مەملەكەت باسشىسى ماجارستان پرەمەر-مينيسترىمەن كەلىسسوز جۇرگىزدى
استانا. KAZINFORM - قاسىم-جومارت توقايەۆ ۆيكتور وربانعا ءىلتيپات ءبىلدىرىپ، بىلتىر بۋداپەشت قالاسىنا جاساعان مەملەكەتتىك ساپارىن ىقىلاسپەن اتاپ ءوتتى. ونىڭ اياسىندا ءبىرقاتار ستراتەگيالىق ماڭىزدى كەلىسىمگە قول قويىلدى. بۇل تۋرالى اقوردا حابارلادى.
مەملەكەت باسشىسىنىڭ ايتۋىنشا، ناقتى ۋاعدالاستىقتارعا قول جەتكىزۋ، سونداي-اق استانا مەن بۋداپەشت اراسىنداعى ءوزارا تۇسىنىستىكتى نىعايتۋ تۇرعىسىنان اتالعان ساپار ناتيجەلى بولدى.
پرەزيدەنت ەكىجاقتى بايلانىستىڭ باسىم باعىتى رەتىندە ساۋدا-ەكونوميكالىق جانە ينۆەستيتسيالىق ىقپالداستىقتى اتادى. بىلتىر ءوزارا ساۋدا- ساتتىقتىڭ كولەمى 200 ميلليون دوللارعا جەتتى، وسى جىلدىڭ العاشقى توقسانىندا تاۋار اينالىمى 37 پايىزعا ءوستى.
قازاقستان ەكونوميكاسىنا قۇيىلعان ماجار ينۆەستيتسياسى 370 ميلليون دوللاردان استى. قازىر ەكى ەل ماشينا جاساۋ، اۋىل شارۋاشىلىعى جانە لوگيستيكا سالالارىندا 16 بىرلەسكەن ينۆەستيتسيالىق جوبانى جۇزەگە اسىرىپ جاتىر. ولاردىڭ قۇنى 700 ميلليون دوللارعا جۋىقتايدى.
پرەزيدەنت تۇركى مەملەكەتتەرى ۇيىمىنىڭ ەرتەڭگى بەيرەسمي ءسامميتىنىڭ ماڭىزىنا توقتالىپ، ەلىمىز ت م ۇ قىزمەتىنىڭ بارلىق باسىم باعىتى بويىنشا سىندارلى ديالوگتى جالعاستىرۋعا بەيىل ەكەنىن راستادى.
ۆيكتور وربان ساپارمەن كەلگەنى ءۇشىن قاسىم-جومارت توقايەۆقا العىس ايتىپ، قازاق- ماجار قاتىناستارىنىڭ ورنىقتى ءارى قارقىندى سيپات العانىنا نازار اۋداردى.
ماجارستان پرەمەر-ءمينيسترى سوڭعى جىلدارى ەكىجاقتى ىنتىماقتاستىق، اسىرەسە، ەكونوميكا سالاسىندا بەلسەندى دامىپ كەلە جاتقانىن جەتكىزدى.
سونىمەن قاتار سامميتتى ۇيىمداستىرۋعا جان-جاقتى قولداۋ كورسەتكەنى ءۇشىن ريزاشىلىعىن ءبىلدىردى.
كەزدەسۋدە بىلتىر جوعارى دەڭگەيدە وتكەن كەلىسسوزدەردىڭ قورىتىندىسى بويىنشا قول جەتكىزىلگەن ۋاعدالاستىقتاردىڭ، سونىڭ ىشىندە ەنەرگەتيكا، ساۋدا جانە ينۆەستيتسيا سالالارىنداعى بىرلەسكەن جوبالاردىڭ ورىندالۋ بارىسى تالقىلاندى.
بۇدان بولەك، تاراپتار حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
ايتا كەتەلىك پرەزيدەنت تۇركى مەملەكەتتەرى ۇيىمىنىڭ بەيرەسمي سامميتىنە قاتىسۋ ءۇشىن بۋداپەشتكە بارعان ەدى.
