مەملەكەت باسشىسى پرەمەر-مينيستر ءاليحان سمايىلوۆتى قابىلدادى

استانا. KAZINFORM - پرەزيدەنتكە قازاقستاننىڭ 2023-جىلعى دامۋ قورىتىندىسى جانە الەۋمەتتىك-ەكونوميكالىق سالاداعى رەفورمالاردىڭ جۇزەگە اسىرىلۋى جونىندە باياندالدى.

پرەمەر-ءمينيستردىڭ ايتۋىنشا، ەل ەكونوميكاسىنىڭ ءوسىمى 5,1 پايىزدى قۇراعان. نەگىزگى كاپيتالعا سالىنعان ينۆەستيتسيا 13,7 پايىزعا ارتىپ، 39,5 ميلليارد دوللارعا دەيىن جەتتى. بۇل رەتتە بىلتىرعى 9 ايدا شەتەلدەن 19,7 ميلليارد دوللار كولەمىندە تىكەلەي ينۆەستيتسيا تارتىلعان. شاعىن جانە ورتا بيزنەس سالاسىندا جۇمىسپەن قامتىلعانداردىڭ سانى 14 پايىزعا (500 مىڭ ادامعا) ارتىپ، 4,3 ميلليون ادامعا دەيىن كوبەيدى. ۇكىمەتتىڭ ۇلتتىق بانكپەن جانە ءوڭىر اكىمدەرىمەن بىرلەسە اتقارعان شارالارىنىڭ ناتيجەسىندە ينفلياتسيا دەڭگەيى 2 ەسە، ياعني 9,8 پايىزعا دەيىن تومەندەدى.

سىرتقى تاۋار اينالىمى 2,2 پايىزعا ءوسىپ، 126 ميلليارد دوللاردى قۇرادى. ساۋدا بالانسىنىڭ وڭ سالدوسى 16 ميلليارد دوللاردان استى.

مەملەكەت باسشىسىنا ۇكىمەت بۇكىل الەۋمەتتىك مىندەتتەمەلەردى ۋاقىتىلى ءارى تولىق كولەمدە ورىنداپ وتىرعانى تۋرالى مالىمەت بەرىلدى. ورتاق زەينەتاقى مولشەرى بىلتىر 10,5 پايىزعا، ال جىل باسىنان بەرى تاعى دا 9 پايىزعا يندەكساتسيالاندى. مۇمكىندىگى شەكتەۋلى ازاماتتارعا جانە اسىراۋشىسىنان ايىرىلعان ادامدارعا تولەنەتىن جاردەماقى 23 پايىزعا ۇلعايدى. جالپى، ەلىمىزدىڭ 4,5 ميلليون ازاماتى الەۋمەتتىك قولداۋ شارالارىمەن قامتىلعان. ول ءۇشىن بيۋدجەتتەن 4,6 تريلليون تەڭگە بولىنگەن.

بۇگىندە ينۆەستيتسيالىق جوبالاردىڭ ءبىرىڭعاي پۋلىن جۇزەگە اسىرۋ جۇمىستارى جالعاسۋدا. وتكەن جىلدىڭ قورىتىندىسى بويىنشا قۇنى 1,8 تريلليون تەڭگە بولاتىن 298 جوبا ىسكە قوسىلدى. بيىل سوماسى 3,8 تريلليون تەڭگەنى قۇرايتىن تاعى 326 جوبانى، سونىڭ ىشىندە وڭدەۋ ونەركاسىبى سالاسىندا قۇنى 1,2 تريلليون تەڭگە بولاتىن 180 جوبانى ىسكە اسىرۋ جوسپارلانىپ وتىر. وسى رەتتە 15 مىڭ جاڭا جۇمىس ورنى اشىلماق.

پرەمەر-مينيستر كاسىپكەرلىكتى دامىتۋ جانە ينۆەستيتسيالىق احۋالدى جاقسارتۋ شارالارى، ەنەرگەتيكا جانە قۇرىلىس سالالارىندا رەفورما جۇرگىزۋ، سونداي-اق اگروونەركاسىپ كەشەنىنە جاڭا ادىستەردى ەنگىزۋ جۇمىستارى تۋرالى ايتتى.

بۇدان بولەك، پرەزيدەنتكە تۇرعىن ءۇي-كوممۋنالدىق ينفراقۇرىلىمدى جاڭعىرتۋ، حالىققا قىزمەت كورسەتۋ ساپاسى مەن ونىڭ سەنىمدىلىگىن ارتتىرۋ شارالارى جونىندە مالىمەت بەرىلدى. سونداي-اق قاسىم-جومارت توقايەۆقا «ۇلتتىق قور - بالالارعا» جوباسىنىڭ جۇزەگە اسىرىلۋ بارىسى، «كەلەشەك» ءبىرىڭعاي جيناقتاۋ جۇيەسىنىڭ ەنگىزىلۋى، دەنساۋلىق ساقتاۋ جانە تۋريزم سالالارىنىڭ دامۋى جايىندا باياندالدى.

كەزدەسۋ سوڭىندا قاسىم-جومارت توقايەۆ ەلىمىزدى الەۋمەتتىك-ەكونوميكالىق تۇرعىدان ودان ءارى دامىتۋ جونىندە ءبىرقاتار تاپسىرما بەردى.