مەملەكەت باسشىسى Cameco كورپوراتسياسىنىڭ پرەزيدەنتى تيم گيتتسەلدى قابىلدادى
نيۋ-يورك. KAZINFORM - پرەزيدەنتتىڭ نيۋ-يورك قالاسىنداعى جۇمىس ساپارى كانادالىق ترانسۇلتتىق كومپانيانىڭ باسشىسىمەن كەزدەسۋدەن باستالدى. جۇزدەسۋدە ۋران ءوندىرۋ سالاسىنداعى ىنتىماقتاستىق پەرسپەكتيۆاسى تالقىلاندى. بۇل تۋرالى اقوردانىڭ باسپا ءسوز قىزمەتى حابارلادى.
قاسىم-جومارت توقايەۆ Cameco «قازاتومونەركاسىپ» ۇلتتىق كومپانياسىنىڭ بۇرىننان كەلە جاتقان سەنىمدى سەرىكتەسى ەكەنىن اتاپ ءوتتى. ەلىمىزدە قىزمەت ەتە باستاعاننان بەرى اتالعان كومپانيا 500 ميلليون دوللاردان استام ينۆەستيتسيا قۇيعان ءارى تەحنولوگيالار ترانسفەرتىنە ىقپال ەتكەن.
مەملەكەت باسشىسىنىڭ ايتۋىنشا، قازاقستان ەنەرگەتيكانى دامىتۋدىڭ جاڭا كەزەڭىنە ءوتىپ، الداعى ۋاقىتتا ءۇش اتوم ەلەكتر ستانساسىن سالۋدى كوزدەپ وتىر. ەلىمىز اتوم سالاسىندا قولدانىلاتىن يننوۆاتسيالىق تاسىلدەرگە قىزىعۋشىلىق تانىتادى.
تيم گيتتسەل پرەزيدەنتكە «ينكاي» بىرلەسكەن كاسىپورنىنىڭ قازىرگى قىزمەتى مەن جوسپارلارى جونىندە اقپارات بەردى. بۇل كومپانيا تۇركىستان وبلىسىندا ورنالاسقان كەن ورنىن شيرەك عاسىردان بەرى يگەرىپ كەلەدى.
بۇعان دەيىن پرەزيدەنت قاسىم-جومارت توقايەۆتىڭ نيۋ- يورككە جۇمىس ساپارى باستالعانىن جازعان ەدىك.
