مەملەكەت باسشىسى رەسپۋبليكا كۇنىنە وراي وتكەن سالتاناتتى جيىندا ءسوز سويلەدى
استانا. KAZINFORM - قاسىم-جومارت توقايەۆ سالتاناتتى جيىندا قازاقستاندىقتاردى ۇلتىمىزدىڭ ەڭ ۇلىق مەرەكەسىمەن قۇتتىقتاپ، بۇل ازاتتىقتىڭ التىن قازىعىن قاققان كۇن ەكەنىن اتاپ ءوتتى. پرەزيدەنت ەلىمىزدىڭ ەگەمەندىگى تۋرالى دەكلاراتسيا قابىلدانعان كۇندى قاسيەتتى تاۋەلسىزدىگىمىزدىڭ باستاۋىنا بالادى.
مەملەكەت باسشىسى ءوز سوزىندە بولاشاققا سەنىممەن قارايتىن ۇلت قانا تابىسقا جەتە الاتىنىنا نازار اۋدارىپ، ءومىر بولعان سوڭ ءتۇرلى قيىندىق تا كەزدەسەتىنىنە توقتالدى.
- ەلىمىز تاڭداعان دامۋ جولىنان ەشقاشان اينىمايدى. مۇنى بيىلعى تابيعي اپات كەزىندە تاعى دا دالەلدەدىك. الاپات تاسقىن، شىن مانىندە، ەلىمىز ءۇشىن زور سىناق بولدى. قانشاما ەلدى مەكەندى قارعىن سۋ باستى. قازاقستاننىڭ 10 ايماعىندا توتەنشە جاعداي جاريالاندى. مىڭداعان ادام باسپاناسىز قالدى، مال- مۇلكىن جوعالتتى. كۇردەلى ساتتە مەنىڭ حالىققا ارنايى ۇندەۋ جاريالاعانىمدى بىلەسىزدەر. وندا ءبىر دە ءبىر ادام ەسكەرۋسىز قالمايتىنىن ناقتى ايتتىم. مەملەكەت سول ۋادەسىن ورىندادى. قىسقا مەرزىم ىشىندە 2700 گە جۋىق ءۇي سالىندى. باسپاناسىن قالپىنا كەلتىرۋ ءۇشىن 9 مىڭنان استام وتباسىنا وتەماقى بەرىلدى. سونداي-اق 6 مىڭعا جۋىق ءۇي ساتىپ الىندى. جازدان بەرى مىڭداعان وتباسى قونىس تويىن تويلادى. مەملەكەت بۇلىنگەن ينفراقۇرىلىمنىڭ كوپشىلىگىن از ۋاقىتتا قالپىنا كەلتىردى، - دەدى پرەزيدەنت.
قاسىم-جومارت توقايەۆ مۇنىڭ ءبارىن قوعامنىڭ بىرلەسە اتقارعان جۇمىسىنىڭ ناتيجەسى دەپ باعالاپ، اپات سالدارىن جويۋعا اتسالىسقاندارعا، اسىرەسە، قۇتقارۋشىلارعا، ەرىكتىلەرگە، كاسىپكەرلەرگە جانە باسقا دا جاناشىر ازاماتتارعا العىس ايتتى.
- ءوزارا تىلەۋلەستىك پەن قامقورلىقتىڭ ارقاسىندا سىناقتان سۇرىنبەي وتتىك. شىن مانىندە، ءبىزدىڭ بارلىق جەتىستىگىمىز بەرەكەلى بىرلىك پەن ىرىستى ىنتىماقتان باستاۋ الادى. بۇل - ۇيىسقان ۇلت، مىقتى مەملەكەت بولۋدىڭ باستى كەپىلى. ەلدە تۇراقتىلىق بولماسا، ەشقانداي دامۋ بولمايتىنىن قازىر الەمدە بولىپ جاتقان وقيعالاردان انىق اڭعارۋعا بولادى. وكىنىشكە قاراي، كوپتەگەن ەلدەر الاۋىزدىق پەن ءتۇرلى جانجالدىڭ كەسىرىنەن توقىراۋعا ۇشىراپ وتىر. «بىرلىك بار جەردە عانا تىرلىك بار». بۇل - اقيقات. ءبىز ەلىمىزدە جان-جاقتى رەفورمالاردى جۇزەگە اسىرىپ جاتىرمىز. بۇل - ەڭ الدىمەن، حالقىمىزدىڭ تۇتاستىعى مەن بىرلىگىنىڭ ارقاسى. سەبەبى، ءبىز تاڭداعان جول - وركەندەۋ مەن دامۋ جولى. بۇگىندە ونىڭ جەمىسىن بارشا ازاماتتارىمىز كورۋدە، - دەدى مەملەكەت باسشىسى.
