مەكتەپتەردە بۋللينگتى ازايتقان باعدارلاما ەندى بۇكىل ەلگە ەنگىزىلەدى
استانا. KAZINFORM - ەلىمىزدىڭ 9 وڭىرىندە مەكتەپتە بۋللينگتىڭ الدىن الۋعا جانە ونى ازايتۋعا باعىتتالعان وتاندىق «دوسبولlike» باعدارلاماسىنىڭ اپروباتسياسى ءساتتى اياقتالدى، دەپ حابارلايدى وقۋ-اعارتۋ مينيسترلىگى.

ەلىمىزدىڭ 9 وڭىرىندە مەكتەپتە بۋللينگتىڭ الدىن الۋعا جانە ونى ازايتۋعا باعىتتالعان وتاندىق «دوسبولlike» باعدارلاماسىنىڭ اپروباتسياسى ءساتتى اياقتالدى. باعدارلاماعا ەلىمىزدەگى 50 مەكتەپتەن شامامەن 70 مىڭ وقۋشى مەن 5,5 مىڭنان استام پەداگوگ قاتىستى.
باعدارلامانى جۇزەگە اسىرۋ بىرنەشە كەزەڭنەن تۇردى: قازىرگى احۋالدى دياگنوستيكالاۋ، مەكتەپىشىلىك بۋللينگتىڭ الدىن الۋ جۇيەسىن قۇرۋ، پەداگوگتەردى وقىتۋ جانە اتا-انالاردى تارتۋ. ءاربىر مەكتەپ دياگنوستيكانىڭ ناتيجەلەرىنە سۇيەنە وتىرىپ، بارلىق قاتىسۋشىلاردىڭ - وقۋشىلار، مۇعالىمدەر مەن اتا-انالاردىڭ قاتىسۋىمەن بۋللينگكە دەن قويۋدىڭ ءوز مودەلىن قالىپتاستىردى.
اپروباتسيا قورىتىندىسى بويىنشا وقۋشىلار مەن پەداگوگتەر اراسىندا جۇرگىزىلگەن ساۋالنامالار مەكتەپ ورتاسىندا ايتارلىقتاي وڭ وزگەرىستەر بولعانىن كورسەتتى. اتاپ ايتقاندا، 2025 -جىلى بۋللينگكە قاتىسۋشى اگرەسسورلاردىڭ (بۋللەرلەردىڭ) ۇلەسى 2024 -جىلمەن سالىستىرعاندا %1,5 عا تومەندەدى. سونىمەن قاتار، وزدەرىن جابىرلەنۋشى سەزىنەتىن وقۋشىلاردىڭ (ۆيكتيمدەردىڭ) سانى %5,4 عا ازايدى. بۇعان قوسا، سەنىم ارتا الاتىن، سىرىن بولىسە الاتىن ەرەسەك تالىمگەرى بار بالالاردىڭ سانى ءۇش ەسە وسكەن.
- اپروباتسيا بارىسىندا جۇيەلى ءتاسىلدىڭ جانە بارلىق تاراپتىڭ - وقۋشىلاردىڭ، پەداگوگتەردىڭ، اتا- انالاردىڭ بەلسەندى قاتىسۋىنىڭ تيىمدىلىگى دالەلدەندى. ءبىز تەك جانجالدار سانىنىڭ ازايعانىن عانا ەمەس، سونىمەن قاتار مەكتەپ قاۋىمداستىعى ىشىندەگى سەنىم مەن قولداۋدىڭ ارتقانىن كورىپ وتىرمىز. بۇل - قاۋىپسىز ءارى قولداۋشى ورتا قالىپتاستىرۋدىڭ باستى شارتى، - دەيدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
ايتا كەتەيىك، بۋللينگكە قارسى باعىتتالعان «دوسبولlike» باعدارلاماسى 2025 -جىلعى 1-قىركۇيەكتەن باستاپ ەلىمىزدەگى بارلىق مەكتەپتەر مەن كوللەدجدەردە ەنگىزىلە باستايدى. قازىرگى ۋاقىتتا ونى اۋقىمدى تۇردە ىسكە اسىرۋ ءۇشىن دايىندىق جۇمىستارى جۇرگىزىلىپ جاتىر.
بۇعان دەيىن وقۋ-اعارتۋ ءمينيسترى عاني بەيسەمبايەۆ مەكتەپتەر ءبىر اۋىسىمدى وقىتۋ جۇيەسىنە قادام باسقانىن ايتقان ەدى.