مۋمباي، توكيو، سينگاپۋر، شانحاي جانە نيۋ-يورك قالالارىنا اۆيارەيستەر اشىلادى

  2024-2025 -جىلدارى مۋمباي، توكيو، سينگاپۋر، شانحاي جانە نيۋ- يورك قالالارىنا اۆيارەيستەر اشىلادى. بۇل تۋرالى ۇكىمەت وتىرىسىندا كولىك ءمينيسترى مارات قارابايەۆ ايتتى، دەپ حابارلايدى Kazinform.

«ىشكى اۆياتاسىمالداۋدى 5 قازاقستاندىق تاسىمالداۋشى جۇزەگە اسىرادى. اپتاسىنا 644 رەيس ورىندالادى، بۇل وتكەن جىلمەن سالىستىرعاندا 7 پايىزعا ارتىق. ۇشۋ قولجەتىمدىلىگىن قامتاماسىز ەتۋ جانە ىشكى ءتۋريزمدى دامىتۋ ماقساتىندا اۆيامارشرۋتتاردى سۋبسيديالاۋ مەحانيزمدەرى قولدانىلادى. بيىل حالىقتى قولجەتىمدى اۋە تاسىمالدارىمەن قامتاماسىز ەتۋ ءۇشىن 9 وبلىستا 23 اۆيامارشرۋتتى سۋبسيديالاۋعا رەسپۋبليكالىق بيۋدجەتتەن 6 ميلليارد 900 ميلليون تەڭگە ءبولىندى. كەلەسى جىلى بۇل قاراجات تاعى دا ۇلعايىپ، 8 ميلليارد 200 ميلليون تەڭگەگە جەتىپ وتىر»، - دەدى ول.

ءمينيستردىڭ دەرەگىنشە، قازىرگى ۋاقىتتا 28 ەلمەن 110 باعىتتا رەيستەر ورىندالادى. سوڭعى ەكى جىلدا ميلان، دوحا، ابۋ- دابي، ەل- كۋۆەيت جانە باسقا دا قالالارعا 32 حالىقارالىق اۆيامارشرۋت اشىلدى.

«الداعى 2024-2025 -جىلدارى مۋمباي، توكيو، سينگاپۋر، شانحاي جانە نيۋ-يورك قالالارىنا رەيستەر اشىلاتىن بولادى. وسى جىلى قازاقستانعا ۇشۋعا 6 شەتەلدىك اۆياكومپانياعا رۇقسات بەرىلدى. وعان قوسا، «اشىق اسپان» رەجيمىنە تۇزەتۋلەر ەنگىزىلىپ، «اۋە ەركىندىگىنىڭ» بەسىنشى دارەجەسىن پايدالانۋعا بارلىق شەكتەۋلەر الىنىپ تاستالدى. ناتيجەسىندە، 2024 -جىلعى 14-ناۋرىزدان باستاپ ازيالىق ءىرى لوۋ- كوست «Air Asia» كومپانياسى الماتى - كۋالا- لۋمپۋر باعىتىندا رەيستەردى ورىنداۋعا كىرىسەدى جانە «اشىق اسپان» رەجيمىن قولدانا وتىرىپ، الماتىدان ءارى قاراي دجيددا قالاسىنا رەيستەردى ورىندايتىن بولادى. بۇنىڭ بارلىعى نارىقتا باسەكەلەستىكتى كۇشەيتەدى جانە بيلەتتەردىڭ قولجەتىلىمدىگىن ارتتىرادى»، - دەدى مارات قارابايەۆ.