پرەزيدەنتتىڭ ايتۋىنشا، اۋقىمدى ساياسي جاڭعىرۋلار ارقىلى مەملەكەتىمىزدىڭ دەموكراتيالىق دامۋىنىڭ جاڭا باعدارى ايقىندالدى.
كونستيتۋتسيالىق رەفورمانى ىسكە اسىرۋ ناتيجەسىندە بيلىكتىڭ نەگىزگى ينستيتۋتتارى قايتا قۇرىلىمدالىپ، ورنىقتى ساياسي جۇيە قالىپتاستى. بۇل ساياسي جۇيەنىڭ نەگىزى - اشىقتىق پەن ادىلدىك، تيىمدىلىك پەن باسەكەگە قابىلەتتىلىك. ەڭ باستىسى، حالىققا قىزمەت ەتۋ قاعيداسى قامتىلعان. مەملەكەت باسشىسى وسىنداي قۇندىلىقتار نەگىزىندە ءبىزدىڭ قوعامدىق-ساياسي ومىرىمىزدە ىرگەلى وزگەرىستەر بولىپ جاتقانىن ايتتى.
- جاقىندا وتكەن اتوم ەلەكتر ستانسياسىن سالۋ جونىندەگى رەفەرەندۋمنىڭ قورىتىندىسى - سونىڭ جارقىن دالەلى. ازاماتتاردىڭ 70 پايىزدان استامى اەس قۇرىلىسىن قولداپ داۋىس بەردى. بۇل حالقىمىزدىڭ تاعدىرشەشتى ساتتەردە ورلەۋ جولىن تاڭدايتىنىن كورسەتتى. «ءتۇرلى كوزقاراس، ءبىرتۇتاس ۇلت» قاعيداتى - مەملەكەتتىك ساياساتىمىزدىڭ نەگىزى. جالپى، ەنەرگيا تاپشىلىعىنىڭ ارتۋى - ەلىمىز ءۇشىن وتە وزەكتى پروبلەمانىڭ ءبىرى. ونى دەر كەزىندە شەشپەسە، ەكونوميكامىزدىڭ دامۋىنا كەدەرگى كەلتىرىپ، ازاماتتاردىڭ تۇرمىس ساپاسىنا كەرى اسەرىن تيگىزەدى، - دەدى قاسىم-جومارت توقايەۆ.
مەملەكەت باسشىسى ادىلەتتى قازاقستاننىڭ ەكونوميكالىق باعدارىنا سايكەس اۋقىمدى جۇمىس اتقارىلىپ جاتقانىنا توقتالدى. ەلدىڭ كولىك، ەنەرگەتيكا جانە يندۋستريا جۇيەسى قايتا قۇرىلىپ جاتىر.
