيا اسا ماڭىزدى ءرول اتقارادى.
پرەزيدەنت بۇگىندە قازاقستاندا 140 سينگاپۋرلىق كومپانيا مەن بىرلەسكەن كاسىپورىن جۇمىس ىستەيتىنىن، ولاردىڭ ەل ەكونوميكاسىنا قۇيعان ينۆەستيتسياسىنىڭ جالپى كولەمى 1,4 ميلليارد دوللاردان اسقانىن اتاپ ءوتتى.
سەا كيان پەن قوناقجايلىق تانىتقان قاسىم-جومارت توقايەۆقا ريزاشىلىعىن ءبىلدىرىپ، ەكى ەلدىڭ ىنتىماقتاستىعىن تەرەڭدەتۋ ءۇشىن مول الەۋەت بار ەكەنىن ايتتى.
كەزدەسۋدە ەكونوميكالىق جانە ينۆەستيتسيالىق ىقپالداستىق پەرسپەكتيۆالارىنا باسا نازار اۋدارىلدى.
سونىمەن قاتار وڭىرلىك جانە حالىقارالىق كۇن تارتىبىندەگى ماسەلەلەر تالقىلاندى.
اۆتور
ەربول جانات
