مەملەكەت باسشىسى دۇنيەجۇزىلىك زياتكەرلىك مەنشىك ۇيىمىنىڭ باس ديرەكتورىن قابىلدادى
استانا. KAZINFORM - مەملەكەت باسشىسى دۇنيەجۇزىلىك زياتكەرلىك مەنشىك ۇيىمىنىڭ باس ديرەكتورى دارەن تانگتى قابىلدادى، دەپ حابارلايدى اقوردانىڭ باسپا ءسوز قىزمەتى.
اڭگىمەلەسۋ بارىسىندا زياتكەرلىك مەنشىك سالاسىنداعى قازاقستاننىڭ الەۋەتىن ارتتىرۋعا، ەكوجۇيەنى نىعايتۋعا جانە ورنىقتى ءبىلىم ەكونوميكاسىن قۇرۋعا باعىتتالعان بىرلەسكەن باستامالار تالقىلاندى.
قاسىم-جومارت توقايەۆ بولاشاققا باعدارلانعان ينتەللەكتۋالدى مەنشىكتىڭ بەرىك نەگىزىن قالاۋدا ۇيىم ەلىمىزدىڭ ەڭ باستى سەرىكتەسى ەكەنىن اتاپ ءوتتى.
قازىرگى كەزدە زياتكەرلىك مەنشىك قۇرامداس بولىگى بار ۇلتتىق يننوۆاتسيالىق ستراتەگيانى ازىرلەۋ جوباسى ىسكە قوسىلدى. بۇل عىلىمي زەرتتەۋلەردى ىنتالاندىرۋعا، وزىق تەحنولوگيالاردى دامىتۋعا جانە جاعىمدى يننوۆاتسيالىق ورتا قالىپتاستىرۋعا باعىتتالعان. سونداي-اق قازاقستان ۇيىممەن بىرلەسە وتىرىپ، تەحنولوگيا مەن يننوۆاتسيانى قولداۋ ورتالىعى جوباسىن جۇزەگە اسىرادى.
دارەن تانگ ەلىمىزدە قابىلدانعان شارالاردىڭ ناقتى ناتيجە بەرىپ جاتقانىن ايتتى. بىلتىر قازاقستان جاھاندىق يننوۆاتسيالىق رەيتينگتەگى ورنىن جاقسارتقان بولاتىن.
بۇعان دەيىن مەملەكەت باسشىسى Google كومپانياسىنىڭ ورتالىق جانە شىعىس ەۋروپا بويىنشا ۆيتسە-پرەزيدەنتى پاتريك ۆورنكينگتى قابىلداعانىن جازعانبىز.
اۆتور
اينۇر تۋماكبايەۆا
