مەكسيكا Google كورپوراتسياسىن سوتقا بەردى
استانا. KAZINFORM - مەكسيكا ۇكىمەتى Google كورپوراتسياسىن ا ق ش- تاعى پايدالانۋشىلار ءۇشىن Google Maps قولدانباسىندا مەكسيكا شىعاناعىنىڭ اتاۋىن امەريكا شىعاناعى دەپ وزگەرتكەنى ءۇشىن سوتقا بەردى. بۇل تۋرالى ەل پرەزيدەنتى كلاۋديا شەينباۋم مالىمدەدى، دەپ حابارلايدى The Guardian.
- سوتقا تالاپ ارىز بەردىك، ارىز ءالى قارالۋ كەزەڭىندە، - دەدى ول.
25-قاڭتاردا ا ق ش پرەزيدەنتى دونالد ترامپ مەكسيكا شىعاناعىن امەريكاعا، ال الياسكاداعى دەنالي شىڭىن ماككينليگە اۋىستىرۋعا بۇيرىق بەرگەن ەدى. بۇل سولتۇستىك امەريكاداعى ەڭ بيىك نۇكتە جانە باستاپقىدا 1901-جىلى قاستاندىقپەن ولتىرىلگەن پرەزيدەنت ۋيليام ماككينليدىڭ قۇرمەتىنە اتالعان. ءبىراق 2015-جىلى باراك وباما ماككينليدى امەريكانىڭ جەرگىلىكتى تۇرعىندارى قولداناتىن دەنالي اتاۋىنا اۋىستىردى. بۇل الياسكادا تۇراتىن حالىقتىڭ وتىنىشىمەن جانە ەكى نەگىزگى پارتيا وكىلدەرىنىڭ قولداۋىمەن بولدى.
- ءبىزدى الاڭداتاتىن جالعىز نارسە – ا ق ش ۇكىمەتىنىڭ مەكسيكا شىعاناعىنىڭ اتاۋىن امەريكا شىعاناعى اتاۋىنا وزگەرتۋ تۋرالى بۇيرىعىنىڭ ورىندالۋىن قامتاماسىز ەتۋ. جارلىقتا تەك ا ق ش- تىڭ كونتينەنتتىك قايراڭىنا جاتاتىن بولىگى عانا ايتىلادى، ويتكەنى ۇكىمەتتىڭ بۇكىل شىعاناعىنىڭ اتىن وزگەرتۋگە قۇقىعى جوق، - دەيدى شەينباۋم.
مەكسيكا پرەزيدەنتى ەگەر شتاتتىڭ، تاۋدىڭ نەمەسە كولدىڭ اتىن وزگەرتۋگە قارسىلىق بولماسا، ولار ءوز اۋماقتارىن قالاعانداي اتاي الاتىنىن اتاپ ءوتتى.
- ءبىراق مەكسيكاعا قاتىستى بولىگىن وزگەرتۋ مۇمكىن ەمەس، - دەدى ول.
ەسكە سالا كەتەيىك، ترامپ كانادالىقتارعا ۇسىنىسىن ايتتى.
