مەملەكەت باسشىسى «دوستىق - مويىنتى» تەمىرجولىنىڭ ەكىنشى جەلىسىن ىسكە قوستى
استانا. KAZINFORM - قاسىم-جومارت توقايەۆ New Silk Way VII حالىقارالىق كولىك-لوگيستيكا بيزنەس- فورۋمىنىڭ اشىلۋىمەن قۇتتىقتاپ، بۇگىنگى ءىس- شارانىڭ ءمان- ماڭىزى ەرەكشە ەكەنىنە توقتالدى.
- ءبارىمىز «دوستىق - مويىنتى» تەمىرجولىنىڭ ەكىنشى جەلىسىنىڭ رەسمي اشىلۋىنا كۋا بولىپ وتىرمىز. «دوستىق - مويىنتى» جولى - شىن مانىندە اسا ماڭىزدى ينفراقۇرىلىم جوباسى. بۇل جوبا قازاقستاننىڭ كولىك- لوگيستيكا جۇيەسىنىڭ دامۋىنا، ونىڭ تيىمدىلىگىن نىعايتۋعا ايرىقشا سەرپىن بەرەتىنى ءسوزسىز. ال تاريحىمىزعا ۇڭىلسەك، وسىدان وتىز بەس جىل بۇرىن «دوستىق - الاشاڭقاي» جوباسى ىسكە قوسىلدى. قازاقستان مەن قىتايدىڭ تەمىرجولى توعىستى. بۇل ەلىمىز ءۇشىن تاريحي وقيعا بولدى. سول جولدى سالعان ارداگەرلەرىمىز ءقازىر وسى جيىنعا قاتىسىپ وتىر. بارشاڭىزعا زور العىسىمدى ايتامىن. مەن حالىققا جولداۋىمدا، كولىك- لوگيستيكا سالاسى - ەكونوميكانىڭ قوزعاۋشى كۇشى، حالىقارالىق بايلانىستى نىعايتاتىن نەگىزگى فاكتوردىڭ ءبىرى دەپ اتاپ ءوتتىم. قازاقستاننىڭ بۇل سالاداعى الەۋەتى زور. ۇلى جىبەك جولى قازاقستان مەن ورتالىق ازيا ارقىلى وتكەن. قازاق جەرى ەجەلدەن قىتاي مەن ەۋروپا اراسىنداعى التىن كوپىر سانالادى. قىتاي - ءبىزدىڭ ماڭگى، تاتۋ كورشىمىز ءارى سەنىمدى وداقتاسىمىز. ءبىز ءبىر- بىرىمىزگە ءاردايىم قولداۋ كورسەتەمىز. قوس حالىقتىڭ قارىم- قاتىناسى مىزعىماس دوستىققا، ءوزارا سەنىمگە نەگىزدەلگەن. ەلدەرىمىزدىڭ بولاشاققا دەگەن كوزقاراسى - ورتاق. كوپ سالاداعى ىنتىماقتاستىعىمىز نىعايۋدا. اسىرەسە، «ءبىر بەلدەۋ، ءبىر جول» جاھاندىق جوباسىنىڭ ءمان- ماعىناسى ايرىقشا. بارشاڭىزعا ءمالىم، 2013 -جىلى ءتوراعا شي جينپيڭ بۇل باستامانى قازاقستاندا جاريالادى. ءبىز وسى جوبانى بارىنشا قولدايمىز، ونى جۇزەگە اسىرۋعا بەلسەنە اتسالىسىپ جاتىرمىز. سەبەبى بۇل باستاما ەلىمىزدىڭ مۇددەسىنە تولىق ساي كەلەدى. «دوستىق - مويىنتى» تەمىرجولىنىڭ ەكىنشى جەلىسى - سونىڭ ايقىن دالەلى، - دەدى پرەزيدەنت.
قاسىم-جومارت توقايەۆ قازاقستان ارقىلى الەمنىڭ ەڭ ءىرى ساۋدا نارىقتارىنا جول اشاتىن 5 تەمىرجول ءدالىزى وتەتىنىن ايتتى
مەملەكەت باسشىسىنىڭ ايتۋىنشا، بۇل - تاۋەلسىزدىك كەزەڭىندەگى ەڭ ءىرى تەمىرجول قۇرىلىسى، ەلىمىز ءۇشىن ايرىقشا ستراتەگيالىق ماڭىزى بار جوبا.
