مەملەكەت باسشىسى قاسىم-جومارت توقايەۆ ازەربايجان پرەزيدەنتى يلحام اليەۆپەن كەزدەسۋ وتكىزدى

акорда
Фото: Акорда

استانا. KAZINFORM - قازاقستان پرەزيدەنتى ش ى ۇ سامميتىنە قۇرمەتتى قوناق رەتىندە قاتىسقانى ءۇشىن يلحام اليەۆكە العىس ايتتى.

مەملەكەت باسشىسى قازاقستان مەن ازەربايجان اراسىنداعى ستراتەگيالىق سەرىكتەستىك پەن وداقتاستىق رۋحىندا دامىپ، جاڭا مازمۇنمەن جوسپارلى تۇردە تولىعىپ كەلە جاتقان جان-جاقتى ىنتىماقتاستىقتىڭ ديناميكاسىن جوعارى باعالادى.

- مەن باكۋگە جانە شۋشاعا جاساعان ساپارىمدى ۇنەمى ەسكە الامىن. بۇل، شىن مانىندە، بەتبۇرىستى، ماڭىزدى، تاريحي ءمانى بار ساپار بولدى دەسەك، ارتىق ايتقاندىق ەمەس. كەلىسسوزدەر بارىسىندا ءبىز ءبىرقاتار ستراتەگيالىق سالا بويىنشا ءوزارا ىقپالداستىقتى ودان ءارى دامىتۋعا تىڭ سەرپىن بەردىك، - دەدى قازاقستان پرەزيدەنتى.

ەكى ەل باسشىلارى ينۆەستيتسيا، ونەركاسىپ، ەنەرگەتيكا، كولىك جانە لوگيستيكا سالالارىنداعى بىرلەسكەن جوبالاردىڭ جۇزەگە اسىرىلۋ بارىسىن تالقىلادى. وسى ورايدا ترانسكاسپي حالىقارالىق كولىك باعدارىن ءتيىمدى پايدالانۋ ماسەلەسىنە ايرىقشا نازار اۋدارىلدى.

يلحام اليەۆ ءداستۇرلى تۇردە قۇرمەت كورسەتكەنى ءۇشىن قاسىم-جومارت توقايەۆقا العىس ايتىپ، مەملەكەتارالىق بايلانىستاردىڭ بارلىق باعىتى بويىنشا استانامەن ەكىجاقتى ىنتىماقتاستىقتى ودان ءارى نىعايتۋعا باكۋدىڭ بەيىلدى ەكەنىن راستادى

يلحام اليەۆ ازەربايجان مەن ارمەنيا اراسىنداعى كەلىسسوزدەر ۇدەرىسىنە اتسالىسقانى ءۇشىن قاسىم-جومارت توقايەۆقا العىس ايتتى. سونداي-اق قازاقستاننىڭ الەمدىك قوعامداستىقتىڭ لايىقتى مۇشەسى رەتىندە ايماقتا عانا ەمەس، حالىقارالىق ارەنادا دا ماڭىزدى ءرول اتقاراتىنىن اتاپ ءوتتى.

اڭگىمەلەسۋ بارىسىندا ساۋدا- ەكونوميكالىق جانە مادەني-گۋمانيتارلىق ىنتىماقتاستىقتى ودان ءارى تەرەڭدەتۋ پەرسپەكتيۆالارى قاراستىرىلدى. سونىمەن قاتار حالىقارالىق ۇيىمدار اياسىنداعى ىقپالداستىقتى ودان ءارى دامىتۋ ماسەلەلەرى جونىندە پىكىر الماستى.

كەزدەسۋ سوڭىندا ەكى ەل باسشىلارىنىڭ قاتىسۋىمەن «سامۇرىق-قازىنا» ا ق مەن Azerbaijan Investment Holding اراسىنداعى بىرلەسكەن ينۆەستيتسيالىق قوردى باسقارۋ تۋرالى كەلىسىمگە قول قويىلدى.

 

سوڭعى جاڭالىقتار