مەملەكەت باسشىسى: ەنەرگەتيكا سالاسىنا قوسىمشا سەرپىن بەرۋ ءۇشىن ءتيىستى ينۆەستيتسيا سالامىز

دامۋ جانە شەت ەلدەن ينۆەستيتسيا تارتۋ قازاقستاننىڭ باستى باسىمدىقتارى بولىپ تابىلادى. بۇل تۋرالى مەملەكەت باسشىسى قاسىم-جومارت توقايەۆ جۋىردا Euronews تەلەارناسىنا بەرگەن سۇحباتىندا ايتتى، دەپ حابارلايدى Kazinform.

«قازاقستان دامۋىنىڭ جانە ينۆەستيتسيالاردىڭ الداعى باعىتى قانداي؟»، - دەپ سۇرادى تەلەارنا ءتىلشىسى ق ر پرەزيدەنتىنەن.

توقايەۆ قازاقستان جان باسىنا شاققاندا شەتەلدىك ينۆەستيتسيانى تارتۋ بويىنشا ورتالىق ازيادا، ءتىپتى ودان تىس شەڭبەردە ءبىرىنشى ورىندا تۇرعانىن جانە حالىقارالىق ينستيتۋتتار قازاقستاننىڭ حالىقارالىق رەيتينگىن كوتەرگەنىن اتاپ ءوتتى.

پرەزيدەنت ەنەرگەتيكا سالاسىنىڭ اسا ماڭىزدى ەكەنىن ايتا كەلە، قازاقستان ونىمەن ءبىر مەزگىلدە توتەنشە ماڭىزدى ماتەريالدار ازىرلەۋگە ءۇمىت ارتىپ وتىرعانىن جەتكىزدى.

«وسى تۇرعىدا ەۋروپالىق وداقپەن كەلەشەكتەگى ىنتىماقتاستىعىمىزعا ءۇمىت ارتامىز. وسى اسا نازىك جانە ستراتەگيالىق ماڭىزدى سالادا جاقسى سەرىكتەس بولۋعا دايىنبىز. بۇل دا ءبىزدىڭ باسىمدىقتارىمىزدىڭ ءبىرى»، - دەپ اتاپ وتكەن ق.توقايەۆ، قازاقستانعا بۇل سالادا حالىقارالىق ىنتىماقتاستىق جانە كوبىرەك ينۆەستيتسيا قاجەت ەكەنىن قوسىپ ءوتتى.

مەملەكەت باسشىسى قازاقستان مەن ەۋروپالىق وداق ءدال وسى توتەنشە ماڭىزدى ماتەريالدار سالاسىندا جاقسى سەرىكتەس بولىپ، ۇلكەن جەتىستىككە جەتەتىنىنە سەنىم ءبىلدىردى.

بۇدان ءارى ق ر پرەزيدەنتى ەنەرگەتيكالىق بيزنەس ەل ەكونوميكاسىنىڭ نەگىزگى تىرەكتەرىنىڭ ءبىرى ەكەنىن باسا ايتتى.

«قازاقستان ەنەرگەتيكالىق رەسۋرستارعا وتە باي جانە مۇنداي ەكونوميكالىق دامۋدان باس تارتۋدىڭ قاجەتى جوق. ارينە، ءبىز ەلدىڭ ەنەرگەتيكا سالاسىنا قوسىمشا سەرپىن بەرۋ ءۇشىن ءتيىستى ينۆەستيتسيالاردى سالامىز»، - دەدى توقايەۆ.

سونىمەن بىرگە قازاقستان باسشىسى 2060 -جىلدىڭ سوڭىنا دەيىن كومىرتەگى بەيتاراپتىعىنا تولىق قول جەتكىزۋ تۋرالى ەلدىڭ ءورشىل ماقساتى تۋرالى ەسكە سالدى.

قاسىم-جومارت توقايەۆتىڭ پىكىرىنشە، ول ءۇشىن قازاقستاندىقتار ءوز ويلارىن تۇبەگەيلى وزگەرتۋى كەرەك.

«بۇل بۇكىل الەمدە ەكونوميكالىق دامۋدىڭ جالپى ءۇردىسى ەكەنىن مويىندايمىن جانە قازاقستان ودان قالىس قالمايدى. ونىمەن ءبىر مەزگىلدە ءبىز قورشاعان ورتانى قورعاۋعا اسا ءمان بەرەمىز. ءيا، قازاقستان بۇرىنعىداي ەنەرگەتيكالىق بالانسى كومىرگە تاۋەلدى ەل بولىپ قالىپ وتىر. ءبىراق الداعى بولاشاقتا جاعداي ايتارلىقتاي وڭىنان وزگەرەدى دەپ ويلايمىن»، - دەدى ول.

اۆتور

گۇلميرا الياكپاروۆا