مەملەكەت باسشىسى قوستاناي اۋدانىنىڭ تۇرعىندارىمەن كەزدەستى
قوستاناي. KAZINFORM - پرەزيدەنت توبىل قالاسىندا ورنالاسقان جەدەل شتابتا سۋ تاسقىنىنان زارداپ شەككەن قوستاناي اۋدانىنا قاراستى اۋىلداردىڭ تۇرعىندارىمەن كەزدەستى.
كەزدەسۋدە قاسىم-جومارت توقايەۆ ازاماتتىق بەلسەندىلىك تانىتقان جانە اپاتقا بەي- جاي قاراماي جاناشىرلىق بىلدىرگەن بارشا جۇرتشىلىققا العىس ايتىپ، حالىقتىڭ بىرلىگى وسىنداي قيىن كەزەڭدە ايقىن كورىنەتىنىن اتاپ ءوتتى.
- مەن سىزدەرمەن جۇزدەسۋ ءۇشىن ارنايى كەلدىم. جاعدايدىڭ كۇردەلى ەكەنىن تۇسىنەمىن. مەملەكەتتىڭ بارلىق رەسۋرسى وسى ماسەلەنى شەشۋگە باعىتتالىپ جاتىر. پرەزيدەنت رەتىندەگى مەنىڭ باستى مىندەتىم -سۋ تاسقىنىنان زارداپ شەككەن تۇرعىندارعا بارىنشا كومەك كورسەتۋ،- دەدى مەملەكەت باسشىسى.
پرەزيدەنت مەملەكەتتىڭ قارجىسىن قاتاڭ ۇنەمدەۋ رەجيمى ەنگىزىلگەنىن، قاراجات زارداپ شەككەن حالىققا بولىنەتىنىن جەتكىزدى. مەملەكەت باسشىسى بارلىق زارداپ شەككەن تۇرعىندارعا قاجەتتى كومەك كورسەتىلەتىنىن ايتتى.
- وتەماقى-باستى ماسەلە. شىعىن وتەلەدى. سونىمەن قاتار تۇرعىن ءۇيى جارامسىز ازاماتتارعا جاڭا باسپانا سالىنادى جانە جوندەۋگە جارامدى ۇيلەر قايتا قالپىنا كەلتىرىلەدى. وعان قاجەتتى بارلىق قاراجات بولىنەدى. كىم پاتەرگە كوشكىسى كەلسە، ءبىز پاتەر ساتىپ الىپ بەرەمىز. كىم ءوز قونىسىندا قالعىسى كەلەدى، ولارعا تيپتىك ۇلگىدەگى ۇيلەر سالامىز. دەگەنمەن قاۋىپتى جەرلەردە قالۋعا مۇلدە بولمايدى. مۇنداي ۇيلەردىڭ جوباسى بار. بۇل ۇيلەر قىسقا دەيىن تولىقتاي سالىنادى. مەن ۇكىمەتكە الداعى جاز مەزگىلىندە، سونداي-اق كۇزدە بارلىق قۇرىلىس جۇمىستارىن ءبىتىرۋ جانە اپات سالدارىن تولىق جويۋ جونىندە مىندەت جۇكتەدىم،- دەدى پرەزيدەنت.
مەملەكەت باسشىسى سۋ تاسقىنىنىڭ سالدارىن ەڭسەرۋ ءۇشىن ءار ايماققا ەلدىڭ ءىرى كاسىپكەرلەرى بەكىتىلەتىنىن اتاپ ءوتتى.
ءوز كەزەگىندە تۇرعىندار سۋ تاسقىنىنىڭ زارداپتارىن جويۋعا جەدەل كومەك كورسەتىلىپ، قۇتقارۋ جۇمىستارىنىڭ ۋاقىتىلى جۇرگىزىلگەنى ءۇشىن العىستارىن ءبىلدىردى. ولاردىڭ ايتۋىنشا، بۇل اپات حالىقتىڭ بىرلىگىن ايقىن كورسەتتى. تابيعات اپاتىنىڭ العاشقى كۇندەرىنەن باستاپ ەرىكتىلەر، مەملەكەتتىك قىزمەتشىلەر، قۇقىق قورعاۋ ورگاندارى مەن توتەنشە جاعدايلار مينيسترلىگىنىڭ قىزمەتكەرلەرى، جالپى جاناشىر ادامداردىڭ بارلىعى جان- جاقتى كومەك كورسەتۋگە ۇمتىلعان.
بۇعان دەيىن حابارلاعانىمىزداي، مەملەكەت باسشىسى سولتۇستىك قازاقستان وبلىسىنا جۇمىس ساپارىمەن باردى. قاسىم-جومارت توقايەۆتىڭ جۇمىس ساپارى سەرگەيەۆكا سۋ قويماسىن، قىزىلجار اۋدانىن جانە پەتروپاۆل قالاسىنىڭ توڭىرەگىن تىكۇشاقپەن ارالاپ كورۋدەن باستالدى. سونداي-اق پرەزيدەنت پەتروپاۆل سۋ تورابىندا بولدى.
بۇگىن سونداي-اق مەملەكەت باسشىسى ساپار بارىسىندا تابيعي اپاتپەن كۇرەسىپ جۇرگەن ازاماتتارعا العىس ايتقانىن جازعان بولاتىنبىز.
سولتۇستىك قازاقستان وبلىسىنان كەيىن پرەزيدەنت بورتى قوستاناي وبلىسىنا ۇشىپ بارعانىن دا حابارلاعان ەدىك. مەملەكەت باسشىسى قوستاناي وبلىسىنداعى سۋ تاسقىنىنا بايلانىستى جاعدايمەن تانىسقان بولاتىن.
