مەملەكەت باسشىسى پاكىستان پرەمەر- ءمينيسترى شاحباز ءشاريفتى قۇتتىقتادى
استانا. KAZINFORM - پرەزيدەنت قاسىم-جومارت توقايەۆ پاكىستان يسلام رەسپۋبليكاسىنىڭ تاۋەلسىزدىك كۇنىنە وراي پرەمەر- مينيستر شاحباز شاريفكە قۇتتىقتاۋ جەدەلحاتىن جولدادى. بۇل تۋرالى اقوردانىڭ باسپا ءسوز قىزمەتى حابارلادى.
- الەۋمەتتىك-ەكونوميكالىق دامۋدا ەلەۋلى تابىسقا جەتكەن ءسىزدىڭ ەلىڭىز ازيادا جانە الەمدىك ارەنادا لايىقتى ورىنعا يە. پاكىستان گۇلدەنگەن ءارى ورنىقتى قوعام قۇرۋ جولىندا الداعى ۋاقىتتا دا جاڭا بەلەستەردى باعىندىراتىنىنا سەنىمدىمىن، - دەپ جازىلعان جەدەلحاتتا.
مەملەكەت باسشىسى قازاقستاننىڭ پاكىستاندى ايماقتاعى نەگىزگى سەرىكتەستەردىڭ ءبىرى رەتىندە قاراستىراتىنىن اتاپ ءوتىپ، قوس حالىقتىڭ يگىلىگى ءۇشىن سان قىرلى ىنتىماقتاستىقتى ودان ءارى نىعايتۋعا دايىن ەكەنىن جەتكىزدى.
بۇعان دەيىن مەملەكەت باسشىسىنىڭ قاۋىپسىزدىك كەڭەسىنىڭ وتىرىسىن وتكىزگەنىن حابارلاعان بولاتىنبىز.
