مەملەكەت باسشىسى شاحتەرلەردى ماراپاتتاۋ تۋرالى جارلىققا قول قويدى

استانا. KAZINFORM - پرەزيدەنت شاحتەرلەردى ماراپاتتاۋ تۋرالى جارلىققا قول قويدى. بۇل تۋرالى اقوردانىڭ باسپا ءسوز قىزمەتى حابارلادى.

قازاقستان رەسپۋبليكاسى پرەزيدەنتى قاسىم-جومارت توقايەۆتىڭ جارلىعىمەن شاحتەر كۇنى قارساڭىندا وتاندىق كومىر ونەركاسىبى سالاسىنداعى جەمىستى ەڭبەگى جانە كەن يگەرۋ ءىسىن دامىتۋعا قوسقان ۇلەسى ءۇشىن ءبىر توپ شاحتەر مەن سالا قىزمەتكەرلەرى مەملەكەتتىك ناگرادالارمەن ماراپاتتالدى.

اتاپ ايتقاندا، 36 شاحتەر «قۇرمەت» وردەنىنىڭ كاۆالەرى اتاندى. 1 قىزمەتكەر Ⅱ دارەجەلى «ەڭبەك داڭقى» وردەنىمەن، 27 كەنشى Ⅲ دارەجەلى «ەڭبەك داڭقى» وردەنىمەن ماراپاتتالىپ، 43 ازامات «ەرەن ەڭبەگى ءۇشىن» مەدالىنىڭ يەگەرى بولدى.