مەملەكەت باسشىسى جامبىل وبلىسىنىڭ اكىمى ەربول قاراشوكەيەۆتى قابىلدادى

Глава государства принял акима Жамбылской области
Фото: пресс-служба Акорды

استانا. KAZINFORM - پرەزيدەنتكە جامبىل وبلىسىنىڭ بىلتىرعى الەۋمەتتىك-ەكونوميكالىق دامۋى تۋرالى ەسەپ بەرىلدى.

قاسىم-جومارت توقايەۆقا وتكەن جىلدىڭ قورىتىندىسى بويىنشا وبلىستىڭ نەگىزگى ماكروەكونوميكالىق كورسەتكىشتەرىندە وڭ ديناميكا بايقالاتىنى جونىندە باياندالدى. اتاپ ايتقاندا، نەگىزگى كاپيتالعا قۇيىلعان ينۆەستيتسيا 17,3 پايىزعا ارتىپ، 517,2 ميلليارد تەڭگەنى قۇراعان. سونداي-اق كولىك تاسىمالى سالاسى - 5,2 پايىز، قۇرىلىس - 18,7 پايىز، بايلانىس - 7,2 پايىز، پايدالانۋعا بەرىلگەن تۇرعىن ءۇي كولەمى - 4,7 پايىز وسكەن.

ەربول قاراشوكەيەۆتىڭ ايتۋىنشا، 2023-جىلى وبلىستا جالپى قۇنى 75 ميلليارد تەڭگە بولاتىن 13 جاڭا ءوندىرىس ىسكە قوسىلدى. بيىل جالپى سوماسى 180 ميلليارد تەڭگەدەن اساتىن تاعى 28 جوبانى ىسكە اسىرۋ جوسپارلانىپ وتىر. جالپى، ينۆەستيتسيالىق جوبالار پۋلىنا قۇنى 2,3 تريلليون تەڭگەنى قۇرايتىن 69 جوبا ەنگەن. ولاردى ىسكە اسىرۋ ارقىلى 5,5 مىڭ ادامدى جۇمىسپەن قامتۋعا بولادى.

پرەزيدەنتكە شاعىن جانە ورتا بيزنەس سۋبەكتىلەرى 864,9 ميلليارد تەڭگەنىڭ ءونىمىن وندىرگەنى جونىندە مالىمەت بەرىلدى. اتالعان سالادا جۇمىسپەن قامتىلعاندار سانى 18,5 پايىزعا ارتقان.

سونىمەن قاتار قاسىم-جومارت توقايەۆقا وبلىستاعى اگروونەركاسىپ كەشەنىنىڭ دامۋ بارىسى جونىندە ايتىلدى. وڭىردە سۋ شارۋاشىلىعى نىساندارىن سالۋ جانە جاڭعىرتۋ جۇمىستارى ءجۇرىپ جاتىر. «اۋىل اماناتى» باعدارلاماسى اياسىندا بيىل سۋ ۇنەمدەۋ جانە بالىق شارۋاشىلىعىن دامىتۋ جوبالارىنا قوسىمشا قارجى بولىنەدى.

وبلىس اكىمى ايتۋىنشا، بىلتىر 2030 وقۋشىعا ارنالعان 7 مەكتەپ پايدالانۋعا بەرىلگەن. ال بيىل 13380 ورىنعا ەسەپتەلگەن 29 ءبىلىم بەرۋ نىسانىنىڭ قۇرىلىسى باستالادى. ونىڭ ىشىندە 12 ءبىلىم ورداسى «جايلى مەكتەپ» ۇلتتىق جوباسى اياسىندا سالىنباق.

بۇدان بولەك، 19 دەنساۋلىق ساقتاۋ نىسانى، سونىڭ ىشىندە تاراز قالاسىندا وبلىستىق ونكولوگيالىق ديسپانسەر جانە شۋ اۋدانىندا بالالاردى وڭالتۋ ورتالىعى اشىلدى.

كەزدەسۋ سوڭىندا قاسىم-جومارت توقايەۆ جامبىل وبلىسى اكىمىنە ءوڭىردى الەۋمەتتىك-ەكونوميكالىق تۇرعىدان ودان ءارى دامىتۋعا جانە تۇرعىنداردىڭ تابىسىن ارتتىرۋعا باعىتتالعان ءبىرقاتار تاپسىرما بەردى.

سوڭعى جاڭالىقتار