مەملەكەت باسشىسى ماۋلەن اشىمبايەۆتى قابىلدادى

استانا. KAZINFORM - ماۋلەن اشىمبايەۆ پرەزيدەنتكە سەناتتىڭ رەفورمالاردى زاڭنامالىق تۇرعىدان قامتاماسىز ەتۋ جۇمىستارىنىڭ وتكەن ايلارداعى قورىتىندىسى جانە الداعى كەزەڭگە ارنالعان جوسپارى جونىندە مالىمەت بەردى.

پرەزيدەنتتىڭ ەلىمىزدى جانە وڭىرلەردى دامىتۋعا باعىتتالعان تاپسىرمالارىنىڭ جۇزەگە اسىرىلۋى سەنات ءۇشىن نەگىزگى باسىمدىق سانالاتىنىن ايتتى.

قازىرگى ۋاقىتتا ايەلدەردىڭ قۇقىعى مەن بالالاردىڭ قاۋىپسىزدىگىن قامتاماسىز ەتۋ، دەنساۋلىق ساقتاۋ، ترانسفەرتتىك باعا بەلگىلەۋ، حالىقتىڭ كوشى-قونى، بايلانىس جانە سيفرلاندىرۋ، عىلىم جانە ءبىلىم ماسەلەلەرىنە قاتىستى زاڭدار سەناتورلاردىڭ قاراۋىندا جاتقانىن جەتكىزدى.

سەناتورلار عىلىم، سوت جۇيەسىن رەفورمالاۋ، ورگانيكالىق ونىمدەردىڭ اينالىمى، قاۋىپسىز ەڭبەك جاعدايىن جەتىلدىرۋ جانە جۇمىسشىلاردىڭ ەڭبەك قۇقىعىن قورعاۋ جونىندەگى 10 زاڭ جوباسىن ءماجىلىستىڭ قاراۋىنا ۇسىنعان.

بيىل بيۋدجەت، قۇرىلىس، سۋ، سالىق جانە سيفرلىق كودەكستەرىن، سونداي-اق «مەملەكەتتىك ساتىپ الۋ تۋرالى»، «ماسس-مەديا تۋرالى» جانە «جىلۋ ەنەرگەتيكاسى» تۋرالى زاڭ جوبالارىن قاراۋ جوسپارلانىپ وتىرعانىن مالىمدەدى.

مەملەكەت باسشىسىنىڭ تاپسىرماسىمەن قۇرىلعان قازاقستاننىڭ ورنىقتى دامۋ سالاسىنداعى ۇلتتىق ماقساتتارى مەن مىندەتتەرىنىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيانىڭ جۇمىسى تۋرالى باياندادى.

الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ قىزمەتىن تانىستىردى.

قازىرگى كەزدە سەزدى دامىتۋدىڭ 2023-2033 -جىلدارعا ارنالعان تۇجىرىمداماسى جۇزەگە اسىرىلىپ جاتىر.

سەناتتىڭ ءماسليحات دەپۋتاتتارىمەن اراداعى جۇمىس جاندانا تۇسكەنىن ايتتى.

بۇل ىسكە «ءوڭىر» دەپۋتاتتىق توبى مەن سەنات جانىنداعى جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەس بەلسەندى اتسالىسۋدا.

بيىل ەلىمىزدەگى ءماسليحات ينستيتۋتىنىڭ قۇرىلعانىنا 30 جىل تولادى.

وسىعان وراي ءساۋىر ايىندا حالىقارالىق كونفەرەنسيا وتكىزۋ جوسپارلانىپ وتىرعانىن جەتكىزدى.

پرەزيدەنت ەلىمىزدە جۇرگىزىلىپ جاتقان رەفورمالاردى زاڭنامالىق تۇرعىدان قولداۋدىڭ ءرولى زور ەكەنىن اتاپ ءوتتى.

قاسىم- جومارت توقايەۆ ايماقتاردىڭ دامۋىنا بارىنشا كومەك كورسەتۋ مەملەكەتتىك ساياساتتىڭ ماڭىزدى باعىتى دەپ سانايدى.

ونىڭ پىكىرىنشە، بۇل ىسكە جەرگىلىكتى وكىلدى ورگانداردىڭ دەپۋتاتتارىن كەڭىنەن تارتۋ قاجەت.