- بەس جىل بۇرىن بۇقتىرما بوگەنىنە كوپىر سالۋ تۋرالى تاپسىرما بەردىم. جۇرت جىلدار بويى جازدا - پاروممەن، قىستا - مۇزدىڭ ۇستىمەن جۇرەتىن. بۇل وتە ىڭعايسىز ءارى قاۋىپتى بولعانى تۇسىنىكتى. ەندى ماسەلە ءبىرجولا شەشىمىن تاپتى. كوپىردىڭ قۇرىلىسى اياقتالدى، بىرنەشە كۇن بۇرىن رەسمي تۇردە اشىلىپ، ەل يگىلىگىنە بەرىلدى. بۇل - قازاقستانداعى ەڭ ۇزىن كوپىر. وسىلايشا، شەكارا ماڭىنداعى اۋداندار ترانزيتتىك اۋماققا اينالدى، ياعني قازاقستان ارقىلى قىتاي مەن رەسەيدى جالعايتىن تاعى ءبىر توتە جول پايدا بولدى. وسى ماڭىزدى جوبا شىعىس قازاقستانداعى بىرنەشە اۋداننىڭ كولىك قاتىناسىن ەداۋىر جاقسارتادى. جالپى، ساپالى جول - حالىقتىڭ تۇرمىسىنا وڭ ىقپال ەتەتىن فاكتور. مەن بۇل ماسەلەگە ايرىقشا ءمان بەرەمىن، - دەدى پرەزيدەنت.
وسى رەتتە قاسىم-جومارت توقايەۆ بيىلدىڭ وزىندە ۇزىندىعى 12 مىڭ شاقىرىم جول سالىنىپ، جوندەلىپ جاتقانىن ەسكە سالدى. اسىرەسە، ايماقتارداعى جولدى جاقسارتۋعا باسا نازار اۋدارىلىپ وتىر. ونىڭ ايتۋىنشا، باتىس قازاقستاندا سوناۋ كەڭەس زامانىنان بەرى قاراۋسىز قالعان جولدار بار. كازتالوۆكا - جانىبەك - رەسەي شەكاراسى باعىتىنداعى جول بيىل تولىق پايدالانۋعا بەرىلەدى. سونىمەن قاتار اۋە قاتىناسىن دامىتۋ باعىتىندا ناقتى جۇمىس اتقارىلىپ جاتىر. جاقىندا قىزىلوردا جانە شىمكەنت اۋەجايلارىندا جاڭا تەرمينالدار اشىلادى.
پرەزيدەنت ەكونوميكانى ءارتاراپتاندىرۋ ءۇشىن قابىلدانىپ جاتقان جان-جاقتى شارالار تۋرالى مالىمەت بەردى. اتاپ ايتقاندا، بيىلعى 8 ايدا وڭدەۋ ونەركاسىبىنىڭ ەكسپورتى 17,8 ميلليارد دوللاردان اسقان. ونىڭ ۇشتەن ءبىرى - كۇردەلى تەحنولوگيامەن وڭدەلگەن ونىمدەر. قازىر 17 سەرپىندى، ياعني وزىق ينۆەستيتسيالىق جوبا جۇزەگە اسىرىلىپ جاتىر.
مەملەكەت باسشىسى اۋىل شارۋاشىلىعىنىڭ دامۋ قارقىنىنا توقتالدى.
- بۇل - ازىق-تۇلىك قاۋىپسىزدىگىن قامتاماسىز ەتۋ تۇرعىسىنان ايرىقشا ماڭىزدى سالا. قازاقستان الەمدىك ازىق-تۇلىك نارىعىنداعى ءرولىن كۇشەيتە بەرەدى. قازىر كۇزگى جيىن-تەرىن ناۋقانى اياقتالىپ قالدى. ديقاندار قاۋىمىنا شىنايى ريزاشىلىق بىلدىرەمىن. كوكتەمگى تاسقىنعا قاراماستان 26 ميلليون توننادان استام استىق جينالدى. مۇنى رەكوردتىق كورسەتكىش دەۋگە بولادى. بۇعان مەملەكەت تاراپىنان كورسەتىلگەن ناقتى كومەك تە سەپتىگىن تيگىزگەنى انىق. بيىل كوكتەمگى ەگىس ناۋقانىنا بەرىلەتىن ارزان نەسيە كولەمى ءۇش ەسە كوبەيدى. اۋىل شارۋاشىلىعى تەحنيكاسىن ليزينگ ارقىلى الۋعا قوسىمشا قاراجات ءبولىندى. جالپى، اگروونەركاسىپ كەشەنىندە 865 جوبا جۇزەگە اسىرىلماق. ونىڭ قۇنى - 2,6 تريلليون تەڭگە، - دەدى قاسىم-جومارت توقايەۆ.
