مەكتەپتە جىنىستىق تاربيە تۋرالى ءپان ەنگىزۋ كەرەك پە - مينيستر جاۋابى

استانا. KAZINFORM - وقۋ-اعارتۋ ءمينيسترى عاني بەيسەمبايەۆ مەكتەپ باعدارلاماسىنا جىنىستىق قاتىناس تاربيەسىن ەنگىزۋگە قاتىستى پىكىر ءبىلدىردى.

ۇكىمەت وتىرىسىنان كەيىن وتكەن باسپا ءسوز ءماسليحاتىندا ۆەدومستۆو باسشىسىنا «مەكتەپتە جىنىستىق تاربيە بەرەتىن ءپان ەنگىزۋ كەرەك پە؟» دەگەن ساۋال قويىلدى.

- مەنىڭ ويىمشا، ەڭ الدىمەن اتا-انالاردىڭ جاۋاپكەرشىلىگىن ارتتىرۋ دۇرىس بولادى، ويتكەنى بۇل ءاردايىم سولاي بولعان، ياعني وتباسىندا تاربيەلەنگەن. سول سەبەپتى ءبىز ارنايى اتا-انالاردى پەداگوگيكالىق قولداۋ ورتالىقتارىن اشتىق. مەن پسيحولوگتارعا سول جەردە اتا-انالاردى بالالارمەن قالاي قارىم-قاتىناس جاساۋ كەرەك، بالالاردى قالاي تاربيەلەۋ كەرەك دەگەن ماسەلەلەر بويىنشا بارىنشا اعارتۋ جۇمىستارىن جۇرگىزسىن دەپ تاپسىرما بەردىم، - دەپ جاۋاپ بەردى عاني بەيسەمبايەۆ.

وسىلايشا، مينيستر جالپى تاربيەمەن قاتار جىنىستىق قاتىناسقا قاتىستى تاربيەنى دە بالا اتا-انادان الۋى ءتيىس دەپ ەسەپتەيدى.

- ارينە، مەكتەپ تە بۇل جاۋاپكەرشىلىكتەن قاشپايدى، ءبىراق بۇكىل جاۋاپكەرشىلىكتى تەك مەكتەپكە ارتۋ دۇرىس ەمەس دەپ ويلايمىن. مەكتەپ بۇل جاۋاپكەرشىلىكتەن باس تارتىپ جاتقان جوق. ءبىز ء«بىرتۇتاس تاربيە» باعدارلاماسى اياسىندا ءتيىستى ءىس-شارالار وتكىزىپ جاتىرمىز، ءبىراق تىكەلەي جىنىستىق قاتىناس ماسەلەسى ەمەس. بۇل تاربيە، ەڭ الدىمەن، اتا-انالار تاراپىنان جۇرگىزىلۋى ءتيىس. سوندىقتان، اتا-انالار وسى ىسپەن اينالىسسا، بۇل وتە جاقسى بولادى دەپ سانايمىن. ءبىز بۇل باعىتتا قولداۋ كورسەتەمىز، - دەپ تولىقتىردى ۆەدومستۆو باسشىسى.

ءمينيستردىڭ مالىمدەۋىنشە، جاقىن ارادا مەكتەپتەردە جىنىستىق قاتىناس تاقىرىبىن قوزعايتىن ءپان نەمەسە ساباق وقىتىلمايدى.

ايتا كەتەيىك، ۇكىمەت باسشىسى مەكتەپ ءبىتىرۋ كەشىندە بالالاردىڭ قاۋىپسىزدىگىنە ەرەكشە نازار اۋدارۋ قاجەتتىگىن ايتتى.