مەملەكەت باسشىسى ۆالەنتينا ماتۆيەنكومەن كەزدەستى
استانا. KAZINFORM - پرەزيدەنت قاسىم- جومارت توقايەۆ رەسەيدىڭ فەدەرالدىق جينالىسى فەدەراتسيا كەڭەسىنىڭ ءتوراعاسى ۆالەنتينا ماتۆيەنكومەن كەزدەسۋ وتكىزدى.
قاسىم- جومارت توقايەۆ فەدەراتسيا كەڭەسى ءتوراعاسىنىڭ ساپارى پارلامەنتارالىق بايلانىستى نىعايتۋ تۇرعىسىنان عانا ەمەس، قازاقستان مەن رەسەيدىڭ كوپ جوسپارلى ستراتەگيالىق سەرىكتەستىگىن بارلىق باعىتتا ودان ءارى ارتتىرۋ ءۇشىن ماڭىزدى ەكەنىن ايتتى.
- مەملەكەتتەرىمىز اراسىنداعى قارىم- قاتىناس قارقىندى دامىپ كەلەدى. جاقىندا ءبىزدىڭ ەلىمىزگە ۆلاديمير ۆلاديميروۆيچ پۋتين مەملەكەتتىك ساپار جاسادى. بۇل ستراتەگيالىق سەرىكتەستىكتى، ەكى ەل اراسىنداعى وداقتاستىقتى دامىتۋعا تىڭ سەرپىن بەردى. مەن ەكىجاقتى ىقپالداستىقتىڭ بولاشاعى زور دەپ ويلايمىن، - دەدى پرەزيدەنت.
قاسىم- جومارت توقايەۆتىڭ ايتۋىنشا، بۇل ۇدەرىستە پارلامەنتارالىق ديپلوماتيا ايرىقشا رولگە يە. پرەزيدەنت دەپۋتاتتار قازاقستان مەن رەسەي اراسىنداعى ءوزارا ءتيىمدى ىنتىماقتاستىقتى ىلگەرىلەتۋگە ايتارلىقتاي ۇلەس قوسادى دەپ سانايدى.
ءوز كەزەگىندە ۆالەنتينا ماتۆيەنكو قوناقجايلىق تانىتقانى ءۇشىن قاسىم- جومارت توقايەۆقا ريزاشىلىعىن ءبىلدىرىپ، قازاقستانعا زور ىقىلاسپەن جانە پارلامەنتتىك ۇلكەن دەلەگاتسيانى باستاپ كەلگەنىن ايتتى. ول رەسەي پرەزيدەنتىنىڭ سالەمىن جەتكىزىپ، ۆلاديمير پۋتين استاناعا جاساعان ساپارىنىڭ قورىتىندىسىن جوعارى باعالاعانىن اتاپ ءوتتى.
- رەسەي پرەزيدەنتىنىڭ قازاقستانعا ساپارى وتە تابىستى ءارى ناتيجەلى بولدى. ەڭ باستىسى، ءوزارا ءتيىمدى جانە قۇرمەتكە نەگىزدەلگەن ءبىزدىڭ ىنتىماقتاستىعىمىزدىڭ قارقىنى ارتىپ كەلەدى. قازاقستان مەن رەسەي پرەزيدەنتتەرىنىڭ بىرلەسكەن كۇش- جىگەرىنىڭ ارقاسىندا ەكىجاقتى قارىم- قاتىناس بۇرىن- سوڭدى بولماعان دەڭگەيگە جەتتى. تاۋار اينالىمى، ينۆەستيتسيا، وندىرىستەگى ءىرى جوبالار، ەنەرگەتيكا، اۋىل شارۋاشىلىعى سەكىلدى قاي سالانى الىپ قاراساق تا، ەكى ەل اراسىنداعى بەرىك ستراتەگيالىق سەرىكتەستىك پەن وداقتاستىقتىڭ ناعىز ۇلگىسىن كورەمىز، - دەدى ۆالەنتينا ماتۆيەنكو.
كەزدەسۋدە ساۋدا- ەكونوميكالىق جانە مادەني- گۋمانيتارلىق ىنتىماقتاستىقتىڭ وزەكتى ماسەلەلەرى تالقىلاندى.
