مەملەكەت باسشىسى ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆتى قابىلدادى

استانا. KAZINFORM - ەرمەك ساعىمبايەۆ ۇلتتىق قاۋىپسىزدىك كوميتەتىنىڭ جىل باسىنان بەرى اتقارعان جۇمىسىنىڭ ناتيجەلەرى، ۆەدومستۆونى رەفورمالاۋ بارىسى جانە الداعى كەزەڭگە ارنالعان مىندەتتەر تۋرالى ەسەپ بەردى.

ول ۇلتتىق قاۋىپسىزدىككە تونەتىن قازىرگى سىن-قاتەرلەر مەن قاۋىپتەرگە بايلانىستى ۇ ق ك قىزمەتىن جەتىلدىرۋ شارالارى، سونىڭ ىشىندە نورماتيۆتىك-قۇقىقتىق بازانى دامىتۋ، كادرلىق الەۋەتتى نىعايتۋ، وزىق اقپاراتتىق تەحنولوگيالاردى ەنگىزۋ جانە قىزمەتتىك پروتسەستەردى بيۋروكراتيادان ارىلتۋ جايىندا باياندادى.

سونداي-اق ەلىمىزدە تەرروريستىك جانە ەكسترەميستىك ارەكەتتەرگە جول بەرمەۋ جۇمىستارىنىڭ كۇشەيتىلگەنى جونىندە ايتتى.

جىل باسىنان بەرى ۇقك ماتەريالدارى بويىنشا تەرروريزم مەن ەكسترەميزمگە قاتىسى بولعانى ءۇشىن 25 ادام سوتتالعان، سوتقا دەيىنگى تەرگەۋ امالدارى اياسىندا تاعى 13 ادام ۇستالعان.

ىشكى ىستەر مينيسترلىگىمەن بىرلەسىپ، 6 قىلمىستىق توپتىڭ ارەكەتىنە توسقاۋىل قويىلعان جانە 35 ادام تۇتقىندالعان.

زاڭسىز اينالىمنان 148 قارۋ، قولدان جاسالعان 5 جارىلعىش قۇرال، 32 گراناتا جانە 4431 وق-ءدارى تاركىلەنگەن.

ەسىرتكى بيزنەسىنە قارسى كۇرەس اياسىندا 16 وپەراتسيا جۇرگىزىلگەن. ەسىرتكى تاسىمالدايتىن 18 حالىقارالىق جانە 9 وڭىرلىك ارنا، سونداي-اق 10 ەسىرتكى زەرتحاناسى جويىلعان.

800 كەلىدەن استام ەسىرتكى جانە پسيحوتروپتىق زاتتار، 14 توننا حيميالىق رەاگەنتتەر مەن كوكنار شيكىزاتى تاركىلەنگەن.

ەكونوميكالىق قاۋىپسىزدىكتى قامتاماسىز ەتۋ جانە سىبايلاس جەمقورلىققا قارسى ءىس-قيمىل شەڭبەرىندە مەملەكەتكە 707 ميلليارد تەڭگەدەن استام سوما زالال كەلتىرۋگە جول بەرىلمەگەن جانە بيۋجەتكە 1,2 ميلليارد تەڭگە قايتارىلعان.

مەملەكەتتىك شەكارانى بۇزعان 7 مىڭنان استام ادام ۇستالعان.

شەكارا ارقىلى قارۋ-جاراق پەن وق-ءدارى، ەسىرتكى جانە باسقا دا تىيىم سالىنعان زاتتاردى تاسىمالداۋعا قاتىستى 395 ارەكەتتىڭ جولى كەسىلگەن.

سونداي-اق 3,2 ميلليارد تەڭگە كولەمىندەگى ۆاليۋتانى جانە قۇنى 7,6 ميلليارد تەڭگە بولاتىن تاۋارلاردى زاڭسىز وتكىزۋگە توسقاۋىل قويىلعان؛

مەملەكەتتىك ورگانداردىڭ اقپاراتتىق جۇيەلەرىنە جاسالعان 50,3 ميلليون كيبەر جانە 819 DDoS- شابۋىلعا تويتارىس بەرىلگەنى تۋرالى باياندادى.

پرەزيدەنت ۇلتتىق قاۋىپسىزدىك ورگاندارىنىڭ قىزمەت باعىتتارىنا قاتىستى ءبىرقاتار تاپسىرما بەردى.