پرەزيدەنت ەلىمىزدەگى كاسىپكەرلىك سالاسىنىڭ وركەندەۋ جولىنا تۇسكەنىن، شاعىن جانە ورتا بيزنەس حالىقتىڭ ەكونوميكاداعى بەلسەندى بولىگىن جۇمىسپەن قامتىپ وتىرعانىن اتاپ ءوتتى. مەملەكەت باسشىسى ەلدىڭ ىسكەرلىك احۋالى مەن ينۆەستيتسيالىق تارتىمدىلىعىن ودان ءارى جاقسارتۋ ماقساتىندا مامىر ايىندا ەكونوميكانى ىرىقتاندىرۋ جونىندەگى جارلىققا قول قويعانىن جەتكىزدى.
- وتاندىق كاسىپكەرلەر ەلدەگى ماڭىزدى جوبالاردى جۇزەگە اسىرۋعا بەلسەنە اتسالىسىپ كەلەدى. ولار مەكتەپتەر، اۋرۋحانالار جانە باسقا دا الەۋمەتتىك نىساندار سالىپ جاتىر. سونداي-اق ونەركاسىپ پەن ينفراقۇرىلىمدى دامىتۋعا ينۆەستيتسيا قۇيىپ، قايىرىمدىلىق باستامالاردى قولداپ ءجۇر. بۇل - مەملەكەت پەن بيزنەس اراسىنداعى جاسامپاز سەرىكتەستىكتىڭ، بيزنەس وكىلدەرىنىڭ الەۋمەتتىك جاۋاپكەرشىلىگىنىڭ ايقىن كورسەتكىشى، - دەدى پرەزيدەنت.
وسى ورايدا قاسىم-جومارت توقايەۆ ۇكىمەت پەن اكىمدەردىڭ تىكەلەي مىندەتى - بيزنەس- قاۋىمداستىققا جان-جاقتى قولداۋ كورسەتۋ، كاسىپكەرلەرمەن تىعىز قارىم-قاتىناس جاساۋ ەكەنىن ايتتى.
پرەزيدەنت ەلىمىزدە باسىمدىق بەرىلىپ وتىرعان الەۋمەتتىك سالالارعا توقتالدى.
- بيىل «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 115 جاڭا مەديتسينا نىسانى سالىندى. وتاندىق مەديتسينادا ەمدەۋدىڭ يننوۆاتسيالىق ادىستەرى ەنگىزىلىپ، ونكولوگيالىق قىزمەتتى كەشەندى جاڭعىرتۋ جۇمىستارى باستالدى. سالا قىزمەتكەرلەرىن قۇقىقتىق جانە قارجىلىق تۇرعىدان قورعاۋ تۋرالى زاڭ قابىلداندى. بۇل - اتالعان ماماندىقتىڭ مارتەبەسىن ارتتىرۋعا باعىتتالعان قادام. وسى جانە باسقا دا جۇيەلى شارالاردىڭ ناتيجەسىندە نەگىزگى مەديتسينالىق- دەموگرافيالىق كورسەتكىشتەردىڭ جاقسارعانى بايقالىپ وتىر. ورتاشا ءومىر ءسۇرۋ ۇزاقتىعى تاۋەلسىزدىك جىلدارىندا العاش رەت 75 جاستان استى. ۇرپاققا ساپالى ءبىلىم بەرۋ - ماڭىزدى مىندەت. ەلىمىزدە «جايلى مەكتەپ» ۇلتتىق جوباسى قولعا الىندى. سونىڭ ارقاسىندا 500 مىڭعا جۋىق بالا جاڭا ءبىلىم ورداسىندا وقيتىن بولادى، - دەدى قاسىم-جومارت توقايەۆ.
