مەملەكەت باسشىسى قورعانىس ءمينيسترى رۋسلان جاقسىلىقوۆتى قابىلدادى
استانا. KAZINFORM – ق ر قارۋلى كۇشتەرىنىڭ جوعارعى باس قولباسشىسىنا قورعانىس ۆەدومستۆوسىنىڭ بيىلعى ءبىرىنشى جارتىجىلدىقتا اتقارعان جۇمىستارى تۋرالى باياندالدى.
قاسىم-جومارت توقايەۆقا حالىقارالىق وقۋ- جاتتىعۋ جيىندارىنىڭ ناتيجەلەرى، جاۋىنگەرلىك دايىندىققا جاڭا ادىستەر ەنگىزۋ جونىندە مالىمەت بەرىلدى. سونداي- اق قارۋلى كۇشتەردىڭ جاۋىنگەرلىك جانە جۇمىلدىرۋ ازىرلىگىنە قاتىستى بۇعان دەيىن بەرىلگەن تاپسىرمالاردىڭ ورىندالۋ بارىسى جايىندا ايتىلدى. زاماناۋي قارۋ-جاراقپەن جانە اسكەري تەحنيكالارمەن قامتاماسىز ەتۋ، قورعانىس ينفراقۇرىلىمىن دامىتۋ، اسكەري-پاتريوتتىق جۇمىستاردى كۇشەيتۋ ماسەلەلەرىنە ەرەكشە نازار اۋدارىلدى.
رۋسلان جاقسىلىقوۆ اسكەري قىزمەتشىلەر مەن زەينەتكەرلەردى الەۋمەتتىك تۇرعىدان قولداۋدى ارتتىرۋ شارالارى تۋرالى ايتتى.
كەزدەسۋ سوڭىندا جوعارعى باس قولباسشى قورعانىس مينيسترىنە قازاقستان رەسپۋبليكاسى قارۋلى كۇشتەرىنىڭ الەۋەتىن ودان ءارى دامىتۋعا باعىتتالعان ءبىرقاتار تاپسىرما بەردى.
