مەكتەپ تە، ەمحانا دا جوق: الماتى اكىمى رەنوۆاتسيا باعدارلاماسىن سىنعا الدى
الماتى. KAZINFORM - الماتى اكىمى جەتىسۋ اۋدانىنداعى تۇرعىن ۇيلەردى جوندەۋ باعدارلاماسىمەن بارىسىمەن تانىستى.
الماتى اكىمدىگىنەن ءمالىم ەتكەندەي، كرىلوۆ- سكريابين- گونچاروۆ- رايىمبەك كوشەلەرى ارالىعىنداعى اۋماقتا 16 ءۇي بۇزىلىپ، تۇرعىندار جاڭادان سالىنعان 9 ۇيگە كوشىرىلدى.
بۇدان بولەك، تاعى 2 ءۇيدىڭ قۇرىلىسى ءجۇرىپ جاتىر. بوتكين-كازاكوۆ- گونچاروۆ- سكريابين- رايىمبەك داڭعىلىنىڭ بويىندا 6 ءۇي ءسۇرىلىپ، 3 ءۇي تۇرعىزىلدى.
سونداي-اق 8 ءۇيدىڭ قۇرىلىسى ءجۇرىپ جاتىر، ولاردى 2027 -جىلعا دەيىن پايدالانۋعا بەرۋ جوسپاردا. سونىمەن قاتار، جاڭعىرتۋ باعدارلاماسىنان تىس جەكە ينۆەستيتسيا ەسەبىنەن 10 ەسكى ءۇي مەن 11 جەكە تۇرعىن ءۇيدى بۇزۋ كوزدەلگەن.
- 100 مىڭ شارشى مەتر ءۇي سالىندى، بىردە-ءبىر مەكتەپ، بىردە-ءبىر بالاباقشا، بىردە-ءبىر ەمحانا جوق. مۇنىڭ ءبارىن دۇرىس ەسەپتەۋلەرىڭىز كەرەك. ارحيتەكتورىمىزعا ءبارىن قايتا ەسەپتەۋدى تاپسىرامىن، - دەدى دارحان ساتىبالدى.
اۋداندا حالىق سانىنىڭ وسۋىنە بايلانىستى 4 مىڭنان استام وقۋشى ورنى جەتىسپەيدى.
شاھار اكىمى 1200 وقۋشىعا ارنالعان جاڭا مەكتەپتىڭ قۇرىلىسىمەن تانىستى. مەكتەپ تۇرعىزىپ جاتقان مەردىگەر كومپانيا 4 مىڭ پاتەرلىك تۇرعىن ءۇي كەشەنىن دە سالىپ جاتىر، ونىڭ 2,3 مىڭىن جۇمىسشى جاستار مەن حالىقتىڭ الەۋمەتتىك وسال توپتارىن باسپانامەن قامتۋعا ارنالعان الەۋمەتتىك باعدارلامالار اياسىندا اكىمدىك ساتىپ الماق.
وسىنى ەسكەرىپ، قالا باسشىسى ءبىلىم بەرۋ نىسانىنىڭ قۇرىلىسىن بارىنشا جەدەلدەتۋدى تالاپ ەتتى.
- ەگەر مەكتەپتى ۋاقىتىندا تاپسىرماساڭىزدار - ءبىز الەۋمەتتىك باعدارلامالار ءۇشىن پاتەر ساتىپ المايمىز. ەشقانداي ءسوز بولمايدى، تاپسىرماساڭىزدار -ساتىپ المايمىز، - دەدى دارحان ساتىبالدى.
ەسكە سالايىق، بىلتىر ءماسليحات شەشىمىمەن الماتى قالاسىنىڭ 2030 -جىلعا دەيىنگى جاڭا تۇرعىن ءۇيدى رەنوۆاتسيالاۋ باعدارلاماسى بەكىتىلگەن بولاتىن.
قازىر الماتى قالاسىندا 43 مىڭنان استام ادام تۇراتىن 1366 توزىعى جەتكەن ءۇي بار، 2025 -جىلى باعدارلاماعا سايكەس 78 ەسكى ءۇي بۇزىلادى. باعدارلاما اياسىندا 2030 -جىلعا دەيىن 676 ەسكى كوپپاتەرلى تۇرعىن ۇيگە رەنوۆاتسيا جۇرگىزۋ جوسپارلانىپ وتىر.
اۆتور
الما مۇقانوۆا
