Microsoft رەسمي تىلدەرىنىڭ قاتارىنا قازاق ءتىلىن قوستى
كومپانيانىڭ اۋدارما تىلدەر توبىندا قازىر 60 تان استام ءتىل قامتىلعان،- دەپ حابارلايدى قازاقپارات Kaz-science.kz-كە سىلتەمە جاساپ.
قازاق ءتىلى ەندى Microsoft اۋدارما قولدانبالارى، قوندىرمالار، Office باعدارلاماسى، Bing اۋدارماشىسى جانە بيزنەستەر مەن باعدارلاما ازىرلەۋشىلەرگە ارنالعان e Cognitive ServicesAzur اۋدارما قىزمەتىنىڭ ءتىلى بولىپ جۇمىس جاسايدى.
«بۇگىن ءبىز تىلدىك كەدەرگىلەردى جويۋ جونىندەگى ميسسيامىزدى جالعاستىرا وتىرىپ Microsoft Translator تىلدەر توبىنا قازاق ءتىلىن قوستىق دەپ قۋانا حابارلايمىز. Qazaqsha نەمەسە Qazaq Tili دەپ تانىلعان بۇل ءتىلدىڭ قازاقستان، قىتايدىڭ باتىسىندا، موڭعوليانىڭ باتىسىندا، رەسەيدىڭ وڭتۇستىگىندە جانە الەمنىڭ باسقا ەلدەرىندە 22 ميلليونعا جۋىق سويلەۋشىسى بار»، دەلىنگەن الەمدىك كومپانيانىڭ بلوگىنداعى جازبادا.
ەستەرىڭىزگە سالا كەتەيىك، 2014 -جىلدىڭ 12-جەلتوقسانىندا WikiBilim قوعامدىق قورى قازاق ءتىلىنىڭ Google كومپانياسى اۋدارما قىزمەتىنە رەسمي تۇردە قوسىلعانىن جاريالاعان بولاتىن. بۇگىندە قازاق ءتىلى اتالمىش اۋدارما قۇرالىنداعى 109 ءتىلدىڭ ءبىرى. ايتا كەتەرلىگى، Microsoft Google دان كەيىنگى قازاق ءتىلىن قوسقان ەكىنشى الەمدىك كومپانيا.
