مەملەكەت باسشىسى گرۋزيا پرەمەر-ءمينيسترى يراكلي كوباحيدزەمەن كەلىسسوز جۇرگىزدى
استانا. KAZINFORM - پرەزيدەنت قاسىم-جومارت توقايەۆ گرۋزيا پرەمەر-ءمينيسترى يراكلي كوباحيدزەمەن كەلىسسوز جۇرگىزدى. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسى يراكلي كوباحيدزەگە ءىلتيپات ءبىلدىرىپ، ونى گرۋزيا پرەمەر-ءمينيسترى لاۋازىمىنا قايتا تاعايىندالۋىمەن قۇتتىقتادى جانە گرۋزين حالقىنىڭ وركەندەۋى جولىنداعى جاۋاپتى قىزمەتىنە ساتتىلىك تىلەدى.
پرەزيدەنت كەيىنگى جىلدارى گرۋزيانىڭ قارىشتى دامىپ، جۇرگىزىلىپ جاتقان رەفورمالاردىڭ ناتيجەسىندە ەكونوميكالىق ءوسىمنىڭ 9,4 پايىزدى قۇراعانىن اتاپ ءوتتى.
توقايەۆ قازاق-گرۋزين قارىم-قاتىناستارىنىڭ قارقىنىن جوعارى باعالادى. پرەزيدەنتتىڭ ايتۋىنشا، گرۋزيا قازاقستاننىڭ كاۆكاز ايماعىنداعى سەنىمدى سەرىكتەسى جانە ەكى ەلدى ءوزارا دوستىق پەن تىعىز تاريحي تامىرلاستىق بايلانىستىرادى.
- قازاقستان مەن گرۋزيا ءتۇرلى دەڭگەيدە، اتاپ ايتقاندا، پارلامەنتتەر، ۇكىمەتتىك جانە مەملەكەتتىك ورگاندار اراسىندا ءتيىمدى ىنتىماقتاستىق ورناتقان، - دەدى مەملەكەت باسشىسى.
گرۋزيا پرەمەر-ءمينيسترى قوناقجايلىق كورسەتكەنى ءۇشىن قاسىم-جومارت توقايەۆقا ريزاشىلىعىن ءبىلدىرىپ، قىزمەتكە كىرىسكەننەن كەيىنگى العاشقى شەتەلدىك ساپارلارىنىڭ ءبىرىن قازاقستانعا ارناعانىن جەتكىزدى.
يراكلي كوباحيدزەنىڭ ايتۋىنشا، گرۋزيا قازاقستانمەن كوپ جوسپارلى ىقپالداستىقتى نىعايتۋعا باسا ءمان بەرەدى.
- ءبىز ءۇشىن ساياسي جانە ەكونوميكالىق ىنتىماقتاستىقتى ارتتىرۋ اسا ماڭىزدى. ءتۇرلى فورماتتا، ونىڭ ىشىندە كوپجاقتى الاڭداردا قازاقستاننىڭ مۇددەسىن بەلسەندى قورعاۋعا دايىنبىز، - دەدى ول.
پرەمەر-مينيستر قازاقستان پرەزيدەنتىن گرۋزياعا ساپارمەن كەلۋگە شاقىردى.
قاسىم-جومارت توقايەۆ پەن يراكليي كوباحيدزە ترانسكاسپي حالىقارالىق كولىك باعدارى بويىنشا وتەتىن جۇك تاسىمالى كولەمىن ارتتىرۋعا جانە ترانزيت ءدالىزىنىڭ ينفراقۇرىلىمىن جاڭعىرتۋعا ەرەكشە نازار اۋداردى.
كەزدەسۋدە ساۋدا، ەنەرگەتيكا، ينۆەستيتسيا، تۋريزم، جاساندى ينتەللەكت جانە سيفرلاندىرۋ سەكىلدى كوپتەگەن باعىتتاعى ەكىجاقتى بايلانىستاردى كەڭەيتۋ پەرسپەكتيۆاسى قاراستىرىلدى. سونداي-اق حالىقارالىق كۇن ءتارتىبى مەن وڭىرلىك قاۋىپسىزدىكتىڭ وزەكتى ماسەلەلەرى تالقىلاندى.
