مەملەكەت باسشىسى رەفەرەندۋمعا بەلسەنە قاتىسقان جاستارمەن اڭگىمەلەستى
استانا. KAZINFORM — قاسىم-جومارت توقايەۆ «قازمەديا» ورتالىعىندا رەسپۋبليكالىق رەفەرەندۋم اياسىنداعى ۇگىت- ناسيحات ناۋقانىنا بەلسەندى قاتىسقان جاستارمەن كەزدەستى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنت بۇگىن تاريحي كۇن ەكەنىن اتاپ ءوتىپ، جاستارعا ريزاشىلىعىن ءبىلدىردى.
- شىن مانىندە، بۇل كۇن ەل ومىرىندە ماڭگى ساقتالادى. ەندى 15 ناۋرىز - كونستيتۋتسيا كۇنى بولىپ بەلگىلەنەدى. بۇل - ەلىمىزدىڭ باستى قۇجاتى. مەن باسقا دا مەملەكەتتەردىڭ كونستيتۋتسيالارىمەن تانىسىپ شىقتىم. ءبىزدىڭ كونستيتۋتسيامىز ەڭ ۇزدىك اتا زاڭداردىڭ قاتارىندا تۇرادى دەپ سەنىممەن ايتا الامىن، - دەدى مەملەكەت باسشىسى.
سونىمەن قاتار پرەزيدەنت جاڭا كونستيتۋتسيا، ەڭ الدىمەن، جاستارعا ارنالعانىنا نازار اۋداردى. اتا زاڭعا ۆولونتەرلىك قىزمەت، عىلىم، يننوۆاتسيا، جاساندى ينتەللەكت سياقتى ۇعىمدار ەنگىزىلگەنىنە توقتالدى.
- اۋقىمدى ۇگىت-ناسيحات ناۋقانى جۇرگىزىلدى. الدىمىزدا جۇمىس كوپ. ەندى جازدا پارلامەنت سايلاۋى وتەدى. ونى ءبىر ەل بولىپ اتقارۋىمىز كەرەك. بۇل جاستاردىڭ پارلامەنتى بولۋى قاجەت دەپ ويلايمىن، - دەدى قاسىم-جومارت توقايەۆ.
كەزدەسۋدە «جاستار رۋحى» جاستار قاناتىنىڭ ءتوراعاسى اقەركە ەسكەندىروۆا، كرەاتيۆتى يندۋستريا وكىلى، كاسىپكەر كاميل بايراموۆ، بەلسەندى جاستار ەرجان حاميتوۆ پەن نۇربول سەرىكباي ءسوز سويلەدى.
جاستار ءبىر اي ىشىندە ءتۇرلى فورماتتا 5 مىڭعا جۋىق كەزدەسۋ وتكىزىپ، وعان 1,5 ميلليوننان اسا ازامات قاتىسقانىن جەتكىزدى. سونداي- اق ەلىمىزدە قولعا الىنعان وزگەرىستەردىڭ بارلىعىن قولدايتىنىن ايتتى.
ەسكە سالا كەتەيىك، مەملەكەت باسشىسى جاڭا كونستيتۋتسيا جوباسىنا قاتىستى رەفەرەندۋمدا داۋىس بەرگەننەن كەيىن جۋرناليستەرگە ارنالعان بريفينگ وتكىزدى.