مەملەكەت باسشىسى عىلىمى جانە تەحنيكاسى دامىعان ەلدەردىڭ الەم كوشىن باستاپ تۇرعانىن تىلگە تيەك ەتىپ، وسى ۇدەرىستەن قالماۋ ءۇشىن تەحنوكرات ۇلت بولۋىمىز قاجەت ەكەنىن العا تارتتى.
- بۇل - ۋاقىت تالابى. كەلەر جىلدى «جۇمىسشى ماماندىقتارى جىلى» دەپ جاريالادىق. ءبىز تەحنيكالىق جانە كاسىپتىك ءبىلىم بەرۋگە باسا ءمان بەرىپ وتىرمىز. بيىل وسى سالاعا ارنالعان مەملەكەتتىك تاپسىرىستى ەداۋىر كوبەيتتىك. گرانت سانىن 10 مىڭعا ارتتىردىق. مەملەكەتتىك تاپسىرىستىڭ 65 پايىزى تەحنيكالىق ماماندىقتارعا ءبولىندى. ەلىمىزدە شەتەلدىڭ بەدەلدى جوعارى وقۋ ورىندارىنىڭ فيليالدارى اشىلىپ جاتىر. ءبىلىم- عىلىمنىڭ ساپاسىن جاقسارتۋعا قاتىستى باسقا دا شارالار قولعا الىندى. جاقىندا «عىلىم جانە تەحنولوگيالىق ساياسات تۋرالى» زاڭ قابىلداندى. مۇنىڭ ءبارى باسەكەگە قابىلەتتى وزىق ۇلت بولۋىمىز ءۇشىن وتە ماڭىزدى دەپ ويلايمىن، - دەدى پرەزيدەنت.
قاسىم-جومارت توقايەۆ بيىل ءوزىنىڭ باستاماسىمەن «تازا قازاقستان» اكتسياسى باستالعانىن، بۇل حالىقتىڭ ەكولوگيالىق مادەنيەتىن كوتەرۋگە ارنالعان جالپىۇلتتىق جوبا ەكەنىن اتاپ ءوتتى.
ەلدىڭ ىشكى جاعدايى مەن ازاماتتاردىڭ ءال-اۋقاتىنا مەملەكەتتىڭ سىرتقى ساياساتى تىكەلەي اسەر ەتەدى. سوندىقتان مەملەكەت باسشىسى ءوز سوزىندە بۇل سالاعا دا ەرەكشە ءمان بەردى.
- قازاقستان ۇلتتىق مۇددەگە نەگىزدەلگەن تەڭگەرىمدى، كونسترۋكتيۆتى سىرتقى ساياسات جۇرگىزەدى. بيىل ءبىز ءۇشىن حالىقارالىق ماڭىزدى وقيعالارعا تولى جىل بولدى. قازاقستان بىردەن بىرنەشە كوپجاقتى ۇيىمدارعا ءتوراعالىق ەتىپ، ءبىرقاتار اۋقىمدى ءىس- شارا ۇيىمداستىردى. اسىرەسە، شانحاي ىنتىماقتاستىق ۇيىمىنىڭ ءسامميتى مەن دۇنيەجۇزىلىك كوشپەندىلەر ويىندارىن اتاپ وتۋگە بولادى. مەملەكەتىمىز الەمدىك ارەناداعى ورنىن دايەكتى تۇردە نىعايتۋ ارقىلى ورنىقتى دامۋ ماقساتتارىنا قول جەتكىزۋگە جانە جاھاندىق سىن-قاتەرلەردى ەڭسەرۋگە ەلەۋلى ۇلەس قوسىپ كەلەدى. قازاق ديپلوماتياسى سان عاسىرلىق تاريحى مەن ءداستۇرى بار ۇلى دالادان باستاۋ الدى. قازاقستاننىڭ الەمدىك ارەناداعى بەدەلىن نىعايتا ءتۇسۋ - ۇلتتىق ديپلوماتيانىڭ الدىندا تۇرعان ماڭىزدى مىندەت. قازىر دۇنيە ءجۇزى قاۋىمداستىعى ءبىزدىڭ ەلىمىزدى ورتا دەرجاۆا دەپ اتايتىن بولدى. ءبىراق ارقانى كەڭگە سالۋعا بولمايدى، ءالى دە وتە بەلسەندى جۇمىس ىستەۋ قاجەت. الەمدە ءتۇرلى قاقتىعىستار كوبەيىپ، قارۋلانۋ جارىسى بەلەڭ العانىن جانە ساۋدا سوعىسى ءورشىپ بارا جاتقانىن كورىپ وتىرسىزدار. ءبىراق ەڭ قاۋىپتىسى - سانانىڭ ميليتاريزاتسياسى، ءبىر-ءبىرىنىڭ ۇستانىمىن مويىنداماۋ جانە سەنىمسىزدىكتىڭ ارتۋى، ديالوگ پەن كونسەنسۋس ءۇشىن مۇمكىندىكتىڭ ازايۋى. وسىنىڭ ءبارى الەمدىك ءتارتىپتىڭ تۇبەگەيلى وزگەرىسكە ۇشىراپ جاتقانىن كورسەتەدى. ءبىز وسىنداي جاعدايدىڭ وزىندە تۇراقتىلىق پەن كەلىسىم مەكەنى بولىپ قالۋ ءۇشىن قولدان كەلگەننىڭ ءبارىن جاسايمىز. بەيبىتشىلىك پەن تىنىشتىق - ءبىزدىڭ ەڭ قۇندى بايلىعىمىز، ونى ايالاپ، كوزدىڭ قاراشىعىنداي ساقتاۋىمىز كەرەك، - دەدى پرەزيدەنت.
مەملەكەت باسشىسى بەيبىتشىلىك پەن دامۋدىڭ ءتۇپ نەگىزى وتباسىنداعى تاربيەدەن، كوشەدەگى تازالىقتان، قوعامداعى بىرلىكتەن باستاۋ الاتىنىنا نازار اۋدارىپ، نەلىكتەن زاڭ مەن ءتارتىپ ۇستەمدىگى تۋرالى ۇدايى ايتاتىنىن ءتۇسىندىردى.
- بۇل - ءبىزدىڭ بايىپپەن تاڭداعان اينىماس قاعيداتىمىز. ول قوعامدىق سانادا تامىر جايۋعا ءتيىس. «زاڭ - ىزگىلىك پەن ادىلەت ونەرى» دەگەن ايگىلى ءتامسىل بار. زاڭ ازاماتتاردىڭ قۇقىقتارى مەن بوستاندىقتارىن قورعاۋ، قوعامداعى ءتارتىپتى قامتاماسىز ەتۋ ءۇشىن قاجەت. ارينە، زاڭنىڭ قاتاڭدىعىنا نارازىلىق ءبىلدىرىپ، «قىلبۇراۋ سالىپ جاتىر» دەپ ويلايتىن ادامدار ءارقاشان تابىلادى. ءبىراق جازادان جالتارىپ، جۇگەنسىز كەتكەندەر، شىن مانىندە، حالىق پەن ەل مۇددەسىنە قارسى ادامدار. مەملەكەت قىلمىسقا «مۇلدەم توزبەۋشىلىك» قاعيداتىن ىسكە اسىرۋ ءۇشىن شارا قابىلداۋدى جالعاستىرادى. بۇزاقىلىقپەن جانە ۇيىمداسقان قىلمىسپەن ىمىراسىز كۇرەس جۇرگىزەدى. - دەدى قاسىم-جومارت توقايەۆ.
پرەزيدەنت ءبىر- ءبىرىمىزدى قولداپ، بيىك ماقساتتارعا ۇمتىلاتىن بىرلىگى مىقتى ەل بولساق، كوك پاسپورتىمىز دا مىقتى ءارى قۋاتتى بولاتىنىن ايتتى.
