مەكسيكادا مەرلىككە ۇمىتكەردى سايلاۋشىلارمەن كەزدەسۋ كەزىندە اتىپ ءولتىردى

استانا. KAZINFORM - مەكسيكانىڭ گەررەرو شتاتىنداعى كويۋكا دە بەنيتەس قالاسىنىڭ مەرلىگىنە وپپوزيتسيالىق وڭشىل «كۇش جانە مەكسيكا ءۇشىن جۇرەك» اليانسىنان ۇمىتكەر حوسە الفرەدو كابرەرا بارريەنتوس سايلاۋشىلارمەن كەزدەسۋ كەزىندە اتىپ ءولتىرىلدى. بۇل تۋرالى «el Universal» حابارلادى.

Мексикада мэрлікке үміткер сайлаушылармен кездесу кезінде оққа ұшты
Фото: Видеодан алынған скрин

بۇل شتاتتا سايلاۋ ناۋقانى كەزىندە مەرلىككە بەس ۇمىتكەر مەن ءبىر دەپۋتات قازا تاپتى. ساياساتكەر باسكەتبول الاڭىنداعى سايلاۋشىلاردىڭ اراسىندا بولعان كەزدە، بەلگىسىز بىرەۋ ونىڭ ارتىنان جاقىنداپ كەلىپ، تاپانشاسىن الىپ، باسىنان بىرنەشە رەت اتقان. كىسى ءولتىرۋ ءساتىنىڭ ۆيدەوسى الەۋمەتتىك جەلىدە جاريالاندى. بەينەجازبادا كەم دەگەندە 15 رەت وق اتىلعان داۋىس ەستىلەدى.

ءبىر كۇن بۇرىن حاليسكو شتاتىندا مەكسيكانىڭ باسقارۋشى «مورەنا» پارتياسىنان ەنكارناسيون دە دياس مۋنيتسيپاليتەتىنىڭ باسشىسىنا ۇمىتكەر گيلبەرتو پالومار گونسالەس قارۋلى شابۋىلدان جاراقات العان. ساياساتكەر جارالانعان اعاسى جانە حاتشىسىمەن بىرگە اۋرۋحاناعا جەتكىزىلدى.

«Laboratorio Electoral» زەرتتەۋشىلەرىنىڭ مالىمەتىنشە، مەكسيكادا 2023 -جىلدىڭ جازىنان بەرى سايلاۋ ناۋقانىنا بايلانىستى 82 ادام قازا تاپقان. ولاردىڭ 34 ءى مەملەكەتتىك ساياسي قىزمەتكە كانديدات بولدى. جالپى العاندا، 2023 جانە 2024 -جىلدار ارالىعىندا ساياساتكەرلەرگە جاسالعان زورلىق- زومبىلىقتىڭ 2172 وقيعاسى، سونىڭ ىشىندە شابۋىلدار، قوقان- لوقىلار جانە ادام ۇرلاۋ وقيعالارى تىركەلگەن.

مەكسيكادا جالپى سايلاۋ 2-ماۋسىمدا وتەدى. ولار الداعى التى جىلعا جاڭا پرەزيدەنتتى، سونداي- اق دەپۋتاتتار پالاتاسىنىڭ 500 مۇشەسى مەن سەناتتىڭ 128 مۇشەسىن، توعىز گۋبەرناتور مەن 19 مىڭ جەرگىلىكتى شەنەۋنىكتى سايلايدى.

سوڭعى جاڭالىقتار