مەملەكەت باسشىسى سوت ءىسىن جەڭىلدەتۋگە قاتىستى ۇسىنىس ايتتى

استانا. KAZINFORM - سوت جۇيەسىندەگى وزگەرىستەر توقتاپ قالمايدى. بۇل تۋرالى قازاقستان سۋديالارىنىڭ سەزىندە ق ر پرەزيدەنتى قاسىم-جومارت توقايەۆ ءمالىم ەتتى.

«رەفورما كەزىندە انىقتالعان ولقىلىقتار دەرەۋ جويىلۋى ءتيىس. سوت اكىمشىلىگى وسىعان قاتىستى تالداۋ جۇمىسىن كۇشەيتكەنى ءجون. قازىلاردىڭ قىزمەتى ساپالى بولۋى كەرەك. ءاربىر ءىس تەك زاڭ اياسىندا قارالۋى ءتيىس»، - دەدى قاسىم-جومارت توقايەۆ.

پرەزيدەنت وسى سالاداعى سيفرلاندىرۋ ءىسىن جالعاستىرۋ ماڭىزدى ەكەنىن ايتتى. تسيفرلىق تەحنولوگيالار ازاماتتاردىڭ سوت پروتسەسىنە قاتىسۋىن ايتارلىقتاي جەڭىلدەتتى، سونداي-اق سوت قىزمەتىنىڭ بارىنشا اشىق بولۋىن قامتاماسىز ەتتى.

«ەلىمىزدە ارنايى اقپاراتتىق جۇيە بار. سۋديالار سول ارقىلى باسقا سوتتاردىڭ شەشىمدەرىمەن تانىسا الادى. بۇل - ءادىل سوت اكتىلەرىن قابىلداۋعا مۇمكىندىك بەرەتىن ۇتىمدى ءتاسىل. سونىڭ ارقاسىندا ورتاق مالىمەت قورى قالىپتاسادى. بۇل دەرەكتەر سوت پروتسەسىنە قاتىساتىن تاراپتىڭ بارىنە قولجەتىمدى بولۋى كەرەك. سول كەزدە اركىم وزىنە قاتىستى ءىستىڭ ناتيجەسىن باعامداي الادى. بۇل باستاما سوتتا قارالاتىن داۋ- دامايدى ازايتادى، جۇرت تا بوسقا ارىزدانىپ، شاعىمدانا بەرمەيدى. جالپى، سوت ءىسىن جەڭىلدەتۋ - ماڭىزدى مىندەت. ول ءۇشىن وزىق تەحنولوگيا مەن جاساندى ينتەللەكتىنى كەڭىنەن پايدالانعان ءجون»، - دەدى مەملەكەت باسشىسى.

بۇدان بۇرىن حابارلانعانداي، بۇگىن ەلوردادا ق ر پرەزيدەنتى قاسىم-جومارت توقايەۆتىڭ قاتىسۋىمەن قازاقستان رەسپۋبليكاسى سۋديالارىنىڭ IX سەزى باستالدى.

اۆتور
رۋسلان عابباسوۆ