مەكتەپ تاعامدارىندا قانت پەن تۇزدىڭ مولشەرى ازايتىلادى

استانا. قازاقپارات - قىركۇيەكتەن باستاپ مەكتەپ اسحانالارىندا جاڭا ستاندارت ەنگىزىلەدى، دەپ حابارلايدى 24KZ.

 وقۋشىلارعا ۇسىنىلاتىن اس-اۋقاتتا قانت پەن تۇزدىڭ مولشەرى ازايتىلادى ءارى بالالاردىڭ ۇلتتىق ەرەكشەلىگىنە دە ءمان بەرىلەتىن كورىنەدى. سونداي-اق الداعى ۋاقىتتا ءبىلىم وردالارىنداعى اسحانالار الدىن الا ەسكەرتۋسىز تەكسەرىلمەك.

 بۇل شارا وقۋشىلاردى قۇنارلى دا ساپالى اسپەن قامتاماسىز ەتۋ باعىتىندا قولعا الىنىپ وتىر. سوڭعى جىلدارى جاپپاي تاماقتان ۋلانۋ جيىلەدى. 2024 -جىلدىڭ ستاتيستيكاسىن سويلەتسەك. بىلتىر ەلدە 18 جاپپاي ۋلانۋ دەرەگى تىركەلگەن ەكەن. ونىڭ %61,1 جاپپاي تاماقتانۋ ورىندارىندا. %11,1 دايىن تاعامنان ۇشىنعاندار. قالعان %27,8- ءى ءبىلىم ورىندارىندا بولعان بىلىق. ءيا، %27- ءى مەكتەپ اسحانالارىمەن بايلانىستى. بۇل جۇزدەگەن بالا مەكتەپتەگى اسحانانىڭ اسىن ءىشىپ، اۋرۋحانادان شىقتى دەگەن ءسوز.

 ترانس مايلار دەگەنىمىز - ترانسفورماتسيالانعان، تابيعاتى وزگەرگەن مايلار. ياعني ونداي ونىمدەر بالالاردى ەرتە جۇرەك اۋرۋىنا الىپ كەلۋى مۇمكىن. ارتىق سالماق پەن سەمىزدىككە. ەرتە قاتەرلى ىسىكتەردى تۋىنداتۋى مۇمكىن. سوندىقتان وسىنداي اۋرۋلاردىڭ الدىن الۋدىڭ تاعى ءبىر ءتيىمدى جولى - ولاردى شەكتەۋ نەمەسە مازىردەن مۇلدە الىپ تاستاۋ.

  ەندى بالالاردىڭ ءىشىپ-جەمىن ءبىرجولا ءوز قولىنا العان دەنساۋلىق ساقتاۋ مينيسترلىگى ەسكى مازىردەن قۇتىلماق. سوزدەرىنشە، بۇرىنعى مازىردە قانتتىڭ دا تۇزدىڭ دا مولشەرى شامادان كوپ بولعان.

كامشات مۇرات قىزى، ق ر د س م سانيتاريالىق-ەپيدەميولوگيالىق باقىلاۋ كوميتەتىنىڭ باس ساراپشىسى:

- وسى مازىردە ەرەكشەلىكتەرىنە كەلەتىن بولساق، قانت، تۇز، ماي مولشەرىن ازايتۋ بولىپ تابىلادى. كوكونىستەن، جەمىس-جيدەكتەر مولشەرىن كوبەيتۋ بولىپ تابىلادى. سونداي-اق قۇرامىندا تۇزى كوپ تاماق ونىمدەرىن، شۇجىق ونىمدەرىن، ياعني بالالاردىڭ دەنساۋلىعىنا زيان كەلتىرەتىن بارلىق تاماق ونىمدەرىن الىپ تاستاۋ كوزدەلگەن.

«سەبەبى بەرىلىپ جۇرگەن ىستىق تاماقتىڭ دەنى قوقىسقا توگىلىپ جاتىر»، - دەيدى تاعامتانۋ سالاسىنىڭ ماماندارى. بالانىڭ قانشالىقتى ساپالى ءارى پايدالى تاماق جەپ جۇرگەنىنە ءمان بەرۋ قاجەت. ءارى ءمازىر بالالاردىڭ جاسىنا جانە ەتنوستىق ەرەكشەلىككە ساي جاسالۋ كەرەك دەپ وتىر.

 جاڭا نورمالار كۇشىنە ەنسە، ەشقانداي ەسكەرتۋسىز، الدىن الا حابارلاما جىبەرمەستەن مەكتەپ اسحانالارىنا باسا كوكتەپ بارىپ، تەكسەرىس جۇرگىزۋگە رۇقسات ەتىلەدى.