مەملەكەت باسشىسى گۋربانگۋلى بەردىمۇحامەدوۆپەن كەزدەستى

 قاسىم-جومارت توقايەۆ تۇركى مەملەكەتتەرى ۇيىمىنىڭ X سامميتىنە ءوزى ارنايى قاتىسقانى ءۇشىن گۋربانگۋلى بەردىمۇحامەدوۆكە ريزاشىلىعىن ءبىلدىردى، دەپ حابارلايدى Kazinform. 

قازاقستان پرەزيدەنتى تۇرىكمەنستان حالك ماسلاحاتىنىڭ توراعاسىمەن بۇگىنگى كەزدەسۋى باۋىرلاس ەكى ەل مەن ونىڭ حالىقتارى اراسىنداعى ءوزارا سەرىكتەستىكتىڭ ودان ءارى نىعايۋىنا ىقپال ەتەتىنىن اتاپ ءوتتى.

مەملەكەت باسشىسىنىڭ ايتۋىنشا، قازاق-تۇرىكمەن قارىم-قاتىناسى تابىستى دامۋدا جانە ستراتەگيالىق ارىپتەستىكتىڭ دەڭگەيىنە تولىق ساي كەلەدى.

- قازاقستاندا ءسىزدى تۇرىكمەنستاننىڭ كوشباسشىسى، زامانىمىزدىڭ كورنەكتى مەملەكەت قايراتكەرى رەتىندە تانيدى. ءسىز قازاقستان مەن تۇرىكمەنستان اراسىنداعى ىنتىماقتاستىقتىڭ دامۋىنا زور ۇلەس قوستىڭىز. سوندىقتان ءسىزدىڭ وسى جيىنعا كەلۋىڭىزدىڭ جانە بۇگىنگى كەزدەسۋىمىزدىڭ ساياسي ءمانى زور دەپ سانايمىن. ەكى ەلدىڭ ىنتىماقتاستىعىن ودان ءارى نىعايتۋ تۇرعىسىنان پىسىقتايتىن ورتاق ىستەرىمىز بار. ءبىز - باۋىرلاس ءارى كورشىلەس ەلدەرمىز. قازاقستان مەن تۇرىكمەنستان اراسىندا ەشقانداي تۇيتكىل جوق. ەكى ەل ءبىر-بىرىنە قاشاندا تىلەۋلەس، - دەدى مەملەكەت باسشىسى.

گۋربانگۋلى بەردىمۇحامەدوۆ تۇركى مەملەكەتتەرى ۇيىمىنىڭ مەرەيتويلىق سامميتىنە قاتىسۋعا شاقىرعانى ءۇشىن قاسىم- جومارت توقايەۆقا العىس ايتىپ، ەكى ەلدىڭ ىنتىماقتاستىعىن جوعارى باعالادى.

فوتو: اقوردا

- ءبىز وسى جىلدار ىشىندە سىرتقى ساياسات، ساۋدا-ەكونوميكالىق جانە مادەني-گۋمانيتارلىق بايلانىستارىمىز بويىنشا قۇقىقتىق بازا قالىپتاستىردىق. سىرتقى ساياسي ماسەلەدە سىزگە العىسىمىز شەكسىز. ءسىز ءبىزدىڭ بەيتاراپ ۇستانىمىمىزدى ءاردايىم قولداپ كەلەسىز. بۇدان بولەك بىرىككەن ۇلتتار ۇيىمى قۇرىلىمىندا باسشىلىق قىزمەت ىستەي ءجۇرىپ، ءبىزدىڭ سىرتقى ساياسي باعدارىمىز ءۇشىن كوپ جۇمىس اتقاردىڭىز. سول ءۇشىن سىزگە العىسىمىز شەكسىز، - دەدى تۇرىكمەنستان حالك ماسلاحاتىنىڭ ءتوراعاسى.

تاراپتار ءوزارا ساۋدا-ساتتىقتا وڭ ديناميكا بار ەكەنىن اتاپ ءوتىپ، ەنەرگەتيكا، ونەركاسىپ، كولىك، لوگيستيكا جانە باسقا دا سالالارداعى جوبالاردىڭ جۇزەگە اسىرىلۋ بارىسىن تالقىلادى.

سونىمەن قاتار كەزدەسۋ بارىسىندا قاسىم-جومارت توقايەۆ پەن گۋربانگۋلى بەردىمۇحامەدوۆ مادەني-گۋمانيتارلىق بايلانىستاردى ودان ءارى نىعايتۋعا دايىن ەكەنىن راستادى.