- جۇمىسشىلارىمىز ءۇش جىلعا جۋىق ۋاقىت بويى كۇنى-ءتۇنى تاباندى ەڭبەك ەتتى. وسىنداي بەلسەندى جۇمىستىڭ ارقاسىندا تەمىرجول مەرزىمىنەن بۇرىن ىسكە قوسىلماق. مۇنى، شىن مانىندە، تاريحي ءسات دەۋگە بولادى. بۇل - بارشاڭىزعا ورتاق قاجىرلى ەڭبەكتىڭ جەمىسى. ءبارىڭىزدى شىن جۇرەكتەن قۇتتىقتايمىن! زور ريزاشىلىعىمدى بىلدىرەمىن. جاڭا جول جۇك تاسىمالىنىڭ كولەمىن 5 ەسە ارتتىرۋعا مۇمكىندىك بەرەدى. سونداي-اق ەكسپورتتىق تاۋارلاردى جەتكىزۋ ۋاقىتىن قىسقارتىپ، ترانزيتتىك الەۋەتىمىزدى كۇشەيتە تۇسەدى، - دەدى قاسىم-جومارت توقايەۆ.
پرەزيدەنت ەلىمىزدىڭ بۇگىندە ەۋرازياداعى باستى ترانزيت حابىنىڭ بىرىنە اينالعانىن اتاپ ءوتتى.
- قازاقستان سولتۇستىك پەن وڭتۇستىكتى، باتىس پەن شىعىستى جالعاپ تۇر. جەرىمىز ارقىلى 5 تەمىرجول ءدالىزى وتەدى. ونىڭ ءبارى الەمنىڭ ەڭ ءىرى ساۋدا نارىقتارىنا جول اشادى. ءبىز كولىك-لوگيستيكا ينفراقۇرىلىمىن دامىتۋعا باسا ءمان بەرەمىز. سوڭعى ون جىلدا وسى سالاعا شامامەن 35 ميلليارد دوللار ينۆەستيتسيا سالىندى. مەن حالىققا جولداۋىمدا ءبىرقاتار جوبانى ۋاقتىلى جۇزەگە اسىرۋ تۋرالى ناقتى تاپسىرما بەردىم. الداعى ۋاقىتتا 5 مىڭ شاقىرىم تەمىرجول سالۋ جوسپارلانىپ وتىر. سونداي-اق 11 مىڭ شاقىرىم تەمىرجول جوندەلەدى. قازىر «مويىنتى - قىزىلجار» تەمىرجولى سالىنىپ جاتىر. قىزىلجار ستانتسياسىنان اقتاۋ پورتىنا دەيىنگى ۋچاسكەلەر جاڭعىرتىلادى. بۇل باعدار - ترانسكاسپي حالىقارالىق كولىك باعدارىنىڭ باستى بولىگى. مۇنىڭ ءبارى ەۋروپا پەن ازيانىڭ اراسىن جالعاپ، ترانس- قازاقستان تەمىرجول باعىتىنىڭ، ياعني ورتا ءدالىزدىڭ قارقىندى دامۋىنا ىقپال ەتەدى. جالپى، باسەكەگە قابىلەتتى ەل بولۋ ءۇشىن ەكونوميكامىزدىڭ مەيلىنشە قۋاتتى بولۋىنا باسا نازار اۋدارۋىمىز كەرەك. بۇل رەتتە، كولىك- لوگيستيكا سالاسىنىڭ ورنى بولەك. سوندىقتان قازاقستاننىڭ ترانزيتتىك الەۋەتىن ارتتىرۋ نەگىزگى باسىمدىقتىڭ ءبىرى بولىپ قالا بەرمەك. تەمىرجول سالاسىنىڭ الدىندا تۇرعان مىندەتتەر - ايقىن، - دەدى پرەزيدەنت.
مەملەكەت باسشىسى الداعى ۋاقىتتا بۇل سالاعا سيفرلاندىرۋ جانە جاساندى ينتەللەكت تەحنولوگياسىن ەنگىزە وتىرىپ، ونى ەل ەكونوميكاسىنىڭ وزىق باعىتى رەتىندە دامىتۋ كوزدەلگەنىنە، الدا ءالى دە اۋقىمدى جۇمىس تۇرعانىنا، سول سەبەپتى بارلىق جوسپاردى ۋاقتىلى، دەر كەزىندە ورىنداۋ وتە ماڭىزدى ەكەنىنە نازار اۋداردى.
سونداي-اق تەلەكوپىردە كولىك ءمينيسترى نۇرلان ساۋرانبايەۆ، «قازاقستان تەمىر جولى» ۇ ك» ا ق باسقارما ءتوراعاسى تالعات الدىبەرگەنوۆ، «قازاقستاننىڭ ەڭبەك ەرى»، تەمىر جول سالاسىنىڭ ارداگەرى قالتاي سامبەتوۆ ءسوز سويلەدى.