- ءبىر-بىرىمىزگە تىلەكتەس بولايىق، ءوزارا قۇرمەتپەن قارايىق، قادىرلەيىك. كەز كەلگەن قيىندىققا قارسى تۇرىپ، ەل ءۇشىن، جەر ءۇشىن بىرگە ەڭبەك ەتەيىك. حالقى - ءبىرتۇتاس، بولاشاعى - جارقىن ادىلەتتى قازاقستاندى بىرگە قۇرايىق. ازاماتتارىمىز بارلىق سالادا ءاردايىم ادىلدىك بولعانىن قالايدى. ول ءۇشىن اركىم ادىلدىكتى، ەڭ الدىمەن، وزىنەن باستاۋى كەرەك. سوندا قوعام دا، بۇكىل مەملەكەتتىك جۇيە دە ءادىل بولماق. ەلىمىزدىڭ ەڭ باستى مەرەكەسى - رەسپۋبليكا كۇنىندە ءبىز قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ تاباندى ەڭبەگىن اتاپ وتۋگە ءتيىسپىز. ونىڭ قازىرگى قازاق مەملەكەتىن قۇرۋ ىسىندە شەشۋشى تاريحي ءرول اتقارعانىن مىندەتتى تۇردە ايتۋىمىز قاجەت. ەل ءۇشىن جاسالعان قىزمەت ەشقاشان ۇمىتىلماۋى كەرەك، ەل جادىندا ساقتالۋعا ءتيىس. بۇل - ەلىمىزدىڭ بولاشاعى ءۇشىن وتە ماڭىزدى. «جاقسىنىڭ جاقسىلىعىن ايت» دەگەن حالقىمىز. بۇگىنگى تاريحقا ءادىل باعا بەرىلۋى ءۇشىن كەشەگى تاريح ءادىل باعالانۋعا ءتيىس، - دەدى مەملەكەت باسشىسى.
قاسىم-جومارت توقايەۆ ءسوزىن قورىتىندىلاي كەلە، قازاقستاننىڭ جەتىستىكتەرى بارشا حالقىمىزدىڭ ورتاق تابىسى ەكەنىن اتاپ ءوتىپ، ۇلىق مەيرام - رەسپۋبليكا كۇنىنە وراي ەلىمىزدى دامىتۋعا وراسان زور ۇلەس قوسىپ جۇرگەن ءبىر توپ ازاماتقا جوعارى ناگرادالاردى جانە مەملەكەتتىك سىيلىقتى سالتاناتتى تۇردە تابىستادى.
جيىندا «قازاقستاننىڭ ەڭبەك ەرى» اتاعىن العان تۇلعالار - پرەزيدەنت جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسىنىڭ ۆيتسە-پرەزيدەنتى، اكادەميك اسقار جۇمادىلدايەۆ، قاراعاندى وبلىسىنداعى «شاحتەرسكوە» جاۋاپكەرشىلىگى شەكتەۋلى سەرىكتەستىگىنىڭ ديرەكتورى گەورگي پروكوپ، سونداي-اق اباي اتىنداعى ادەبيەت پەن ونەر سالاسىنداعى مەملەكەتتىك سىيلىقتىڭ يەگەرى، جازۋشى قۇلبەك ەرگوبەك، «قازاقستاننىڭ ەڭبەك سىڭىرگەن دارىگەرى»، «ۇلتتىق عىلىمي مەديتسينالىق ورتالىعى» اكسيونەرلىك قوعامىنىڭ باس ديرەكتورى اباي بايگەنجين، «شاپاعات» مەدالىنىڭ يەگەرى، «Haileybury Astana» مەكتەبىنىڭ قازاق ءتىلى ءپانىنىڭ مۇعالىمى وزودا ماننوپوۆا ءسوز سويلەدى.
سونداي-اق بۇگىن پرەزيدەنت ەلىمىزدىڭ الەۋمەتتىك-ەكونوميكالىق ىلگەرىلەۋىنە ەلەۋلى ەڭبەك ءسىڭىرىپ جۇرگەن ءبىر توپ مەملەكەتتىك قىزمەتكەر مەن ۇلتتىق كومپانيالاردىڭ باسشىلارىنا مەملەكەتتىك ناگرادالار تاپسىردى.
