مەملەكەت باسشىسى Qarmet مەتاللۋرگيالىق كومبيناتىنا باردى
استانا. KAZINFORM - قاسىم-جومارت توقايەۆتىڭ قاراعاندى وبلىسىنا جۇمىس ساپارى تەمىرتاۋ قالاسىنداعى Qarmet مەتاللۋرگيالىق كومبيناتىن ارالاپ كورۋدەن باستالدى.
پرەزيدەنت №3 دومنا پەشىنىڭ جۇمىسىمەن تانىستى. مۇندا جىلىنا 3,8 ميلليون توننا شويىن وندىرىلەدى.
«Qarmet» اكسيونەرلىك قوعامى ديرەكتورلار كەڭەسىنىڭ ءتوراعاسى اندرەي لاۆرەنتيەۆ پەن كاسىپورىننىڭ باس ديرەكتورى ۆاديم باسين ءوندىرىستى دامىتۋ ءۇشىن اتقارىلعان جانە جۇزەگە اسىرىلىپ جاتقان جوبالار جونىندە باياندادى. بۇل ماقساتقا 3,5 ميلليارد دوللاردان استام قارجى قاراستىرىلعان. بۇدان بولەك 500 ميلليون دوللار شاماسىندا كومىر دەپارتامەنتىندەگى جانە 978 ميلليون دوللار كولەمىندە تەمىر رۋداسى دەپارتامەنتىندەگى جوبالارعا قوسىمشا ينۆەستيتسيا قۇيۋ جوسپارلانعان.
كاسىپورىن عيماراتتار مەن نىساندارعا اۋقىمدى جوندەۋ جۇمىستارىن جۇرگىزىپ جاتىر. بيىلعى جاڭعىرتۋ باعدارلاماسىنا 100-دەن استام نىسان ەنگەن. 50 مىڭ شارشى مەتر شاتىر اۋىستىرىلۋدا. سونىمەن قاتار بۇعان دەيىن قابىلدانعان «تازالىق» باعدارلاماسىنا سايكەس 120 سانيتاريالىق- تۇرمىستىق عيماراتقا كۇردەلى جوندەۋ جۇرگىزىلە باستادى.
مەملەكەت باسشىسىنا سلياب پەن بليۋم شىعاراتىن №2 كونۆەرتورلىق سەح پەن مەتالل ازىرلەمەلەرىن ۇزدىكسىز قۇيۋ ماشيناسىنىڭ جۇمىسى تانىستىرىلدى. كاسىپورىن باسشىلىعى بۇگىندە مەكەمەنىڭ تەحنيكالىق جاعدايىن بابىندا ۇستاپ تۇرۋ، جوندەۋ جۇيەسىن، سونداي- اق كريستالداندىرعىش اينالىم جۇيەلەرى مەن بارلىق ماشينا سەگمەنتتەرىن جەتىلدىرۋ باستى مىندەت ەكەنىن اتاپ ءوتتى. كەلەسى جىلى باسقارۋ جانە گيدراۆليكا جۇيەلەرىن جاڭعىرتۋ جۇمىستارى اتقارىلماق.
اندرەي لاۆرەنتيەۆتىڭ ايتۋىنشا، ىسكە اسىرىلىپ جاتقان جوبالار كومبينات جۇمىسىن تۇراقتاندىرىپ، كومپانيانىڭ «5-9-5» باعدارلاماسىنىڭ ورىندالۋىنا بولجام جاساۋعا مۇمكىندىك بەردى.
قابىلدانعان ستراتەگياعا سايكەس كاسىپورىن 2028 -جىلعا قاراي جىلىنا 5 ميلليون توننا بولات شىعارۋدى، 9 ميلليون توننا كومىر جانە 5 ميلليون توننا تەمىر رۋداسى كونسەنتراتىن ءوندىرۋدى جوسپارلاپ وتىر. بۇل 2023 -جىلعى كورسەتكىشتەرمەن سالىستىرعاندا ورتا ەسەپپەن 66 پايىز ءوسىمدى قامتاماسىز ەتەدى.
مەملەكەت باسشىسى كومبيناتتى تابيعي گازعا كوشىرۋ ماڭىزدى شەشىم ەكەنىن اتاپ ءوتتى. بۇل باستاپقى كەزەڭدە قورشاعان ورتاعا كەلەتىن زياندى 30 پايىزعا تومەندەتۋگە مۇمكىندىك بەرەدى. بيىل كۇزدە تەمىرتاۋ قالاسىندا ەكولوگيالىق تازا كولىك ءتۇرى - ترامۆاي جەلىسى قالپىنا كەلتىرىلەدى. پرەزيدەنت ونەركاسىپ قاۋىپسىزدىگى، ءوندىرىستىڭ تيىمدىلىگىن ارتتىرۋ جانە جاڭعىرتۋ، ايماقتىڭ ەكولوگيالىق احۋالىن جاقسارتۋ باعىتىندا جۇزەگە اسىرىلىپ جاتقان جوبالاردىڭ مەرزىمى مەن جوعارى ساپا ستاندارتتارىن قاتاڭ ساقتاۋ قاجەت ەكەنىنە باسا نازار اۋدارىپ، ءبىرقاتار ناقتى تاپسىرما بەردى.
- ءبىز وتاندىق ينۆەستوردى شاقىرۋ ارقىلى دۇرىس شەشىم قابىلدادىق. ولار بىردەن ىسكە كىرىستى. كومبيناتتاعى جاعداي بۇرىنعىمەن سالىستىرعاندا ايتارلىقتاي جاقسارعان. ءبىراق مۇنىمەن شەكتەلۋگە بولمايدى. ەڭ باستى مىندەت - Qarmet كاسىپورنىنىڭ باياعى داڭقىن قايتارىپ، الەۋمەتتىك ماسەلەلەردى شەشۋگە باسا ءمان بەرۋ. بۇل باعىتتاعى جۇمىس باستالىپ كەتتى. ودان حاباردارمىن. مەن كومبيناتقا جىل سايىن كەلىپ، ونىڭ دامۋ بارىسىمەن تانىسىپ تۇرامىن، - دەدى قاسىم-جومارت توقايەۆ.
قازىرگى كەزدە «Qarmet» اكسيونەرلىك قوعامىندا 34 مىڭنان استام جۇمىسشى ەڭبەك ەتەدى. مەتاللۋرگيالىق كومبيناتتىڭ وندىرىستىك قۋاتى جىلىنا 5,3 ميلليون توننا بولات وندىرۋگە جەتەدى. بىلتىر كاسىپورىن 2,9 ميلليون توننا دايىن ءونىم شىعارعان. ونىڭ 2,1 ميلليون تونناسى رەسەي، قىتاي، وزبەكستان، قىرعىزستان، تاجىكستان، تۇرىكمەنستان، گرۋزيا، ازەربايجان جانە اۋعانستان ەلدەرىنە ەكسپورتتالدى.
