مەملەكەت باسشىسى ۇكىمەت جۇمىسىنا باعا بەردى
استانا. KAZINFORM - ا ە س بويىنشا رەفەرەندۋمدا داۋىس بەرگەننەن كەيىن ب ا ق وكىلدەرىنە شاعىن سۇحبات بەرگەن مەملەكەت باسشىسى قاسىم-جومارت توقايەۆ ەل ۇكىمەتىنىڭ جۇمىسىن باعالادى.
«قازاقستان ۇكىمەتى قازىرگى قۇرامدا تۋرا 7 اي جۇمىس ىستەدى. رەفەرەندۋمنان كەيىن ونىڭ قۇرامى وزگەرەدى دەگەن بولجامدار ايتىلىپ ءجۇر. ۇكىمەتتىڭ جۇمىسىنا كوڭىلىڭىز تولا ما؟» - دەپ سۇرادى Kazinform ءتىلشىسى پرەزيدەنتتەن.
«مەنىڭشە، ۇكىمەت تىرىسىپ، بەلسەندى جۇمىس ىستەپ جاتىر. مەملەكەت باسشىسى رەتىندە مەن جۇكتەگەن تاپسىرمالاردى ورىنداپ كەلەدى. ب ا ق-تا كورىنە بەرمەۋى مۇمكىن، بىزدەگى جۇمىس وتە قاۋىرت. ويتكەنى، اقپاراتتاردى الىپ وتىرامىن. جالپى، مەن وقيتىن اداممىن. سوندىقتان بارلىق وقيعادان ۇنەمى حاباردارمىن. ارينە، مينيسترلەردىڭ، ۇكىمەت باسشىلىعىنىڭ جۇمىسىندا كەمشىلىكتەر بار. ءبىراق، 7 اي - قىسقا عانا مەرزىم. ۇكىمەت مۇشەلەرى وزدەرىن كورسەتۋى ءتيىس. باستى مىندەت - ەلىمىزدىڭ ەكونوميكالىق ءوسىم كوزدەرىن ىزدەۋ»، - دەپ جاۋاپ بەردى مەملەكەت باسشىسى.
ەسكە سالا كەتەيىك، بۇعان دەيىن مەملەكەت باسشىسى قاسىم-جومارت توقايەۆتىڭ ەلىمىزدە اتوم ەلەكتر ستانساسىن سالۋ بويىنشا رەفەرەندۋمدا داۋىس بەرگەنىن جازعان ەدىك.
اۆتور
مارلان جيەمباي