مەملەكەت باسشىسى قاۋىپسىزدىك كەڭەسىنىڭ وتىرىسىن وتكىزدى

قاسىم- جومارت توقايەۆتىڭ توراعالىعىمەن ق ر قاۋىپسىزدىك كەڭەسىنىڭ وتىرىسى ءوتتى. جيىندا ازىق- تۇلىك قاۋىپسىزدىگىن قامتاماسىز ەتۋ جونىندەگى پروبلەمالار قاراستىرىلدى. kazinform بۇل تۋرالى اقورداعا سىلتەمە جاساپ حابارلايدى.

وتىرىس بارىسىندا ەلدىڭ ازىق- تۇلىك تاۋەلسىزدىگىن نىعايتۋعا قاتىستى ءبىرقاتار ماسەلە تالقىلاندى.

جيىننىڭ كۇن تارتىبىنە سايكەس پرەمەر- ءمينيستردىڭ ورىنباسارى سەرىك جۇمانعارين ءسوز سويلەدى. سونداي- اق قابىلدانعان جانە جوسپارلانعان شارالار تۋرالى ءبىرقاتار ۋاكىلەتتى مەملەكەتتىك ورگان باسشىلارى ەسەپ بەردى.

تالقىلاۋ ناتيجەسى بويىنشا مەملەكەت باسشىسى حالىقتى قولجەتىمدى ءارى ساپالى ازىق- تۇلىكپەن قامتاماسىز ەتۋ ماسەلەسىن نەگىزگى باسىمدىق رەتىندە اتاپ ءوتتى.

ازىق- تۇلىك تاۋارلارىن ءوندىرۋ مەن ساتۋدىڭ بارلىق ساتىسىندا باعا بەلگىلەۋدىڭ اشىق بولۋى، ءونىمسىز دەلدالدارمەن كۇرەس جۇرگىزۋدىڭ ماڭىزدى ەكەنىنە نازار اۋدارىلدى.

دەموگرافيالىق ۇردىستەردى ەسكەرە وتىرىپ، ازىق- تۇلىكتىڭ فيزيكالىق تۇرعىدا قولجەتىمدىلىگىنىڭ پەرسپەكتيۆالارى ەڭبەك ونىمدىلىگىنىڭ وسۋىنە، اۋىل شارۋاشىلىعى مەن وتاندىق اگرارلىق عىلىمنىڭ جاڭعىرۋىنا تىكەلەي بايلانىستى ەكەنى اتاپ ءوتىلدى.

جەردى توزۋدان قورعاۋ شارالارىن جانداندىرۋ وزەكتى ماسەلە بولىپ وتىر. سونداي- اق اۋىل شارۋاشىلىعى تەحنيكاسى پاركىن جاڭارتۋ پروتسەسىن جۇيەلى تۇردە ۇيىمداستىرۋ جانە جەرگىلىكتى جاعدايعا بەيىمدەلگەن مەنشىكتى تۇقىم قورىن قۇرۋ ءۇشىن جاڭا تاسىلدەر قاجەت.

بۇدان بولەك، اۋىل شارۋاشىلىعى سالاسىنا كورسەتىلەتىن مەملەكەتتىك قولداۋ شارالارىنا ەرەكشە نازار اۋدارىلدى.

- «سۋبسيديالاۋ اگروونەركاسىپ كەشەنىندەگى ونىمدىلىكتى ارتتىرۋعا ىقپال ەتۋگە ءتيىس. سۋبسيديانى ءبولۋ كەزىندە وڭىرلىك ەرەكشەلىكتەردى، ەگىس القاپتارىنىڭ كولەمىن جانە اۋىل شارۋاشىلىعى داقىلدارىن تاڭداۋدى ەسكەرگەن ءجون»، - دەدى قاسىم- جومارت توقايەۆ.

سونىمەن قاتار پرەزيدەنت ازىق- تۇلىك ونىمدەرىن وندىرۋمەن اينالىساتىن شارۋالار مەن كاسىپورىندارعا مەملەكەتتىك قولداۋ كورسەتۋدى تالاپ ەتەتىن ەكونوميكالىق كونيۋنكتۋرانى وزگەرتۋگە جەدەل نازار اۋدارۋ قاجەتتىگىنە نازار اۋداردى.

اۋىل شارۋاشىلىعى وندىرىسىنە ينفراقۇرىلىم تۇرعىسىنان قولداۋ كورسەتۋ ءىسى (اۋىلدا جۇمىس ورنىن اشۋ، فيتوسانيتاريالىق جانە ۆەتەريناريالىق قورعاۋ جۇيەسىنىڭ تيىمدىلىگىن ارتتىرۋ) ارنايى ماسەلە رەتىندە قاراستىرىلدى.

بۇل رەتتە قۇقىق قورعاۋ ورگاندارىنا اۋىل شارۋاشىلىعى ماقساتىنا ارنالعان سۋبسيديالار مەن جەرلەردى ءبولۋ كەزىندە سىبايلاس جەمقورلىققا قارسى كۇرەس جۇمىستارىن جالعاستىرۋ تاپسىرىلدى.

مەملەكەت باسشىسى جيىن سوڭىندا ۇكىمەت پەن ۋاكىلەتتى ورگاندارعا ازىق- تۇلىك تاۋەلسىزدىگىن نىعايتۋ، ازىق- تۇلىكتىڭ ەكونوميكالىق تۇرعىدا قولجەتىمدى بولۋىن ارتتىرۋ جانە وتاندىق اگروونەركاسىپ كەشەنىنىڭ الەۋەتىن اناعۇرلىم تولىق ىسكە اسىرۋ جونىندە ناقتى تاپسىرمالار بەردى.